Mwanzo 2
2
1Ti nanna yiishisiweezo wumpiwa pinku na vathi na zooshi ziriimo. 2Nluku eeshiyeevo khaazi epile aari okholaaye, siikhu ya saapa khuvumula. 3Siikhu ethiito ya saapa, Nluku khuparikhiya na khuttakatthisa, mwaasa woovumula khwa khaazi zawe zooshi aakholiyeeyo za wumpa.
Nanna apuwiyeezo pinaatamu
4Eti hatiithi ya wumpiwa pinku na vathi.
Wakathi Nnyizinku Nluku ompiyeevo pinku na vathi, 5va tuniya khawaarivo hatha muutthi wala nyaani zaari zihinootthe, maana Nnyizinku Nluku aari ahinanyisele vuula vathi na khaarivo hatha ntthu woolima tuniya. 6Ila maati aari opuwa vathi khusala anaanisa tuniya yooshi. 7Aphano, Nnyizinku Nluku khumumpa pinaatamu khwa ottophe wa vathi. Khunvitelela mphula mwawe khumwinkha phuumu yoohaayi, pinaatamu khwiiya yumpe haayi.
8Nnyizinku Nluku khuzala woorotha nti wa Eeteni, phantte ya okhu lintthamuwaawo njuwa, khuntthaamo pinaatamu otule amumpiyeeyo. 9Nnyizinku Nluku khootthisa miitthi za wakhula nanna, zooshapweya woona na zootuva oja mishumo zaya. Vakatthi wa woorotha khuzalavo muutthi woohaayi, na muutthi onjuwisaaye yooshapweya na yootakhala.
10Nwoorotha wa Eeteni nttumpho waarimo muuttho waari okhuwaraaye woorotha opule; muuttho otthuupo khwaawanyeya khupuwavo nyuuttho mine. 11Wamwanzo oniitthiwa Pishoni, opo wazukulela nti wooshi wa Havila, ohali ziriiwo weero#2:11 Weero raku yaari wiittheliwa nzina la tahapu.. 12Weero za nti opo, pi zooshapweya na theenya awaakho mawe ootafikhana#2:12 Mawe apa a waara aari wiitthiwa Enookisi. na miitthi empuwaaye manlela oonukhela. 13Muuttho opu wa phiiri oniitthiwa Kihoni, ozukuleliyeeyo nti wooshi wa Kuushi. 14Muuttho opo wa ttaatthu, onviraaye phantte lintthamuwaawo njuwa ya nti wa Ashuuru, oniitthiwa Tiikiri. Opu wa nne Efwarati.
15Nnyizinku Nluku khunthuula pinaatamu otule khunttha nwoorotha wa Eeteni yoori asala alimela na wiinanela. 16Nnyizinku Nluku khunruma pinaatamu otule yoori: “Miitthi epi ziriiye nwoorotha mphu oje mishumo zaya woohiina hatha shaakha. 17Ila muutthi opo woojuwisa yooshapweya na yootakhala ohije; siikhu onttelaaye oja satakithu ontta ofwa.”
18Aphano Nnyizinku Nluku khuri: “Khahi yooshapweya pinaatamu wiiya otthwe, kintta omumpa pinaatamu wa wiiya nkhama ye asala ankhiza.” 19Paata ya Nnyizinku Nluku wumpa khwa ottophe wa vathi nyama zooshi za ntthuttu na anyannyi apa ootulu, zooshi khuntiisela pinaatamu#2:19 Pinaatamu nttakhuzi ntthi khwa luuka ya Meepereewu lina maana a nlume. yoori amoone nanna aari weettelaazo otthaja. Wakhula yumpe aari otthajaaye, nzina laya laari wiiya nttinttho. 20Pinaatamu khutthaja mazina mifuwo za vaje, anyannyi ootulu na nyama zooshi za ntthuttu. Ila khuhipuwivo hatha moote ya wiiya nkhama ye yaari weettelaaye onkhiza.
21Aphano, Nnyizinku Nluku khuntiisela Adamu#2:21 Adamu nzina lintaaye khwa nttakhuzi la Pinaatamu. osikizi wa waatta. Eettaka olala, khunlaza likhonkolo limote la pavu yawe, aphale vaya aalaziyeevo khuttiyavo na nyama. 22Khwa likhonkolo limote la pavu anlaziyeeyo Adamu, Nnyizinku Nluku khumumpa muukha, khumwinkha Adamu. 23Ye khuri:
“Ahee! Ntthi likhonkolo la likhonkolo laka
na nyama ya nyama yaka.
Nka eetthiwaka oriwa muukha,
maana alaziwa vamwiili wa nlume.”
24Tiito nlume oninlikha papaawe na mamaawe khukusanyeya na muukhaawe oowiiri khuretteya wiiya mwiili mmote. 25Oowiiri, Adamu na muukhaawe, aari wiiya waazu oohiina haaya.
Zur Zeit ausgewählt:
Mwanzo 2: eko
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.