गलाती 3
3
विश्वास वा व्यवस्था पालन
1टुह्र गलातीहुँक्र कसिन अबुझअस बाटो। येशू ख्रीष्ट क्रूसम टङ्गावापाइल बात टुन्हक आँखिक आघ स्पष्ट रूपले वयान कैगिल् रह। टुँहन के मोहनी लगाइल? 2मै एकठो बात टुँहन पुछ चाहटुँ, टुह्र पवित्र आत्मा कसिक पैलो? का व्यवस्थम लिखल बात मान्क पैलो, कि खुशीक खबरम विश्वास कैक पैलो? 3का टुह्र अत्रा अबुझ बाटो? टुह्र परमेश्वरक आत्मम सुरु होक, आब काजे आपन बलले सिद्ध हुई चाहटो? 4का अत्रा दुःख टुह्र बेकारम भोग्लो त? नाहीँ, ओसिन नैहो। 5परमेश्वर पवित्र आत्मा देक टुन्हक माझम अचम्मक काम कर्ल। यी काम टुह्र खुशीक खबरम विश्वास कैक हुइलहा, कि व्यवस्था मान्क हुइलहा?
6अब्राहामह हेरो ना, “ऊ परमेश्वरम विश्वास कर्ल, ओ परमेश्वर हुँकहीन धर्मी ठह्रैल।”#उत १५:६; रोम ४:३ 7उहओर्से विश्वास करुइयन अब्राहामक सन्तान हुइट कना बात टुह्र जानल रहपर्ठा।#रोम ४:१६ 8और जातिक मनै फे विश्वासद्वारा परमेश्वरक सामुन्नेम धर्मी ठह्राजैठ कना बात धर्मशास्त्रम लिखल रह। अब्राहामह खुशीक खबर आघहेँ सुनागैल्, “टैँ मार्फत पृथ्वीमक सब जातिक मनै परमेश्वरक आशिष पैहीँ।”#उत १२:३ 9उहओर्से विश्वास कर्ना मनै अब्राहामकसँग आशिष पारख्ल।
10धर्मशास्त्रम असिक लिखल बा, “व्यवस्थम लिखल सब बात पूरा हिसाबले नैमन्ना मनैन्हकम सराप पर्ठा।” उहओर्से परमेश्वरक नजरम धर्मी ठह्रक लाग व्यवस्था मनुइयन सरापम बाट।#व्य २७:२६ 11व्यवस्था मान्क परमेश्वरक नजरम कुई फे धर्मी नैठह्रट्, काकरकि धर्मशास्त्रम असिक लिखल बा, “विश्वासद्वारा धर्मी ठह्रागैल् मनै जो जीवन पैठ।”#हब २:४ 12व्यवस्था त विश्वासक बात नैहो। तर धर्मशास्त्रम लिखल बा, “व्यवस्था पालन करुइया उह हिसाबले जिउइयाबा।”#लेवी १८:५ 13धर्मशास्त्रम लिखल बा, “कट्ठोम टङ्गावा पैना मनैयकम सराप परल रठस।” उहओर्से ख्रीष्ट त हमार लाग सराप बन्क व्यवस्थक सरापमसे हमन म्वाल तिर्क छुट्कारा देरख्ल।#व्य २१:२३ 14उहओर्से अब्राहामह देगैल् आशिष ख्रीष्ट येशूद्वारा और जातिक मनै पैठ ओ परमेश्वरक प्रतिज्ञा करल पवित्र आत्मा हम्र विश्वासद्वारा पाइसेक्ठी।
व्यवस्था ओ प्रतिज्ञा
15भैयौ, दिनदिनक जीवनमसे एकठो उदाहरण हेरी, दुई जन मनै कौनो बाचम सहीछाप कर्ल कलसे उहिँम कुछु फे थपघट कर नैसेक्जाइट्। 16यिहाँ फे परमेश्वर अब्राहामह एकठो केल सन्तानक प्रतिज्ञा कर्ल। धेर सन्तानक बात नैहो, एकठो केल सन्तान कना बात बुझ्जैठा। एकठो सन्तान केल कलक ख्रीष्ट हुइट।#उत १२:७ 17म्वार कहख्वाजल बात का हो कलसे, परमेश्वर आपन प्रतिज्ञा करल बाचम सहीछाप कैसेक्ल। तर चार सय तीस वर्ष पाछ अइलक व्यवस्था परमेश्वरक करल सहीछापह मेटाक उहाँक प्रतिज्ञा खारेज कर नैस्याकट्।#प्रस १२:४० 18परमेश्वर देहम कहल हक व्यवस्था पालन कैक पाजैना हो कलसे, उ त प्रतिज्ञा नैहुइल्। तर यी त परमेश्वर प्रतिज्ञा कैक अब्राहामह देरख्ल।#रोम ४:१४
19आब ओसिन हो कलसे व्यवस्था काजे देगैल् त? पाप चिन्हाइक लाग देगैल् ओ प्रतिज्ञा करल अब्राहामक सन्तान नैआइट्सम याकर आवश्यक परल। परमेश्वर कुछ स्वर्गदूत मार्फत व्यवस्था मोशह देल, ऊ परमेश्वर ओ मनैन्हक बीचम मध्यस्थकर्ता रलह। 20तर परमेश्वर अब्राहामह प्रतिज्ञा करबेर अपन्हे प्रतिज्ञा कर्ल। उ ब्याला कौनो मध्यस्थकर्तक आवश्यक नैपरल।
21ओसिन हो कलसे, का व्यवस्था परमेश्वरक प्रतिज्ञक विरोधी हो? अहँ, ओसिन नैहो। यदि व्यवस्था मनैन जीवन देह स्याकट् कलसे, व्यवस्था जो मनैन परमेश्वरक सामुन्नेम धर्मी ठह्रैनेरह। 22येशू ख्रीष्टम विश्वास करल मनै प्रतिज्ञा करल आशिष विश्वास करुइयन जो पैहीँ कैक सारा संसार पापक कैदम परल बात धर्मशास्त्र देखैठा।
23ख्रीष्टम विश्वास कर्ना बात प्रकट नैहुइट्सम हम्र व्यवस्थक अधीनम रलही ओ व्यवस्था जो हमार हेरविचार कर्टीरह। 24विश्वासद्वारा हम्र धर्मी ठह्राजाइसेकी कैक ख्रीष्ट अइनासे आघ व्यवस्था हमन ख्रीष्टसम लैजाइक लाग हमार अभिभावकअस हुइल्। 25तर आब विश्वास आसेक्लकओर्से हमन उ अभिभावकक् आवश्यक नैहो।
परमेश्वरक सन्तान
26आब विश्वासद्वारा ख्रीष्ट येशूम टुह्र सबजन परमेश्वरक सन्तान होरलो। 27ख्रीष्टम भरोसा कैक बप्तिस्मा लेहल मनैया त लौव लुगा पहिरलअस ख्रीष्टक गुण जो पहिरराखल। 28उहओर्से ख्रीष्ट येशूम रहल यहूदी, और जाति, कमारा, फुक्का, पुरुष ओ महिलन्हक बीचम कुछु भिन्नता नैहो, टुह्र सब एक्क हुइटो। 29टुह्र ख्रीष्टक हुइटो कलसे अब्राहामक सन्तान हुइटो। परमेश्वरक प्रतिज्ञा करल धनक हकवाला फे हुइटो।#रोम ४:१३
Zur Zeit ausgewählt:
गलाती 3: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
