१ कोरिन्थी 8
8
मूर्तिह चह्राइल खैना चिज
1आब मूर्तिह चह्राइल खैना चिजिक बारेम हेरी: हमन थाहाँ बा, कि यी विषयम हम्र सबजन्हकठे ज्ञान बा। तर ज्ञानले मनम घमण्ड अनैठा, ओ प्रेमले मण्डलीम उन्नति करैठा। 2यदि कौनो मनैया “मै जन्ठुँ” कठा कलसे, ऊ वास्तवम जानपर्ना बात जन्ल नैरहट्। 3तर परमेश्वरह प्रेम करुइयह परमेश्वर चिह्न्ठ।
4मूर्तिह चह्राइल खैना चिजिक बारेम बट्वाइबेर, संसारम मूर्ति कुछु फे नैहो, ओ परमेश्वर एक्कठो केल बाट कना बात हमन थाहाँ बा। 5मनै का कठ कलसे स्वर्ग या पृथ्वीम धेर देवीदिउँताओँ बाट। हो, हुँकन मनै देवीदिउँताओँ ओ प्रभुहुँक्र कठ। 6तर हमार लाग त एक्कठो परमेश्वर बाबा बाट। उहाँ जो सब चिजिक सृष्टि कर्लह। उहाँक लाग हम्र जिठी। हमार लाग एक्कठो प्रभु, येशू ख्रीष्ट बाट। उहाँद्वारा सब चिजिक सृष्टि हुइल्, ओ उहाँद्वारा हम्र जिठी।
7तर सबजन त यी बात नैजन्ट। कौनो-कौनो मनैन्हक आघ मूर्तिपूजा कर्ना बानी परल हुइलकओर्से, हुँकन आम्ही फे ओसिन खाना खैलसे मूर्तिह चह्राइल खाना खाइटुँ जसिन लग्ठन। हुँकन्हक विवेक कमजोर हुइलकओर्से उ खाना खैलसे “मै अशुद्ध होगैनु” जसिन लग्ठन। 8हुइना त खैना चिज हमन परमेश्वरक लग्घ लैजैना बात नैहो। निखैलसे कुछु हानि फे नैहुइट्, खैलसे कुछु मिल्ना फे नैहो।
9तर होस करो, स्वतन्त्र हिसाबले टुन्हक करल कामले कमजोर विवेक रहल मनैन पापम फँसाइ नैपरट्। 10यदि कौनो कमजोर विवेक रहल विश्वासी जानलबुझल मनैयह मन्दिरम मूर्तिपूजा करल खाना खाइट् द्याखल कलसे, ऊ मूर्तिह चह्राइल खैना चिज खाइक लाग आँट नैकरी का? 11असिक कमजोर विश्वासी टुँहार ज्ञानक कारणले नाश हुइठा। तर वाकर लाग फे त ख्रीष्ट आपन प्राण देलह। 12असिक कमजोर विवेक रहल विश्वासीन धक्का पुगाक करल पाप त ख्रीष्टक विरोधम करल पाप होगैल् नि। 13उहओर्से यदि खैना चिजले म्वार विश्वासी भैयह नाश करैठा कलसे, मै कबु फे शिकार नैखैम, काकरकि मै और विश्वासीह धक्का पुगाइ नैचहटुँ।
Zur Zeit ausgewählt:
१ कोरिन्थी 8: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
