यूहन्ना 10
10
भेँरी चह्रुइया असल व्यक्ति
1येशू कल, “जाट्टीसे मै टुँहन कहटुँ, भेँरी कर्यैना घारीक ड्वारीओर्से नैपैँठ्क औरओर्से पैठुइया त चोर्वा ओ डाँका हो। 2तर ड्वारीओर्से भित्तर पैठुइया भेँरी चह्रुइया हो। 3वाकर लाग डोरपाल्या ड्वार खोलदेठा, ओ भेँरी वाकर आवाज सुन्ठ। ऊ आपन भेँरीन्हक नाउँ ले-ले बलैठा, ओ हुँकन बाहर लैजैठा। 4आपन सब भेँरी निक्राक सेक्क ऊ हुँकन्हक आघ-आघ जैठा ओ भेँरीजुन वाकर पाछ-पाछ अइठ, काकरकि भेँरी वाकर आवाज चिह्न्ठ। 5नैचिन्हल मनैयक पाछ भेँरी नैलग्ट, बेनसे भग्ठ, काकरकि हुँक्र वाकर आवाजऽ नैचिन्ट।” 6येशू यी बात आहानक रूपम कलह। तर उहाँक कहल बात हुँक्र नैबुझ्ल।
7उहओर्से येशू फेदोस्र हुँकन कल, “जाट्टीसे मै टुँहन कहटुँ, भेँरीन्हक घारीम जैना ड्वार मैहे हुइटुँ। 8अपन्हेह अगुवा कैक दाबी कर्टी महीसे आघ आइल सब मनै च्वार ओ डाँका रलह, तर भेँरी हुँकन्हक बात नैसुन्ल। 9ड्वार मैहे हुइटुँ, मैद्वारा भित्तर पैँठुइयन सबजन बचाजैहीँ। हुँक्र भित्तर-बाहर अइना-जैना करहीँ ओ चह्रणम चह्र पैहीँ। 10चोर्वा त च्वार, मुवाए ओ नाश करक लाग केल अइठा। तर मै त मनै जीवन पैहीँ, ओ उ प्रशस्त मात्रम पैहीँ कैक अइनहुँ।
11“भेँरी चह्रुइया असल व्यक्ति मैहे हुइटुँ। असल चह्रुइया त आपन भेँरीन बचाइक लाग आपन ज्यान फे देठा। 12ज्यालादारी मनैया, जे भेँरीन्हक मालिक नैहो, असल चह्रुइयाअस नैरहट्। ऊ त ब्वाँसा आइट् द्याखल कलसे, भेँरीन छोर्क भाग्जैठा, ओ ब्वाँसा भेँरीन झपट्क लैजैठा ओ तितरबितर पारदेठा। 13ऊ भाग्जैठा, काकरकि ऊ त ज्यालादारी मनैया केल हो, ऊ भेँरीन्हक वास्ता नैकरट्।
14“भेँरी चह्रुइया असल व्यक्ति मैहे हुइटुँ। मै आपन भेँरीन चिह्न्ठुँ, ओ म्वार भेँरी महीह चिह्न्ठ, 15जसिन कि बाबा महीह चिह्न्ठ, ओ मै बाबह चिह्न्ठुँ। ओ मै आपन भेँरीन बचाइक लाग आपन ज्यान फे देठुँ।#मत्ती ११:२७; लूक १०:२२
16“म्वार और भेँरी फे बाट, उ भेँरी यी घारीमक नैहुइट। मै हुँकन फे आनपर्ना आवश्यक बा। हुँक्र म्वार आवाज सुनुइयाबाट, ओ म्वार सब भेँरी एक्क बगाल हुउइया बाट, ओ हुँकन चह्रुइया फे एक्कठो रहुइयाबाट। 17बाबा महीह प्रेम कर्ठ, काकरकि मै आपन प्राण त्याग कर्ठुं ओ फिर्ता फे लेठुँ। 18कुई फे म्वार प्राण लेह नैस्याकट्, तर मै त आपन राजीखुशीले आपन प्राण त्याग कर्ठुं। आपन प्राण त्याग कर्ना अधिकार म्वारठे बा, फेदोस्र लेना अधिकार फे म्वारठे बा। यिह आज्ञा म्वार बाबा महीह देरख्ल।”
19यी वचन सुन्ल त यहूदीन्हक बीचम फेदोस्र फूट हुइलन। 20हुँक्रमध्ये धेर जन कहटलह, “ओहीह भूत्वा लागरलस, ओ ऊ बौरारहल। टुह्र काजे वाकर बात सुन्ठो?”
21और जन कहटलह, “भूत्वा लागल मनैया कहाँ असिन बात बट्वाई? का भूत्वा आन्धर मनैयह देख्नाहा बनाइसेक्ठा?”
यहूदी अगुवन्हक अविश्वास
22यरूशलेमम मन्दिर समर्पण कर्लक टिहार रह। यी हिउँदक समय रह। 23येशू मन्दिरम सोलोमनक बरण्डा कना ठाउँम घुमफिर करटलह। 24यहूदी अगुवाहुँक्र उहाँक चारिओर जम्मा होक कल, “अप्न हमन कैह्यासम शङ्का कर लगैठी? हमन स्पष्ट रूपले जनादी ना, का अप्न जाट्टीसे ख्रीष्ट हुइटी?”
25येशू हुँकन कल, “मै टुँहन आघहेँ कैसेक्नु, तर टुह्र विश्वासऽ नैकर्टो। मै आपन बाबक अधिकार पाक करल कामले मै के हुइटुँ कना बात देखैठा। 26तर टुह्र विश्वासऽ नैकर्टो, काकरकि टुह्र म्वार भेँरी नैहुइटो। 27म्वार भेँरी म्वार आवाज सुन्ठ। मै हुँकन चिह्न्ठुँ, ओ हुँक्र म्वार पाछ लग्ठ। 28मै हुँकन अनन्त जीवन देठुँ। हुँक्र कबु फे नाश नैहुहीँ, ओ कुई फे हुँकन म्वार हाँठमसे अछिन्क लैजाइ सेकुइया नैहो। 29म्वार बाबा हुँकन म्वार जिम्मम देरख्ल; उहाँ सबसे महान् बाट। म्वार बाबक हाँठमसे हुँकन कुई फे अछिन्क लैजाइ सेकुइया नैहो। 30बाबा ओ मै एक हुइटी।”
31यहूदी अगुवाहुँक्र उहाँह मारक लाग फेदोस्र पत्थ्रा उठैल। 32येशू हुँकन कल, “बाबक अह्राइल धेर असल काम मै टुन्हक सामुन्नेम कैरख्नु। उ काममध्ये कौन कामक लाग टुह्र महीह पत्थ्रले मार ख्वाजटो?”
33यहूदीहुँक्र उहाँह जवाफ देल, “हम्र कौनो असल कामक लाग टुँहीन पत्थ्रले मार खोज्लक नैहुइटी, तर परमेश्वरक अपमान कर्लक कारणले हो, काकरकि टुँ मनैया होक फे अपन्हेह परमेश्वर बनाइ खोज्ठो।”#लेवी २४:१६
34येशू हुँकन जवाफ देल, “टुन्हक व्यवस्थम ‘परमेश्वर कठ, टुह्र ईश्वरहुँक्र हुइटो’ कैक लिखल नैहो का?#भज ८२:६ 35धर्मशास्त्र भङ्ग हुइ नैहुइट् कना टुँहन थाहाँ बा। परमेश्वर जेहीसे बोल्लह, हुँकन उहाँ ईश्वरर कल। 36तर महीह त बाबा पवित्र उद्देश्य पूरा करक लाग यी संसारम पठैलह। आब ‘मै परमेश्वरक छावा हुइटुँ’ कनु त कसिक परमेश्वरक अपमान हुइल्? 37यदि मै आपन बाबक काम नैकर्लहुइटुँ कलसे, म्वारम विश्वास जिन करो। 38तर यदि मै बाबक काम कर्ठुं कलसे, महीह विश्वास नैकर्लसे फे म्वार करल कामह देख्क त विश्वास करो, ओ बाबा म्वारम बाट ओ मै बाबकम बाटुँ कना बात टुह्र थाहाँ पैबो।” 39हुँक्र फेदोस्र उहाँह पक्र खोज्ल, तर उहाँ हुँकन्हक नियन्त्रणसे निपुच्गैल।
40उहाँ फेदोस्र यर्दन लद्यक उपार गैल। उ ठाउँम सुरुम यूहन्ना मनैन बप्तिस्मा देहँट् ओ उहाँ उह ठाउँम रल।#यूह १:२८ 41धेर मनै उहाँकठे अइल। हुँक्र अप्न-अप्न कल, “यूहन्ना खास कौनो शक्तिशाली काम नैकर्ल, तर येशूक बारेम यूहन्नक कहल सब बात सत्य प्रमाणित हुइल्।” 42उ ठाउँम धेर मनै उहाँकम विश्वास कर्ल।
Zur Zeit ausgewählt:
यूहन्ना 10: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
