Mika 2
2
Miyeeyo yamuntu aya Leza
1Maawe kuli baabo bayeeya zibi, kuli baabo bakanza zibi nobalede! Bwaca balacicita, nkaambo balakonzya kucicita eeco. 2Balanyomenena myuunda akwiitola, batolelezya amaanda. Balapenzya muntu amukwasyi wakwe, balakatazya muntu akaambo kalukono lwakwe.
3Nkaako Mwami Leza ulati, “Ndiyeeya kupenzya bantu aaba, tabakookonzya kulivuna pe. Tamuciyooendi cakulisumpula, nkaambo ciyooba ciindi camapenzi. 4Mubuzuba oobo bantu bayoomusampaula, bayoomupenzya alwiimbo lwakulila oolu,
‘Twanyonyweedwa limwi, mbono zyabantu bangu zyaapaulwa.
Wandinyanga! Waaba myuunda yesu kubantu babi.’”
5Nkaako takukooba muntu naba omwe mumbungano ya Mwami Leza uutikaapaule nyika kwiindila mukuuma cisolo.
Basinsimi babeji
6Basinsimi baamba kuti, “Utasinsimi pe, utasinsimi akaambo kazintu eezi, mapenzi taakatusikili.” 7Sena kwaambwe boobo omusyobo wa Jakobo, “Sena Muuya wa Mwami Leza ulinyemede? Sena nguucita zintu zili boobu? Sena majwi aangu taaleti bubotu kumuntu uulaanzila ziluleme?”
8Pele lino bantu bangu bazanga, mbuli basinkondoma. Munyanga bantu zisani zibotu kuzwa kuli baabo bainda cakutacenjela, bali mbuli bantu bapiluka kuzwa kunkondo. 9Mutanda bakaintu babantu bangu kuzwa mumaanda aabo mabotu. Mulanyanga bana babo zileleko zyangu mane kukabe kutamani. 10Amunyamuke, muzwe! Nkaambo oobu tabuli busena bwanu bwakulyookezezya, mukuti bulisofweede. Bwanyonyoonwa cakuti taakwe nobunga bwabambululwa.
11Kuti naa mubeji, mucengi waboola akwaamba kuti, “Ndili mukambausi wakuti mube awaini munji abukoko, ooyo ngomukambausi alikke bantu ngobayanda.”
Mbubakasyomezegwa kuvunwa
12Leza ulati, “Kasimpe njoomuyobolola nyoonse nobantu ba Jakobo, kasimpe ndiyoobaleta antoomwe bantu ba Isilayeli basyeede. Ndiyoobaboozya mbuli mbelele mucimpati, mbuli butanga kuzwa kumacelelo aabo, busena buyoozula makamu aabantu.” 13Ooyo uuyoopola uyoobasolweda, bayooinda mumilyango yamunzi akuzwida anze. Mwami walo uyooendela kumbele lyabo, Mwami Leza nguuyoobasolweda.
Zur Zeit ausgewählt:
Mika 2: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.