हिब्रू 5
5
1हरेक प्रधान पूजारी परमेश्वरक आघ मनैन्हक प्रतिनिधित्व करक लाग रोजगैल् मनैया हुइट। ऊ मनैन्हक तर्फसे परमेश्वरकठे पापबलि ओ और भेटी चह्राइक लाग नियुक्त कैजैठ। 2अज्ञानी मनैन् ओ गलत डगरिम जैना मनैन ऊ नम्र होक सम्झाइसेक्ठ काकरकि ऊ अपन्हे फे कमजोर मनै जो हुइट। 3उहओर्से और मनैन्हक लाग पापबलि चह्राइबेर ऊ आपन लाग फे पापबलि चह्रैना हुँकहीन कर लग्ठन।#लेवी ९:७
4प्रधान पूजारी हुइना सम्मान कुई फे अपन्हे लिह नैस्याकट। यी बात त हारूनह परमेश्वर बलाइलअस उहाँद्वारा बलागैलसे केल हुइठा।#प्रस २८:१ 5ख्रीष्ट फे प्रधान पूजारी हुइना सम्मान अपन्हे लेलक नैहुइट। उहाँह त परमेश्वर रोज्क कल,
“टुँ म्वार छावा हुइटो,
आज मै टुँहार बाबा हुइनु।”#भज २:७
6और ठाउँम परमेश्वर असिक कल,
“टुँ मल्कीसेदेकअस
सड्डभरिक लाग पूजारी हुइटो।”#भज ११०:४
7येशू आपन शारीरिक जीवनम रहलब्याला मुवलमसे बचाइ सेक्ना परमेश्वरह कर्रसे प्रार्थना कर्ल ओ रो-रोक बिन्ती चह्रैल। उहाँक नम्रता ओ भक्तिक कारणले जो परमेश्वर उहाँक प्रार्थना सुन्ल।#मत्ती २६:३६-४६; मर्क १४:३२-४२; लूक २२:३९-४६ 8उहाँ परमेश्वरक छावा रलसे फे आपन भ्वागल दुःखकष्टमसे उहाँ परमेश्वरक आज्ञापालन कर सिक्ख्ल। 9असिक परमेश्वर उहाँह पूरा सिद्ध ठहरैल ओ उहाँक आज्ञापालन करुइयन्हक लाग उहाँ अनन्तकालिन मुक्तिक स्रोत हुइल। 10ओ परमेश्वर जो उहाँह मल्कीसेदेकअस प्रधान पूजारी नियुक्त कर्ल।
पतनमसे बच्ना चेताउनी
11याकर बारेम टुँहन कहपर्ना बात त धेर बा, तर टुँहन बुझैना भर गाह्रो बा, काकरकि टुन्हक बुझ्ना क्षमता कमजोर बा। 12आम्हीसम त टुह्र औरजहन सिखाइ सेक्ना होजाइपर्ना रह, तर आम्ही परमेश्वरक वचनक बारेम आधारभूत बात समेत टुँहन और जन सिखाइपरल बा। टनिक हिरगर भोजन खाइक सटाहा टुह्र अपन्हे डाईक दूध पिना लर्काअस बाटो। 13डाईक दूध केल पिउइया त लर्कहे हो। असल ओ खराब बातक ज्ञान वाकरम नैरटस।#१ कोर ३:२ 14तर हिरगर भोजन खउइया त परिपक्व मनैया हो। ऊ त बुद्धि लगाक अभ्यासद्वारा असल ओ खराब बात अल्गाइ सेक्ना क्षमता रहल मनैया हो।
Zur Zeit ausgewählt:
हिब्रू 5: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.