हिब्रू 9
9
पुरान बाचा अनुसार आराधना
1पैल्हक बाचम परमेश्वरक आराधना कर्ना धार्मिक विधान ढैगिल् रह ओ आराधना करक लाग मनैन्हक बनाइल एकठो पवित्रस्थान फे रह। 2एकठो पवित्र पाल टङ्गागैल् रह, वाकर पैल्ह क्वाठम दिया ढर्ना सामदान, टेबुल ओ परमेश्वरह चह्राइल रोटी ढैगिल् रह। यहीह पवित्रस्थान कैजाए।#प्रस २६:१-३०; २५:२३-३०; ३१–४० 3द्वासर पर्दक भित्तर और क्वाठा रह, ओहीह महापवित्र स्थान कैजाए।#प्रस २६:३१-३३ 4यिहिँम धूप बर्ना स्वानक वेदी, ओ स्वानले म्वाह्रल सन्धूक रह, जेहीह बाचक सन्धूक कैजाए। उ सन्धूकिम मन्न कैजिना खैना चिज ढरल स्वानक भाँरा, टेम्ह्री लागल हारूनक लट्ठी, ओ परमेश्वरक बाचा रहल दुइठो पत्थ्रक पाटी रह, जहाँम दश आज्ञा लिखल रह।#प्रस ३०:१-६; २५:१०-१६; १६:३३; गन्ती १७:८-१०; प्रस २५:१६; व्य १०:३-५ 5उ सन्धूकिक ढप्कनीक उप्पर “करूब” कैजिना दुइठो स्वर्गदूत बनागैल् रलह। हुँकन्हक आमने-सामने फैलल् डैनाले महिमित परमेश्वर ओठे बाट कैक देखैना उ ढप्कनीक उप्पर छैह्याँ पर्लरलह। उ ढप्कनह “पाप क्षमा कर्ना आसन” कैजाए। तर आब यी सक्कु बातक एक-एक कैक बयान कर नैसेक्जाई।#प्रस २५:१८-२२
6असिक सब बातक प्रबन्ध मिलाक सेक्लसे पूजारीहुँक्र आपन विधि ओ कर्तव्य पालन कर्टी निरन्तर बाहरओरिक पवित्रस्थानभित्तर जाइँट्।#गन्ती १८:२-६ 7तर भित्तरओरिक महापवित्रस्थानम भर प्रधान पूजारी वर्षक एकचो केल जाइँट्, उह फे रगत बिना लेल नाही। उ रगत हुँकहार आपन पापक लाग ओ मनै अन्जानम करल पापक लाग चह्राइँट्।#लेवी १६:२-३४ 8पवित्र आत्मा यिहिँमसे देखैटीरलह, कि जबसम पैल्हक पवित्रस्थान पलरह, तबसम महापवित्र स्थान भित्तर जैना डगर नैखुलल्। 9यी त वर्तमान समयम हमन सिखैना एकठो उदाहरण हो। परमेश्वरह चह्राइल भेटी ओ बलिले आराधना कर्ना मनैन्हक हृदय शुद्ध बनाइ नैस्याकट् कना बात बुझैठा। 10यी सब खैना, पिना ओ धेर किसिमक शुद्ध हुइना विधि केल हो। परमेश्वरक लौव व्यवस्था नैआइट्सम कैजिना धार्मिक विधान केल हो।
येशूक बलिदानम पाप हटैना शक्ति
11तर ख्रीष्ट जब प्रधान पूजारी होक अइल, तब उहाँ आब रहल सब असल चिज अन्ल। उहाँ और पूजारीन्हकअस पालम नैगैल। उहाँक गैलक स्थान त ओहीसे असल ओ पूर्ण बाटन जौन यी संसारम नैहो ओ मनैन्हक बनाइल फे नैहो। 12उहाँ स्वाझ महापवित्रस्थानम सड्डभरिक लाग एक्क फ्यारा पैँस्ल। उहाँ बोक्या ओ बच्छुन्हक बलिक रगत लेक नाही तर आपन बलिक रगत लेक पैँस्ल ओ हमार मुक्ति सड्डभरिक लाग सुरक्षित बनैल। 13अशुद्ध हुइल् मनैन्हकम बोक्या ओ सँर्वन्हक रगत ओ कलोर्यक भुई छिट्लसे शारीरिक रूपम शुद्ध हुइठ कलसे,#लेवी १६:१५-१६; गन्ती १९:९,१७-१९ 14ख्रीष्टक रगतम त झन् हमन शुद्ध बनैना भारी शक्ति बाटन। ख्रीष्ट त सिद्ध बलि होक सड्डभर पलरना परमेश्वरक आत्माद्वारा अपन्हेह परमेश्वरम अर्पण कर्ल। आब हम्र मृत्युम लैजैना काममसे मुक्त होक जीवित परमेश्वरक सेवा कर सेकी कैक ख्रीष्ट आपन रगतले हमन शुद्ध पर्ठ।
15उहओर्से परमेश्वरक प्रतिज्ञा करल अनन्तसम रना आशिष उहाँद्वारा बलागैल् मनै पैहीँ कैक ख्रीष्ट त परमेश्वर ओ मनैन्हक बीचम लौव बाचा स्थापित कर्ल। पैल्हक पुरान बाचक ब्याला मनैन्हक करल अपराधमसे हुँक्र मुक्ति पैहीँ कैक ख्रीष्ट उह मुक्तिक म्वाल तिरक लाग आपन प्राण देल।
16कत्रा मनै मुलक पाछ आपन सम्पत्ति बाँटक लाग इच्छा-पत्र बनैठ। इच्छा-पत्रम लिखल बात लागू करक लाग इच्छा-पत्र बनैना मनैयक मृत्यु हुइल प्रमाणित हुइपर्ठा। 17इच्छा-पत्र करैना मनैया बाँचतसम उ इच्छा-पत्र लागू कर नैसेक्जाइट। काकरकि इच्छा-पत्र करैना मनैया मुलसे केल लागू हुइठा। 18उहब्याला परमेश्वरक बान्धल पैल्हक बाचा फे रगत बिना बहैल पक्का हुइ नैस्याकल। 19जब मोशा व्यवस्थक हरेक आज्ञा मनैन सुनाक सेक्ल, तब ऊ बच्छु ओ बोक्यक रगतम पानी मिलाक लाल ऊन ओ हिसपक झालले व्यवस्थक किताबम ओ सब मनैन्हकम छिट्ल।#प्रस २४:६-८ 20ओ ऊ असिक कल, “टुह्र पालन करक लाग परमेश्वरक बान्धल बाचह पक्का कर्ना रगत यिह हो।” 21असहँक मोशा पवित्र पालम ओ आराधनम चलाजैना सक्कु भाँरम रगत छिट्ल।#लेवी ८:१५ 22वास्तवम व्यवस्थक कहल अनुसार बलि चह्राइल रगतले प्राय: सब चिज शुद्ध पारजैठा ओ रगत बिना बहैल पापक क्षमा ह्वाए नैस्याकट्।#लेवी १७:११
23यदि स्वर्गीय बातक नमुनाह शुद्ध पारक लाग असिन विधि चाहल कलसे स्वर्गक बात शुद्ध पारक लाग त झन् उत्तम बलिदानक आवश्यकता परल। 24ख्रीष्ट मनैन्हक बनाइल पवित्रस्थानम नैपैँस्ल, जौन सत्य पवित्रस्थानक नकल केल हो। उहाँ त सक्कली ठाउँ स्वर्गम गैल ओ हमार लाग परमेश्वरक सामनेम उपस्थित बाट। 25इस्राएलीन्हक प्रधान पूजारी त आपन नाही तर पशु बलिक रगत लेक सालो महापवित्र स्थान भित्तर पैँस्ठ। तर ख्रीष्ट त घरी-घरी अपन्हे बलिदान ह्वाए नैगैल। 26नकि त संसारक उत्पत्ति हुइलठेसे उहाँह घरी-घरी दुःख भ्वागपर्ने रलहन। तर यी युगक आखिरी दिनम उहाँ सड्डक लाग एकचो अइल ओ पापह हटाइक लाग अपन्हे बलिदान हुइल। 27जसहँक यी बात निश्चित बा, कि मनै एक फ्यारा मुठ ओ वाकरपाछ न्याय हुइठा, 28ओसहँक ख्रीष्ट फे धेर जन्हक पाप उठाइक लाग एक्क फ्यारा बलिदान हुइल। उहाँ द्वासर फ्यारा अउइयाबाट, उ ब्याला पाप उठाइक लाग नाही, तर उहाँह अश्या लाग्क बैठुइयन मुक्ति देहक लाग अउइयाबाट।#यशै ५३:१२
Zur Zeit ausgewählt:
हिब्रू 9: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
