Jakari Takɨdɔt
Takɨdɔt
Maktub lo Jakari ɔj deg'n ndɨ dan gerɨn nyanɗah kamdɔt kaglot kɨ kij. Ɔj'j tit bãi Juipg'n awɨn ɓert a telɨn ɗen kam dɔningt lod gog. Maktub lo Jakari lon i kɨ kãi dene joo a ne gaja kɨ kɨɗa i dang kɨ gaja mad. Gaja kɨdasa ɓai dɔ ɗob ninat kɨdasa teen jijoo elta kɨ ta Luwaht kɨ kaglo'n tag'n non teen kokɨro Luwaht kɨta girrdeg lon. Jakari ngekelta kɨ ta Luwaht eltag'n non kam ɓalt kɨ 520 teen 518 kete nõ kooj Jeju Krist.
Elta kɨ ɔj dɔ ɗa kuj ndub Luwah kɨ Jerusalem gog, tit bãi Israel maj kad ɗa goron kɨta nyag'n ton kete nõat, tit'n ngekelta kɨ ta Luwaht Aje elɨn taa kaglot kɨkɨɗa nõ.
Ɓai dɔ Jaka 1:1—8:23, i ta kɨdɔt Jakari lamber kunɨn ngan Israel kad mbetɨn pa ndiad kɨ ndɨkɨdɔdõ lod kad i kɨgo ndigt lo Luwaht. Got kunt lo ngekelta kɨ ta Luwaht Jakari elta dɔ nyakookamndilt jijoo'n Luwah tee dɔa ad oo. Nyag'n ngekelta kɨ ta Luwaht oo ye a da ta ɗob ad ger girr nyag'n ɓet a ɗan nya kaglot kɨ tajigla kɨ kaglot'n ɓet a ɗe nõ. Na Bɨraɓe ndɨ go nyag tube kɨgo ndigt lon.
Go teld ɓe ɓert, Juipg ndahn kamd dɔkaglot kɨ kij kɨtatɔd ndɨ ngoon ɗe lo kɨwur lo Luwah ad i de'n Luwah kɔta, na laa kad ndah girr kõɓe kɨ deg a ndɨnt kɨ na kɨ kam kɨsokɨber ho, kam nyaɗat kɨ denesew ho. Nya kookamndilt kɨ kõ sɔɔ kɨ kõ mi'n Jakari oo ye elta ɔjɨn dɔ ta lo ngejanyamosɨkadkari Jojue, kɨ ngékõɓe Jorobabel, kɨ ngékɨɓe lo ngar Dabid (Jaka 3:1—4:14). Jojue ngejanyamosɨkadkari kɨ Jorobabel kɨ ngékõɓe in ngekɨla lo Bɨraɓe tujoo. Na tag kɨ dɔboit kad tɔlɨn ta tag kɨ kam nyakookamndilt ye, elta kad Jojue la i ngekɨla lo Bɨraɓe kam kɨla janyamosɨt ye, (Jaka 6:9-15). Nya 'nten ɔj'j kad Juipg ndɨ goon ɗe lo kɨwur lo Luwah kad de'n non a i ngejanyamosɨ a la i de kɨ girr kooja i girr ngar.
Ɓai dɔ Jaka 7:1—8:23 ad kamj gah dɔt kad Bɨraɓe Luwah i Ngegang ta dɔ girrdegt lon ho i Luwah kɨ ngekajd ho. Gaj maktub lo Jaka 9:1—14:21 in tag kɨ Luwah el ɔjɨn dɔ ɗa'n ɓet a ɗa kɨ deg lon kɨgo kamkẽt lon. Elɨn ta dan ne dɔ de'n Luwah la sia kad ɗe ndah girr kõɓe'n deg a ndɨn kɨ kam kɨsokɨber kɨ kam nyaɗadenesewt. Kamla ngar'n non a i ngar kɨ ngetetɗɔɔ ho ngar kɨ ngesɔldɔ ho. Kamla i ngekulbatg'n deg mbetɨn na (Jaka 11:7) na got tɔlɨn na (Jaka 12:9-10). Jaka 9:1—11:17 elj kad Luwah a ug ɔrr girrdeg lon tube, na a ad'd tɔg ho ndɨ maj. Na a ɔrr girr kamkɔlg'n a tee dɔdt. Jaka 12:1—14:21 ɔj'j kad girrdeg loa telɨn girrdeg kɨ kij, Luwah ajd ad teen kamkõgt kɨ ngãi, Bɨraɓe a ɔrr ta dɔdt a ɔrrd kam nyagt kɨ majal tube, na tel ngar kɨbo kɨ õɓe dɔ dɔningt kɨ taagbe.
Zur Zeit ausgewählt:
Jakari Takɨdɔt: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.