Mark 3
3
Jeju yoot de kɨ jia oi njɔrr
(Oo Mat 12:9-14; Luk 6:6-11)
1Jeju tel aw kam kuj kawnat lo Juipg gog. De mad ndɨt nõ jia oi njɔrr. 2Deg'n hã ĩn kam kujt ye, ndan kumd go Jejut kɨ n'oon ke ɓet a yoot de'n non ndɔ taakòt lo Juipg a? Gaan ta titbe kɨtakad n'tetɨn ne ta kɨmajal kɨ dɔat. 3Jeju el de'n jia oi njɔrr an: I ɓai dõ, i ɗa dan degt nẽbe ad ooin. 4El deg'n ndɨn kam kujt an: Kɨ ndɔ taakò ye, i goɗobat kad de ɗa maj a? Ke kɨ ɗa majal a? I goɗobat kad de aj de e? Ke i goɗobat kad de tɔl de? Na deg ndɨn god mbo.
5Kamla Jeju nɔld mbet't, ɗa kamkil kɨ wong kɨta ĩn deg kɨ kookumtondo lod goto ho, kamd kongkong ho: Jeju el de kɨ jia oi njɔrr an: I sɨra jii. De'n non sɨra jin, jia tel to kari. 6Na Parisɨg teen kam kuj kawnat kɨ tɨga kad n'ɔjɨn na ta sed deg lo Herod Antipas. Sahn go ɗob ke titbãi n'a n'tɔlɨn ne Jeju a?
Jeju mbed ngombangkɨlag lon kɨlah gidaijoo
(Oo Mat 10:1-15; Luk 6:12-19; Knk 1:13)
7Lon Jeju kɨ ngéndoog lon awɨn ta baht kɨ Galile, koosɨdeg ndulon goa. Deg kɨ Galilet kɨ Jude, 8kɨ Jerusalem, kɨ dɔning Idume kɨ gid bah Jurdẽt nat kɨ deg kɨ logt kɨ gugɨn dɔ ɓebo Tir kɨ Sidõ. Bakad koosɨdeg'n non, lon oon hoi nyag kɨbobo'n Jeju ɗa ye ɗen kɨ roat. 9Jeju el ngéndoog lon kad ɔrrɨn ngon too mad ta dang adnɨn, na ɓeta koosɨdeg rumbon na son ne dɔnt. 10Kɨtɔ Jeju a yoot deg ngãibe ad deg tube'n mõi kɨ dang dang ɗad ye, son kɔat kad kɨ'n n'ɔdɨna. 11Lon ndil kɨyerrg oona ye, son ber nõat, ɓakon bang anan: Ĩ la ĩ Ngon Luwah ye.
12Na Jeju ndángd kɨ tɔgɨn, kad adɨn deg gernɨn al.
13Kamla Jeju al dɔ mbalt, kun deg'n ĩ kɨɓe ndig kad'n mbed'd, ĩn tɔ awɨn kɨ ro Jejut. 14Kɔt deg kɨlah gidaijoo kudt ndah tɔd ngombangkɨlag, kɔtd kad ĩn nat sen, kad n'lad kɨ lan mber kõɓe lo Luwah. 15Ad'd tɔg kad kɨ tuɓan ndil kɨyerrg kɔ. 16Tɔ ngombangkɨla kɨkɨlah gidaijoo'n Jeju nda la ten: Simõ'n Jeju ndah tɔa Pierr. 17Kɨ Jak ngon Jebede, kɨ Jã kɨ ngonkõ Jak, ĩgɨn Jeju ndah tɔkɨrrad Boanerjes ad ĩn ngan ndii kɨndang. 18Kamla Andre kɨ Pilip kɨ Bartelemi, kɨ Matie kɨ Tomas, kɨ Jak kɨ Simõ, 19de kɨ Kanat, kɨ Juda de kɨ Iskariot'n hã la Jeju ji madngétaagt.
Nooj Jejug ndigɨn kɔr Jeju kaw sia
20Jeju tel ɗe kam kujt lon kɨ Kapernawmt gog. Koosɨdeg tel kawɨn na kɨ nat gog tɔ, ad Jeju kɨ ngéndoog lon asɨn kad san nya al. 21Na lon nooj Jejug oon hoia ye, ɓai ɗen kad n'ɔrrɨna kɔ ku degt, kɨ n'awɨn sia ɓe, kɨta elɨn anan: Dɔa tel wãri.
Majal kɨ ndoor Ndil Kɨ Kunjɗang
(Oo Mat 12:22-37; Luk 11:14-23; Luk 12:10)
22Ngéndoo deg mberkɨnda'n ɓain Jerusalemt ye, elɨn anan: Beljebul, ad i diabɨl i kam Jejut. Kɨmadg elɨn anan: I kɨtakul ngar lo ndil kɨyerrg la ndɨ ɔrrɨn ndilg kɨyerrg kɔ ye. 23Jeju kun ngéndoo deg mberkɨnda kɨ ront kamla eld ta kɨ terrta an: Titbãi hã Sɨtan, ndil kɨyerr asɨ tuɓa ndil kɨyerr a?
24Ĩla deg kɨ kam kõɓet kɨkɨɗa ɗa ndoorɨn na a ne, kõɓe'n non asɨ ɗa lo ɗant al. 25Ĩla deg kɨ kam kujt kɨɗa gangɨn na ho, ndoorɨn na ho a ne, deg'n non asɨ ndɨn kɨ na al bat. 26Kɨtɔ 'nten, ĩla Sɨtan ɓai ndoor ron kɨ ron a ne, ĩ kɨɓe gang ron dene joo, tɔga kaa ne, asɨ ɗa lo ɗant al, na a goto.
27De kɨ asɨ kand kam kujt lo de kɨ tɔga i ngãi kɨ'n ɓooga nyamajg loa tube kɨkanj dɔa goto, na a dɔa kete kamtã la a ɔi nyag loa ye. 28M'ndɨ m'elsɨ kɨ tɨga wakɨsɨ: i rota, a nyan go majalg lo deg kɔ, kɨ ta kɨmal kɨɗen hã de ndɨ el ndoorɨn Luwah; 29na de'n ndɨ elta kɨmal ndoorɨn Ndil Kɨkunjɗang a ne, Luwah a nyàgo majal loa kɔ al bat, majal'n non a ɔia mbãkɨnõt.
30Jeju elta ngéndoo deg mberkɨnda titbe kɨta elɨn anan: Ndil kɨyerr i kamat.
Nooj Jejug kɨ jeje
(Oo Mat 12:46-50; Luk 8:19-21)
31Kamla kõ Jeju kɨ ngankõag kɨdɨngãg ɗe ɗan tɨga, lan de mad kad kuna. 32Koosɨdeg ndɨn ber gugɨn dɔ Jeju, deg elɨna anan: Oo, kõi, kɨ ngankõi kɨ dɨngãg ɗan tɨga, ɗa ndɨjein. 33Jeju turd an: Nõ i kom a? Nõg hã ĩn ngankomg a? 34Kamla nɔl deg'n gugɨn dɔa mbet't, na el an: Oon deg'n ndɨn la ĩn kom kɨ ngankom ye.
35Dekɨɗen ndɨ ɗago ndigt lo Luwah a ne, de'n non i ngonkom kɨdɨngã, ke ngonkom kɨdẽ, ke kom.
Zur Zeit ausgewählt:
Mark 3: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
