Zefaniya 3
3
Zyacinyonyoono ca Jelusalemu akunununwa
1Maawe kumunzi wabasikudyaminina, munzi uuzanga uulisofweede! 2Taakwe ngouswiilila, tuuyandi kululamikwa. Tuusyomi mu Mwami Leza, tuukumbili Leza kuti augwasye. 3Balupati-pati bawo mbaasyuumbwa bavuluma, beendelezi bawo mbaaumpe baubide, balida limwi cakuti taakwe cisyaala kuti bazoolye bwaca. 4Basinsimi bawo mbaasilutuzi, mmbantu baunina. Bapaizi bawo basofwaazya busena busalala, balatyola milawo. 5Nikuba boobo Mwami Leza mwacili mulinguwo, ulacita ziluleme, taakwe ncalubizya. Cifumo-fumo cili coonse ulatondezya bululami bwakwe, buzuba abuzuba taleki pe, nikuba boobo bataluleme tabalisendi pe.
6“Ndakanyonyoona misyobo, mayubilo aabo mayumu ndakaamwayaula. Ndakasiya migwagwa yabo kiisyeede buyo mbuboobu, taakwe muntu naba omwe uuinda mulinjiyo. Minzi yabo ilinyonyweedwe. Taakwe naba omwe uusyeede, taakwe pe. 7Ndakaambila munzi kuti, ‘Kasimpe uyoondiyoowa mane kusikila ukazumine kululamikwa!’ Nkaako bacili kuyandisya kucita zibi muli zyoonse nzibakali kucita.
8“Ono amulindile, ‘Mbwaamba Mwami Leza,’ buzuba mbwenjooima kupa bumboni! Ndayeeya kuti ndibunganye misyobo, ndiyobolole bantu bamumalelo, ndibatilile bukali bwangu, kulutila kwangu koonse. Nyika yoonse iyoosyukutwa akaambo kabukali bwangu buyaka mbuli mulilo.
9“Eelyo ndiyoocita kuti bantu boonse bakakombe ndime nde Mwami Leza bweelede, akuti bakandikutaukile milimo iili yoonse amoyo omwe. 10Kuzwa mutala lyamilonga yaku Kusyi, bantu bangu bandikomba, bantu bangu bamwaikide bayoondiletela zituuzyo. 11Mubuzuba oobo tamukausigwi nsoni pe, akaambo kazibi zyoonse nzimwakandicitila nkaambo njoogwisya bangu aabo basekelela caku lisumpula mumunzi ooyu. Tamukalisumpuli limbi mucilundu cangu cisalala. 12Pele mukati kamunzi ooyo ndiyoosiya aabo batete myoyo balibombya, basyoma muzina lya Mwami Leza. 13Bantu ba Isilayeli basyeede tabakabisyi, tabakaambi zyaku beja, takukajanwi lucengo mulimbabo. Bayoolya akulyoonena, taakwe uuyoobayoosya pe.”
Lwiimbo lwakutangala
14Koimba omunzi wa Ziyoni, koompolola O Isilayeli!
Tangala usekelele amoyo wako woonse, omunzi wa Jelusalemu!
15Mwami Leza waleka kukusubula, wakutandila sinkondonyoko. Mwami Leza,
Mwami wa Isilayeli, ulaanduwe, taakwe noyooyoowa cikucisa alimwi.
16Mubuzuba oobo bayooambila Jelusalemu kuti,
“Utayoowi omunzi wa Ziyoni, maboko aako atagonkelwi pe.
17Mwami Leza wako ulaanduwe, ngusinguzu uukonzya kuvuna.
Uyookondwa kapati mulinduwe,
uyookuumbulizya aluyando lwako,
uyoosekelela akaambo kanduwe mukwiimba nyimbo.
18Njoomugwisizya mapenzi ngomwali kujana muciindi cama pobwe aabikidwe,
aali kumukatazya akumuletela masampu.
19Ciindi eeco ndiyoobacita boonse aabo bali kumudyaminina, ndiyoovuna balema,
akuyobolola baabo bakamwaikide.
Ndiyoocita kuti bakatembaulwe akulemekwa muzisi zyoonse oomo mubakali kuusigwa nsoni.
20Ciindi eeco ndiyoomuyobolola, ciindi eeco ndiyoomuleta kumunzi.
Ndiyoocita kuti mukalemekwe akutembaulwa akati kabantu boonse bamunyika,
ndaakumupilusizya coolwe canu, anywebo kamuyoobwene buya,” mbwaamba Mwami Leza.
Zur Zeit ausgewählt:
Zefaniya 3: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.