ମାତିଉ 28
28
ଜିସୁଦି ଡ଼େସି ନିଙ୍ଗିଁକା
(ମାର୍କ ୧୬:୧-୧୦; ଲୁକ ୨୪:୧-୧୨; ଜୋହନ ୨୦:୧-୧୦)
1ରମ୍ନିଦିନ୍ ୱିଜିତି ୱେନ୍କା ଆଦିୱାର୍ ସାଲ୍ଦି ମଗ୍ଦଲିନି ମରିୟମ୍ ମାରି ଆଇ ମରିୟମ୍ ଦୁକିଦୁ ସୁଡ଼୍ଦେଙ୍ଗ୍ ସର୍ହେ । 2ନାସ୍ତିୱାଲେ ଆୟାଦାପ୍ରେନେ ଉଣ୍ତ୍ରି ପେରି ବୁମି ତିରିଗ୍ନାତ୍ ଆତାତ୍ । ପ୍ରବୁଦି ଅରେତ୍ ଦୁତ୍ ମୁସ୍କୁରାନ୍ ରେତାଜି ୱାଜି ଦୁକିଦି ମକମି ମାର୍ଇ କାଲୁଦିଙ୍ଗ୍ ଗୁସା କିଜି ତାନି ମୁସ୍କୁ ବାସ୍ତାତ୍ । 3ତାନି ରୁପ୍ ଜାୟ୍ତି ୱାଜା ମାରି ତାନି ଆଙ୍ଗିଁ ଆଣ୍ତ୍ରାଗା ୱାଜା ଅଡ଼ିନିକା ମାର୍ହାତ୍ । 4ୱାନିଙ୍ଗ୍ ସୁଡ଼୍ଜି କାପ୍କିନିକାର୍ ତିଲାଜି ତିର୍ଗିତାର୍ ମାରି ସାତି ମାଡ଼ାଦି ୱାଜା ଆତା ସର୍ହାର୍ ।
5ଦୁତ୍ ଆୟା ଆଇମେକାଙ୍ଗ୍ଁ ଇର୍ହାତ୍, “ତିଲାମାଟ୍ ।” ନାନ୍ ନେସ୍ନା, ମିର୍ କ୍ରୁସଦୁ ଡାକାଇଆତି ଜିସୁଙ୍ଗୁଁ ସୁଡ଼୍ଦେଙ୍ଗ୍ ୱାତିମାନିଦେର୍ । 6ୱାନ୍ ଇବେ ସିଲେନ୍, ୱାନ୍ ଏଣ୍ତେସ୍ ଇର୍ହାମାର୍ହାନ୍, ଆୟାୱାଜା ନିଙ୍ଗିଁତାମାନାନ୍ । ରାଦୁ, ୱାନି ସାତିମାଡ଼ା ଏମେମାନୁ ଇଟ୍ତାମାର୍ହାନ୍, ଆୟା ବାଡି ସୁଡ଼୍ଦୁ । 7ଦାପ୍ରେ ସଲ୍ସି ୱାନି ସିସୁରିଙ୍ଗ୍ ଇନ୍ଡ୍ରୁ, ୱାନ୍ ସାତିମାଣାନ୍ ଡ଼େସି ନିଙ୍ଗିଁତାମାନାନ୍ ମାରି ମି ଆଗ୍ଡ଼ି ଆଗ୍ଡ଼ି ୱାନ୍ ଗାଲିଲିଦୁ ସଲ୍ସିନାନ୍ । ଆବେ ମିର୍ ୱାନିଙ୍ଗ୍ ସୁଣିଦେର୍ । ନାନ୍ ଆମାକା ଇର୍ଆ, ମୋନ୍ତୁ ଇଡ୍ଦୁ ।
8ଇବେଟ୍ ୱାକ୍ ତିଲାଜି ନି ନାଣ୍ତ ୱେଡ଼ିକାଦାନ୍ ଦୁକିଦାନ୍ ଦାପ୍ରେ ଡ଼େସି ସଲ୍ସି ୱାନି ସିସୁରିଙ୍ଗ୍ କାବୁର୍ ସିଦେଙ୍ଗ୍ଇଜି ଉର୍କୁତେ ।
9ଦାପ୍ରେ ଜିସୁ ୱାରିଙ୍ଗ୍ ବେଟ୍ବୁଡ଼ାଜି ଇର୍ହାନ୍, “ମି ସାନ୍ତିଆପିତ୍ ।” ୱାର୍ ୱାନି ଲାକ୍ତୁ ସଲ୍ସି ୱାନି ପାଦାମ୍କୁ ଆସ୍ସି ମାଡ଼ିସ୍କିତାର୍ । 10ଜିସୁ ୱାରିଙ୍ଗ୍ ଇର୍ହାନ୍, “ତିଲାମାଟ୍ ।” ମିର୍ “ସଲ୍ସି ନା ତଡ଼ାନ୍କାଙ୍ଗ୍ ୱେର୍ଆ, ୱାର୍ ଗାଲିଲିଦୁ ସଲିର୍, ଆବେ ୱାର୍ ନାଙ୍ଗିଁ ସୁଣାର୍ ।”
କାପ୍କିନିୱାରି ମାଟା
11ଆଇମେକ୍ ଆବେଟ୍କୁ ବୁଲାଜି ସୋଲ୍ସିମାନିୱାଲେ ମୁସ୍ତିଗୁଟାଦିଙ୍ଗ୍ କାପ୍କିଜି ତେବାଜିମାର୍ଇ ଏସଲୋକ୍ କାପ୍କିନିକାର୍ ଗାଡ଼୍ତୁ ଡ଼େସିସୋର୍ହାନ୍ନୋ ପେରି ଜାଜକରିଙ୍ଗ୍ ଇୟାୱିଜୁ ଗଟ୍ନା ୱେର୍ତାର୍ । 12ପେରି ଜାଜକର୍ ଦାର୍ମୁ ନେତାରି ୱାଲେ ୱାର୍ଗିଜି ସାତାର୍, ଆୟା ସନ୍ୟରିଙ୍ଗ୍ ଗାଦି ଡାବୁଙ୍ଗୁଁ ଲାଞ୍ଚ୍ ସିଜି ୱାରିଙ୍ଗ୍ ଇର୍ହାର୍, 13“ମିର୍ ୱେର୍ତୁ ଜେ ନାଡ଼ା ମିର୍ ସୁସ୍ତିମାରିଇବେଡ଼ାଦୁ ୱାନି ସିସୁର୍ ୱାଜି ମାଡ଼ାଦିଙ୍ଗ୍ ଡଙ୍ଗାଁକିତାଅତାର୍ । 14ମାରି, ଜଦି ସାସନ୍କିନିକାନ୍ ଇୟା ମାଟା ୱେନ୍ନାନ୍ ମାପ୍ ୱାନିଙ୍ଗ୍ ବୁଜାକିନାସିନାପ୍ଜେ ମିର୍ ଦସ୍କିଇଦେର୍ । ଇୟା ବିସୟ୍ତାନ୍ ମିର୍ ଦାନ୍ଦାଆମାଟ୍ ।”
15ସନ୍ୟର୍ ଡାବୁଙ୍ଗୁଁ ଅସି ୱାରିଙ୍ଗ୍ ୱେର୍ତିମାନି ଇସାବ୍ତାନ୍ ପାଣି କିତାର୍ । ୱାର୍ ନାସ୍ତିୱାଲେ ଆମାକା ଇର୍ହାର୍, ଜିହୁଦିର୍ ନେର୍ ସାନ୍ଦି ଆୟା ମାଟା ୱେର୍ସିନାର୍ ।
ସିସୁରିଙ୍ଗ୍ ଜିସୁ ତରାୟ୍ଆତାନ୍
(ମାର୍କ ୧୬:୧୪-୧୮; ଲୁକ ୨୪:୩୬-୪୯; ଜୋହନ ୨୦:୧୯-୨୩; ପ୍ରେରିତ ୧:୬-୮)
16ଜିସୁ ୱେର୍ତିମାନି ଇସାବ୍ତାନ୍ ଏଗାର୍ ଲୋକୁ ସିସୁର୍ ଗାଲିଲିଦୁ ସୋଲ୍ସି, ଜିସୁ ଆମା ଗରନ୍ ବିସୟ୍ ୱାରିଙ୍ଗ୍ ଇର୍ଆ ମାର୍ହାନ୍, ଆୟା ଗରନ୍ତୁ ସର୍ହାର୍ । 17ମାରି, ୱାର୍ ଜିସୁଙ୍ଗୁଁ ସୁଡ଼ୁଜି ମାଡ଼ିସ୍କିତାର୍, ମାତର୍ ଏନ୍ ଏନ୍ ନାମ୍ଏତାର୍ । 18ଜିସୁ ୱାରି ଲାକ୍ତୁ ୱାଜି ଇର୍ହାନ୍, “ମୁସ୍କୁପୁର୍ ନି ଆଡ୍ଗିପୁର୍ ୱିଜୁ ଅଦିକାର୍ ନାଙ୍ଗିଁ ସିଆୟ୍ଆତାମାନାତ୍ । 19#ପ୍ରେରିତ ୧:୮.ମିର୍ ୱିଜୁ ବାସାଦି ଲୋକା ଲାକ୍ତୁ ସୋଲ୍ସି ୱାରିଙ୍ଗ୍ ନା ସିସୁ କିଦୁ । ମାରି ବୁବା, ମାରିନ୍ ମାରି ପବିତ୍ର ଆତ୍ମାଦି ଦର୍ତାନ୍ ୱାରିଙ୍ଗ୍ ଡୁବନ୍ ସିଦୁ, 20ମାରି ନାନ୍ ଆମା ୱିଜୁ ଆଦେସ୍ ସିତାମାନା, ଆୟାୱିଜୁ କିଦେଙ୍ଗ୍ ୱାରିଙ୍ଗ୍ ସିକିୟା ସିଦୁ । ମାରି ମନେଇଡ଼୍ଦୁ, ଜୁଗ୍ସେସ୍ ଆନିସାନ୍ଦି ୱିଜୁୱାଲେ ନାନ୍ ମି ୱାଲେମାନା ।”
Zur Zeit ausgewählt:
ମାତିଉ 28: Koo25
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Konda Porja Bible © The Word for the World International and Konda Porja Translation Samithi, Dasamanthpur, Odisha 2025
