फिलिप्पी 2
2
ख्रीष्टक नम्रता
1यदि ख्रीष्टम रलक कारण टुह्र कुछु उत्साह पारख्लो, वा उहाँक प्रेमले टुह्र कुछु सान्त्वना पारख्लो, वा पवित्र आत्मम सङ्गति पारख्लो, एक-औरजहन प्रेम ओ दया कर्ठो कलसे, 2टुह्र एक्क विचार रहल, एक्क प्रेमम रहल ओ एक्क चित्त रहल होक महीह खुशी बनाओ। 3आपन केल भलाइ जिन खोजो ओ घमण्डले फुल्क कुछु जिन करो। तर नम्र बनो ओ औरजहन अपन्हेहसे असल सम्झो। 4आपन हित केल जिन खोजो, तर आनक हित फे हेरो। 5टुन्हक मन त ख्रीष्ट येशूक मनअसक हुइपर्ठा।
6उहाँ सड्डभरिक लाग परमेश्वरक समान रलह।
उहाँ बलजब्री परमेश्वरक समान पलरना विचार फे नैकर्ल।
7तर उहाँ आपन इच्छले यी सब चिज छोर्ल
ओ कमारा हुइल।
उहाँ हमारअस मनैया होक जन्मल।
8उहाँ नम्र होक मृत्युसम केल नाहीँ,
क्रूसक मृत्युसम आज्ञापालन कर्ल।
9उहओर्से परमेश्वर उहाँह सबसे उच्च बनैल,
ओ उहाँह सबसे उच्च नाउँ देल।
10आब स्वर्गम, पृथ्वीम
ओ पृथ्वीक टर रहल सबजन
येशूक नाउँक आदर करक लाग ठिहुन ट्याकपर्ठा।#यशै ४५:२३
11येशू ख्रीष्ट जो प्रभु हुइट कैक
सबजन परमेश्वर बाबक महिमक लाग
खुल्लमखुल्ला स्वीकार करपर्ठा।
ज्योतिअसक चम्कना
12उहओर्से म्वार प्रियहुँक्र, मै टुन्हकसँग रहलम टुह्र सड्ड म्वार बात मन्लो, आब मै दूर रहलम झन् टुह्र म्वार बात मानपर्ना जरुरी बा। टुह्र सारा डर सहित आपन मुक्तिक काम पूरा करक लाग परिश्रम करो। 13काकरकि परमेश्वर टुन्हकम सड्ड काम कर्टिबाट। उहाँ आपन उद्देश्य पूरा करक लाग टुँहन मन ओ शक्ति देठ।
14गनगन या वाद-विवाद नैकैक सब काम कर्टीजाओ। 15असिक टुह्र पापी ओ खराब मनैन्हक बीचम परमेश्वरक निष्खोट सन्तानअस निर्दोष ओ शुद्ध हुइबो। आकाशम तोरैँया चम्कअस टुह्र संसारम चम्कपर्ठा।#व्य ३२:५ 16जीवनक वचन कर्रसे पक्रलरहो। ओसिक कर्बो कलसे, म्वार मेहनत ओ परिश्रम खर्बास नैगैल् कैक ख्रीष्ट अइहीँ त मै गर्व कर्ना मौका पैम। 17टुन्हक चह्राइल विश्वासक बलिदानम महीह आपन रगत बलिदानक रूपम बहाइ परल कलसे फे यिहिँम मै खुशी बाटुँ, ओ टुह्र म्वार खुशीयालीम सहभागी होओ कना चहठुँ। 18ओसहेँक टुह्र फे खुशी होओ ओ मै फे टुन्हक खुशीयालीम सहभागी हुइ चहठुँ।
तिमोथी ओ इपाफ्रोडिटस
19प्रभु येशूक इच्छा हुई कलसे, मै झट्टहेँ तिमोथीह टुन्हकठे पठैम कना म्वार आशा बा। टुन्हक हालखबर थाहाँ पैलसे महीह फे खुशी लग्नेबा। 20साँचो मनले टुन्हक वास्ता कर्ना तिमोथीअस म्वारठे और कुई नैहो। 21और जन त सब आपन धुनम केल बाट, येशू ख्रीष्टक बारेम वास्ता कर्ना कुई फे नैहो। 22ऊ ओ मै त छावा-बाबाअस सुसमाचार फैलैना काम कसिक कर्लही ओ ऊ कसिन मनै हुइट कना बात टुँहन थाहँ बा। 23महीह का-का हुइना हो, उ बात थाहाँ हुइटीकि मै तिमोथीह पठैना आशा कैरख्नु। 24प्रभुक इच्छा हुई कलसे, मै फे झट्टहेँ अइना आशा कैरख्नु।
25इपाफ्रोडिटस भैयह मै टुन्हकठे पठैना जरुरी देख्नु। हम्र दुनु जन सँगसँग काम कर्ली ओ खुशीक खबर सुनैना कामम सिपाहीअसक दुःख भोग्ली। ऊ महीह सहायता देहक लाग टुन्हक पठाइल दूत हुइट। 26टुह्र सबजहन भेँट्ना हुँकहार भित्री चाहना बाटन। टुह्र ऊ बेराम पर्लक बात सुन्लो कैक ऊ टनिक चिन्तित बाट। 27हो ऊ बेराम पर्क जाट्टीसे मुव-मुव होरलह। तर परमेश्वर हुँकहीन दया कर्ल। हुँकहीन केल नाहीँ महीह फे दया कर्ल ओ म्वारम शोकक् उप्पर शोक नैथपगैल्। 28उहओर्से मै हुँकहीन पठाइक लाग धेर उत्सुक बाटुँ। हुँकहीन फेदोस्र देख्क टुह्र फे खुशी हुइबो ओ म्वार चिन्ता फे कम हुउइया बा। 29प्रभुम हुँकहीन भाइ मान्क स्वागत करो। हो असिन मनैन आदर करपर्ठा। 30काकरकि ऊ ख्रीष्टक काम कर्ना क्रमम हुँकहार ज्यान फे जाइ-जाइ होरलहन। म्वार लाग टुह्र पूरा कर नैस्याकल सेवा ऊ पूरा कर्ल।
Zur Zeit ausgewählt:
फिलिप्पी 2: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
