Jakari 6
6
Ta lo pusɨg kɨsɔɔ
1M'un kumm kɨ dõ gog tɔ, m'nɔl lo, na m'oo pusɨ ɗɔɔg sɔɔ teen mbɨna mbalbogt joo. Mbalbog'n non ĩn mbalbo ningakasɨg. 2Sɨndag lo pusɨɗɔɔ kɨdasa ĩn sɨnda ndaig, sɨndag lo pusɨɗɔɔ kɨkõjoo ĩn sɨndag kɨkil, 3sɨndag lo pusɨɗɔɔ kɨkõmɨta ĩn sɨndag kɨndà na sɨndag lo pusɨɗɔɔ kɨkõsɔɔ ĩn sɨnda mosɨg. 4Kamla m'tur m'el malaika kɨ ngekelsem ta m'an: Ngeem, ĩgɨn non ĩn ɗi a? 5Malaika turɨm an: Ĩgɨn non la ndɨ awɨn kɨ lo nélgt kɨsɔɔ kɨdɔrãt got'n hã ɔjɨn rod nõ Bɨraɓet kɨ Ngedɔning kɨtaagbe. 6Pusɨɗɔɔ kɨ sɨndag kɨkil ndɨ awɨn kɨ dɔningt kɨjigel, na kɨndag awɨn godt, Sɨnda mosɨg awɨn kɨ dɔningt kɨjikõ, 7sɨnda ndaig teen, sahn kad n'lan go dɔning, na eld an: Awɨn, lan go dɔning. Titbe to, lan go dɔning. 8Kunɨm na elɨm an: Oo, ĩgɨn ndɨ awɨn kɨ dɔningt kɨjigel adɨn ndilɨm sɔl lom dɔ dɔningt kɨjigel.
Kɔjg kɨ kunkɔg kɨ ɔj dɔ nda kuj ndub Luwah gog
9Bɨraɓe elɨm ta an: 10I taa nya ji ngetel ɓe ɓert, ad i Heldai, Tobija kɨ Jedaja ĩgɨn ten ko Babilon, awɨn ndɔt'n non kuju lo Josias, ngon Soponi. 11I taa nar arjã kɨ nar ɔrr, i ɗan jɔg kad i ndah dɔ Jojuet ngon Josadak, bɨradɔ ngejanyamosɨ. 12A i ela an: Titbe kel Bɨraɓe Ngekoosɨg; Oo, de'n tɔa i Dɔj a tɔg kam lot lon, na a ɗa kuj kɨjaɓat lo Bɨraɓe. 13I ĩ la a ɗa kuj kɨjaɓat lo Bɨraɓe, tɔa a ko ngãi kɨ kɔsɨgon, a ndɨ ngar dɔ pong kõɓet lon, a ndɨ ngejanyamosɨ dɔ pongt lon tɔ. Kɔj ta kɨ lapia a i kudt tujoo. 14A ngomɨn jɔg 'nten kam kujt kɨjaɓat lo Bɨraɓe, a i nyagakamdɔt kɨro Heldait, Tobija, Jedaja kɨ Josias ngon Soponi. 15Ĩgɨn hã ĩn sãi ye, a ɗen, a ɗan kɨla kam kujt kɨjaɓat lo Bɨraɓe, na a i gerɨn ta kad Bɨraɓe Ngekoosɨg la lam kɨrosɨt ye. Nya 'nten a ɗa nya ĩla i telɨn rosɨ go tat lo Bɨraɓe Luwah losɨ kɨ rotĩsɨ.
Zur Zeit ausgewählt:
Jakari 6: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.