एफिसी 6

डाई-बाबा ओ छाई-छावा

1टुह्र छाई-छावन, आपन डाई-बाबक कहल मानो, काकरकि यी परमेश्‍वरह मनपर्ना बात हो।#कल ३:२० 2“आपन डाई-बाबक आदर करो।” परमेश्‍वरक प्रतिज्ञासमेत देहल यी पैल्‍ह आज्ञा हो। 3ओसिक कर्बो कलसे टुन्‍हक भलाइ हुइनेबा ओ पृथ्‍वीम टुह्र धेर दिन बच्‍बो।#प्रस २०:१२; व्‍य ५:१६

4टुह्र बाबहुँक्र, आपन छाई-छावन रिस जिन उठाओ, तर हुँकन प्रभुक अनुशासन ओ शिक्षम हुर्काओ।#कल ३:२१

कमारा ओ मालिक

5टुह्र कमाराहुँक्र, ख्रीष्‍टक सेवा करलअस इमानदार हिसाबले यी संसारम रहल आपन मालिकन्‍हक आदर करो ओ हुँकन्‍हक कहल मानो। 6मनैन खुशी पर्ना हिसाबले हुँकन्‍हक आँखिक आघ केल देखावटी काम जिन करो, तर परमेश्‍वरक इच्‍छा अनुसार ख्रीष्‍टक कमाराअस पूरा दिलोज्‍यानले काम करो। 7मनैन्‍हक सेवा करअस नाहीँ तर प्रभुक सेवा करअस खुशीले काम करो। 8कुई कमारा रलसे फे या नैरलसे फे असल काम कर्ना सबजहन प्रभु इनाम देहुइयाबाट, यी बात टुह्र बुझपर्ठा।#कल ३:२२-२५

9टुह्र मालिकहुँक्र, ओसहेँक आपन कमाराहुँकन मजा व्‍यवहार करो ओ हुँकन धम्‍की जिन देओ काकरकि टुन्‍हक ओ हुँकन्‍हक एक्‍कठो मालिक स्‍वर्गम बाट। उहाँ न्याय करबेर केक्रो पक्षपात नैकर्ट।#व्‍य १०:१७; कल ३:२५; ४:१

परमेश्‍वरक हातहतियार

10अन्‍तिमम, टुह्र प्रभुम ओ उहाँक महान शक्तिक सामर्थ्‍यम बलगर हुइटीजाओ। 11शैतानक बनाइल योजनक विरुद्धम स्‍थिर रहक लाग परमेश्‍वरक सारा हातहतियार भिरो। 12हमार लडाइँ मनैन्‍हक विरोधम नैहो, तर वर्तमान अन्‍धकार संसारक शासकहुँकन्‍हक विरोधम, अधिकारीन्‍हक विरोधम, शक्तिक विरोधम, ओ स्‍वर्गीय स्‍थानम रना दुष्‍ट आत्‍माहुँकन्‍हक विरोधम हो। 13उहओर्से परमेश्‍वरक सारा हातहतियार भिरो। तब टुह्र खराब दिनम दुष्‍ट शक्तिह र्‍वाक सेक्‍बो, ओ अन्‍तिमसम फे स्‍थिर पलरबो।

14उहओर्से लडाइँ करक लाग तयार रहो। सत्‍य बातह पेटीअसक बान्‍धो, छाती जोगाइक लाग धार्मिकताले बनल छातीपाता लगाओ।#यशै ११:५; ५९:१७ 15शान्‍ति देना खुशीक खबरह जुत्ताअसक लगाक तयार होओ।#यशै ५२:७ 16विश्‍वासह आपन रक्षा कर्ना ढालअसक उठाओ। तब टुह्र दुष्‍टसे अइना अग्‍निवाण बुटाइ सेक्‍बो। 17मुक्तिह शिर जोगैना टोपअसक लगाओ। पवित्र आत्‍मक देहल परमेश्‍वरक वचनह तरवालअसक भिर्लरहो।#यशै ५९:१७ 18सब समयम पवित्र आत्‍मक शक्तिम प्रार्थना करो। परमेश्‍वरसे सहायता मागो। होसियार ओ लगनशील होक सब पवित्र जनहुँकन्‍हक लाग लगातार प्रार्थना कर्टिरहो।

19म्‍वार लाग फे प्रार्थना कैदेओ ओ मै ब्‍वालबेर परमेश्‍वरक वचन पाइसेकू। मै वचन बोल्‍ना साहस पाइसेकुँ ओ खुशीक खबरक रहस्‍य औरजहन बुझाइ सेकू। 20यिह खुशीक खबरक लाग मै प्रेरित बनागैनहुँ। प्रार्थना कैदेओ ओ मै कैदी रलसे फे जसिक ब्‍वालपर्ना हो, ओसहेँक साहससे बोल्‍टिरह सेकू।

अन्‍तिम बात

21हमार प्रिय भैया ओ प्रभुक विश्‍वासयोग्य सेवक तुखिकस म्‍वार सब हालखबर टुँहन बट्‌वादेहीँ।#प्रे २०:४; २ तिमो ४:१२ 22हम्र का काम कर्टिबाटी, उ सुन्‍क टुह्र फे साहस पाइसेक्‍बो कैक मै हुँकहीन टुन्‍हकठे पठैनहुँ।#कल ४:७-८

23सब विश्‍वासी दादुभाइहुँकन परमेश्‍वर बाबा ओ प्रभु येशू ख्रीष्‍ट शान्‍ति, प्रेम ओ विश्‍वास देहीँ। 24प्रभु येशू ख्रीष्‍टह पवित्र प्रेम कर्ना सबजहन परमेश्‍वर अनुग्रह देहीँ।

Zur Zeit ausgewählt:

एफिसी 6: thl

Markierung

Kopieren

Vergleichen