മറ്‌ക്കോസ് ഈ ബുക്ക്‌ണ പറ്റി സിന്നൊരു സേദി
ഈ ബുക്ക്‌ണ പറ്റി സിന്നൊരു സേദി
<<ഇദ് സാമിമഗാ് ഏസു ക്‌റ്‌സ്‌ത്ത്‌ണ പറ്റി സൊല്ല്യ പോര ണല്ല സേദി>> എന്ത് സൊല്ലികൊണ്ട്‌ത്തെ മറ്‌ക്കോസ് ഈ ണല്ല സേദിന എ്ള്‌ദ്യ പ്‌ഡിത്താദ്. എല്ലാദ്‌ണാമ് അദിഗാരത്തോഡെ സെയ്‌ര മന്‌സാനായാക്കു ഈ ബുക്കിലി ഏസുണ പറ്റി സൊല്ലുറാദ്. ഏസു സൊന്ന ബുദ്ദിണായാത്തിലിമ്, ആള്‌ഗാക്ക് തട്ടിര്‌ക്ക കെ്ട്ടജാദിഗണ ഒയിപ്പിസ്‌റാദിലിമ്, ആള്‌ഗാദ് പാവഗണ പൊറുക്കാദിലിമ് തന്ന് അദിഗാരണ ണമാക്ക് കാണ്യ മുഡിദ്. ആള്‌ഗ സെയ്‌ദ പാവഗാക്ക് കെ്ഡേക്ക ദണ്ടണേലിര്‌ന്ത് അവാര്‌ണ കാപാറ്റ്യ ഏസു തന്ന് ഉജുറുണ കൊഡുക്ക്യ മന്‌സാനായി പ്‌റാന്താ് എന്ത്‌ത്തെ ഏസു തനാണ പറ്റിതാനെ ഈ ണല്ല സേദിലി സൊല്ലുറാദ്.
ഏസു പഡിസിന കാര്യഗണ ബ്‌ഡ ഏസു സെയ്‌ദ കാര്യഗണ പറ്റി എ്ള്‌ദ്യാത്തെ മറ്‌ക്കോസ് മുക്ക്യമായിമ് ആസെപട്ടാദ്. ഓഗന്നാനാമ്, ഏസു തണ്ണിക്ക് മുളുഗ്‌റാദ്‌ണാമ്, ഏസു സോദണെപഡ്‌റാദ്‌ണാമ് പറ്റി സുരുക്കാത്തിലി എ്ള്‌ദി മുഡിത്ത്, അപ്പ്‌താനെ ഏസു ണോയിക്കാറാര്‌ണ തെ്ള്‌സ്‌റാദ്‌ണാമ് ആള്‌ഗണ പഡ്‌സ്‌റാദ്‌ഗണാമ് പറ്റി മറ്‌ക്കോസ് എ്ള്‌ദി ബെത്തിര്‌ക്കാ്. ഏസു പിന്ന്‌മേലെ ണഡാന്തവാര്‌ഗാക്ക് ണാള് പോഗ പോഗ ഏസു ആരെന്ത് ണലമായി തെരിന്ത്‌കൊണ്ടിര്‌ന്ത്‌ദ്. ആന അയാള്‌ദ് പോട്ടിക്കാറാര്‌ക്ക് അയാളോഡെ ഏദ്‌മ് പെര്‌ഗികൊണ്ട് ഇര്‌ന്ത്‌ദ്. കഡേസിലി, ഈ ബുക്കിലി ഏസുദ് സെര്യാന കൊഡിമേമ്, തനാണ കുരുസ്‌ക്കെ സേത്തി ആണി അഡിത്ത് കൊല്ലുറാദ്‌ണാമ്, താന് സത്തവാര് പട്ടിലിര്‌ന്ത് ഉജുറേ്റാദ്‌ണ പറ്റിമ് മറ്‌ക്കോസ് എ്ള്‌ദി ബെത്തിര്‌ക്കാ്.
ഈ ബുക്കിലി അഡാങ്കിര്‌ക്കാദ്
ണല്ല സേദിന സൊല്ല്യ പ്‌ഡിക്കാദ് 1:1–13
ഏസു ഗെലീലെ ണാഡിലി സെയ്‌ര കാര്യഗ 1:14—9:50
ഏസു ഗെലീലെ ണാഡിലിര്‌ന്ത് എര്‌സലേമ് പട്ടണാക്ക് പോരാദ് 10:1–52
ഏസു സാരാദ്‌ക്ക് മുദ എര്‌സലേമ് പട്ടണാത്തിലിമ് അദ്‌ക്ക് അര്‌ഗേമ് 11:1—15:47
ഏസു സത്തിര്‌ന്ത് ഉജുറെ്റാദ് 16:1–8
ഉജുറെ്ന്ത ആണ്ടവാ് കണ്ണ്‌ക്ക് കാട്ട്‌റാദ്‌മ്, പ്‌റ മേലോഗാക്ക് പോരാദ്‌മ് 16:9–20
Zur Zeit ausgewählt:
മറ്‌ക്കോസ് ഈ ബുക്ക്‌ണ പറ്റി സിന്നൊരു സേദി: സാമിദ് സേദി
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
New Life Literature