Matie 7
7
Jeju ndoo deg kad gangɨn ta dɔnat al
(Oo Luk 6:37-42; Luk 11:5-13)
1Ot gangɨn ta dɔ degt, kɨtakad Luwah gangta dɔsɨt al. 2Kɨtɔ a gangɨn ta dɔsɨt kɨ takɨgang'n i ndɨ i gangɨn, na kɨ ngo mbɔj nya'n i ndɨ i mbɔjɨn la a mbɔjɨn ne adsɨn ho ye. 3Kɨtɔɗi i ndɨ i nda kumi dɔ bulmut kɨ kum ngonkõit, na sorkag'n to kumit ye oo al a? 4Ke titbãi asɨ kel ngonkõi kan: Ad m'un bulmu'n to kumit nõ kɔ, ĩn hã sorkag to kumit a? 5Ngendokumdeg, un sorkag kɨ kumit kete, kamla a oo lo ar kad unɨn bulmu kɨ kum ngonkõit ye.
6Ot kadɨn nyag kɨjaɓat bisɨg, ot kũn medg losɨ nõ boorgt, na ɓeta ɓan dɔd kɨ njad, na tel j'asɨn.
Nyandoo lo Jeju dɔ keltat kɨ Luwah
(Oo Luk 11:5-13; 18:1-7)
7I kɔɔn na a adsɨn; i sahn na a i ngahn, i gan tabit, na a tee adsɨn. 8Kɨtɔ dekɨɗen ndɨ kɔ a ne, ndɨ taa; ĩn ndɨ sah a ne, ndɨ ngah; ĩn ndɨ ga tabit a ne, a tee adɨna. 9Nõ kusɨt la hã ĩla ngona kɔa kuɓɨr bɨna a ne, a ada mbal a? 10Ala, ĩla kɔa, kanj a ne, a ada li a? 11Kɨtɔ 'nten, ĩn deg kɨmajalg, na i gerɨn kad nya kɨmaj ngansɨg ye la, Bɔwsɨ kɨ kam dɔrãt dõ tã a ad nyag kɨmaj ĩgɨn ndɨ kɔna nyag kɨmaj nõ ale? 12Nyag tube'n i ndigɨn kad deg ɗan sesɨ nõ, i ɗan sed titbe tɔ ho, kɨta 'nten la i mberkɨnda lo Moij kɨ kɨ lo ngékelta kɨ ta Luwaht.
Nyandoo lo Jeju dɔ ɗobgt kɨjoo kɨ tabitg kɨjoo
(Oo Luk 13:23-25)
13Andɨn kɨ tabit kɨ kungunun. Kɨtɔ tabit kɨtat, kɨɗob kɨ bagirrbo ndɨ awɨn kɨ deg kɨ nujkɔt, na deg ngãibe ndɨ andɨn tit. 14Na tabit kɨ kungunun, kɨ ɗob kɨ mbengrẽ be ndɨ awɨn kɨ kumkajirt, na ngéngahd ĩn tẽbe.
Nyandoo lo Jeju dɔ ngéndɔndilgt kɨngom
(Oo Luk 6:43-45; 2 Pie 2:1-3)
15Oon go rosɨ maj kɨ ngéndɔndilg kɨngom'n ndɨ elɨn anan: N'ndɨ nelɨn ta kɨ ta Luwaht. Ndɨ ɗen rosɨt kam ngɨra batgt, na kokamt ĩn bisɨkolog ngétɔkohdeg. 16A i gerɨnd kɨtakul kɨlaɗadg. De a ja kand nduu kam kongt al, ke a ja kand mbaiɓood kag ngargt al ho. 17Titbe ho la kag kɨmaj kɨɗen ndɨ tee kɨ kandɨn kɨmaj, na kag kɨmajal ndɨ tee kɨ kandɨn kɨmajal. 18Kag kɨmaj a asɨ tee kɨ kandɨn kɨmajal al, na kag kɨmajal asɨ tee kɨ kandɨn kɨmbẽ al ho. 19Kag kɨɗen ndɨ tee kɨ kandɨn kɨmajg al a ne, a gana lana horro. 20Titbe la a i gerɨn ne ngéndɔndilg kɨngom kɨtakul kɨlaɗag ye.
Nyandoo lo Jeju dɔ degt'n ndɨ kunɨna Bɨraɓe, na ɗan go ndigt lo Bɔwa al
(Oo Luk 6:46-49; 13:25-27)
21Deg tube'n elmɨn anan: Bɨraɓe, Bɨraɓe, hã a andɨn kam kõɓet kɨ dɔrãgt al, na de'n ndɨ ɗa kɨgo ndigt lo Bɔwm'n i kam dɔrãt dõ tã. 22Ndɔt'n non, deg ngãibe a elmɨn anan: Bɨraɓe, Bɨraɓe, kɨ lamber ta lo Luwah kam tɔit ale? Kɨ j'ɔrr ndilg kɨmajal kam tɔit ale? Kɨ ɗa kɨlag kɨ yaya ngãibe kam tɔit ale? 23Kamla m'a m'el m'tɔd wakɨsɨ m'an: M'gersɨ nja kɨɗa al bat; i ɗan kɨgog sãi romt, ĩn ngétɔidɔta.
Jeju ndoo deg kɨ terrta dɔ ngéɗakujgt joo
(Oo Luk 6:47-49)
24Dekɨɗen ndɨ oo dɔ tag'n m'el non, na ndɨ ɗagoot a ne, a i tit de kɨ ngekumtɔg'n ɗa kuj lon dɔ mbangt. 25Ndii ed, man õ ngãi, nélg lan, na son dɔ kujt'n non, na kuj so al, kɨta ndan girra dɔ mbangt. 26Na dekɨɗen ndɨ oo dɔ tag'n m'ndɨ m'el nõ, na ɗagoot al a ne, a i tit kurde'n ɗa kuj lon dɔ ngart; 27na ndii ed, man õ ngãi, nélg lan, son dɔ kujt'n non, ad kuj so. So loa i kɨbobe.
28Lon Jeju eltag lon tɨga woi ye, ta ya bakad koosɨg biw dɔ nyandoot loa, 29kɨta ndood kɨ tɔg, na tit'n ngéndang maktubg lod a ndoond ne al.
Zur Zeit ausgewählt:
Matie 7: MlL
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbai Bible Revision © Bible Society of Chad, 2015.
