ᐊᒃᓱᑕᔅ 17
17
ᓂᐱᔾ ᑲ ᐅᒋ ᐎᐎᔨᐱᒡ ᐊᓯᓂᒡ ᐅᒡ
Exodus 17.1-7 (Lent-3 Year A; Proper-21 Year A)
1ᒥᓯᐛ ᐃᔅᕋᐃᓪ ᐃᔪᒡ, ᓯᓐ ᐸᐧᑯᑎᔅᑭᒥᑲᒡ ᒋ ᐅᒋ ᔅᑐᑕᐅᒡ, ᐊᔭᑎᐊᑐᒐᒡ ᒧᔭᒻ ᑲ ᐃᑎᓱᒥᑯᒡ ᑎᐸᔨᒋᒐᓱᐛ᙮ ᐸᐃᒂᐤ ᕆᐱᑎᒻ ᒋ ᐎᒍᐅᒡ, ᒥᒄ ᓇᒪ ᐅᒋ ᑎᑯᓂᔪᐤ ᐊᓐᑕ ᓂᐱᔪᐤ ᒐᒋ ᒥᓂᒡ ᐃᔪᒡ᙮ 2ᐊᑯ ᐃᔪᒡ ᒂ ᐊᓏᔨᒪᒡ ᒧᓱᓴ ᐊ ᐃᑕᒡ, “ᐸᒋ ᒥᔨᓇᓐ ᓂᐱᔾ ᒐ ᒥᓂᔭᒡ᙮”
ᐊᑯ ᒧᓱᔅ ᐊᑕᑦ, “ᒐᒂᓐ ᐛᒋ ᐊᓏᔨᒥᔭᒄ ? ᒐᒂᓐ ᐛᒋ ᑯᒂᒐᐊᒄ ᑎᐸᔨᒋᒐᓱᐤ ?”
3ᒥᒄ ᒋᒋᐛ ᒋ ᓄᑕᔭᐸᒂᐅᒡ ᐃᔪᒡ ᑭᔭ ᒋ ᐊᓏᔨᒪᐅᒡ ᒧᓱᓴ᙮ ᒋ ᐃᑕᐅᒡ, “ᒐᒂᓐ ᐛᒋ ᐎᐎᑕᐃᔭᒡ ᐃᒋᑉᑎᒡ ᐅᒡ ᒐᒋ ᐃᑐᑐᐅᔭᒡ ᓂᔭᓐ ᑭᔭ ᓂᑦ ᐊᐛᓯᒥᓇᓐᒡ ᑭᔭ ᓂᑦ ᐊᐛᓯᓯᒥᓇᓐᒡ ᒐᒋ ᒋᒪᐸᒂᔭᒡ ?”
4ᐊᑯ ᒧᓱᔅ ᓇᑐᑎᒧᐛᑦ ᑎᐸᔨᒋᒐᓱᐛ, “ᒐᒂᔪᐤ ᒐ ᐃᑐᑐᐅᒂᐤ ᐅᒡ ᐃᔪᒡ ? ᓴᔅ ᐅᒡ ᒐᑲᑦ ᐊᔭᔅᑯᔪᐅᒡ ᒐᒋ ᓂᐸᐃᒡ ᐊᐱᒧᓯᓇᑕᐅᒡ ᐊᓯᓂᔭ᙮”
5ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᐅᑎᓂᒡ ᐱᔅᒐ ᐅᒋᒪᐅᒡ ᐃᔅᕋᐃᓪ ᐃᔪᒡ ᑭᔭ ᒐ ᒋᔅᒋᓄᑕᐃᑥᐤ ᐃᔪᒡ, ᐊᓯᒡ ᒐ ᑕᐧᑯᓂᒥᓐ ᒋᓯᔅᑲᐅᓐ ᐊᓐ ᑲ ᐊᐱᒋᑕᔨᓐ ᑲ ᐅᑕᒪᐸᑲᒥᓐ ᓇᐃᔭᓪ ᓯᐱᔾ᙮ 6ᐃᔅᐱ ᐅᑎᑎᒪᒂ ᐦᐅᕋᑉ ᐊᓯᓂᔾ ᐊᓐᑕ ᓴᐃᓇᐃ ᐱᔅᑯᑎᓇᒡ ᓂᑭ ᑕᓐ ᐊᓐᑕ ᐊ ᑕᔭᒄ᙮ ᒐ ᐅᑕᒪᒥᓐ ᐊᓯᓂᔾ ᐊᑯ ᓂᐱᔾ ᒐ ᐸᒋ ᐎᐎᐱᔨᒡ ᒐ ᒥᓂᒡ ᐃᔪᒡ,” ᐊᐅᑯᓐ ᑲ ᐃᑎᑦ ᒧᓱᔅ ᐊ ᑭᓄᐛᐱᒥᑯᑦ ᐃᔅᕋᐃᓪ ᐅᒋᒪᐅᒡ᙮ 7ᐊᑯ ᒪᓴ (ᑯᒂᒋᐃᐛᐅᓐ ᐊ ᐃᓇᓄᐅᒡ) ᑭᔭ ᒪᕆᐸ (ᐊᓏᔨᒐᓄᐅᓐ ᐊ ᐃᓇᓄᐅᒡ) ᒂ ᐃᓯᓂᐧᑲᑕᐧᒃ ᒧᓱᔅ ᐊᓂᔭ ᐃᑕᐅᓂᔪᐤ ᐛᔅ ᐊᒋ ᑯᒂᒐᐊᒡ ᐃᔅᕋᐃᓪ ᐃᔪᒡ ᑎᐸᔨᒋᒐᓱᐛ ᐊ ᐃᔅᒋᔄᒡ, “ᑕᐤ ᐊ ᑎᐸᔨᒋᒐᓱᐤ ᐊ ᑕᐛᐧᒄ ᑭᔭ ᒪᒃ ᓇᒪ ᑕᐤ ᐊ ?”
ᑲ ᐅᓂᑕᐅᒧᑎᔭᑭᓄᐅᒡ ᐊᒪᓕᒃ ᐃᔪᒡ
8ᐊᑯ ᐊᒪᓕᒃ ᐃᔪᒡ ᐅᑦ ᐊᓂᔅᑯᑕᐸᓄᐛᐛ ᒋ ᑎᑯᓯᓂᔪᐛ ᑭᔭ ᒂ ᒪᓯᐧᑯᐛᔨᒋ ᐊᓂᔭ ᐃᔅᕋᐃᓪ ᐃᔪᐛ ᐊᓐᑕ ᕆᐱᑎᒻ᙮ 9ᒧᓱᔅ ᒂ ᐃᑕᑦ ᐊᓂᔭ ᒐᓱᐛᔨᒋ, “ᒐ ᐅᑎᓂᑥᐤ ᓇᐸᐅᒡ ᒐᒋ ᔅᑐᑕᒡ ᑭᔭ ᒐᒋ ᒪᓯᐧᑯᐛᒡ ᐊᓂᔭ ᐊᒪᓕᒃ ᐃᔪᐛ᙮ ᐛᐸᓂᔨᒐ ᓂᑭ ᓂᐳᐅᓐ ᐊᓐᑕ ᑕᐧᑯᒡ ᐱᔅᑯᑎᓇᒡ, ᓂᑭ ᑕᐧᑯᓇᒺᓐ ᐊᓂᔭ ᒋᓴᒪᓂᑐᐤ ᐅᓯᔅᑲᐅᓐ ᑲ ᐃᔅᒋᔄᑦ ᒐᒋ ᑕᐧᑯᓂᒧᒡ᙮”
10ᐊᑯ ᒂ ᐃᑐᑕᐧᒃ ᒐᓱᐛ ᑲ ᐃᑎᑯᑦ ᒧᓱᓴ ᒐᒋ ᐃᑐᑕᐧᒃ᙮ ᒋ ᐅᑎᓇᐤ ᓇᐸᐛ ᒐ ᒪᓯᐧᑯᐛᔨᒋ ᐊᒪᓕᒃ ᐃᔪᐛ᙮ ᐊᑯ ᒪᒂᒡ ᐅᔭ ᐊᔅᐱᔨᒡ, ᒧᓱᔅ, ᐊᕋᓐ ᑭᔭ ᐦᐅᕐ ᒋ ᐃᑐᑕᐅᒡ ᐊᓐᑕ ᑕᐧᑯᒡ ᐱᔅᑯᑎᓇᒡ᙮ 11ᒋ ᑲᓂᔪᐎᒡ ᐊ ᓂᑐᐱᔨᒡ ᐃᔅᕋᐃᓪ ᐃᔪᒡ ᑕᑥᐤ ᐛᐱᓂᔅᒐᒋ ᒧᓱᔅ, ᒥᒄ ᐊ ᔭᓯᐱᑕᒋ ᐅᔅᐱᑐᓇ ᐊᒪᓕᒃ ᐃᔪᒡ ᒋ ᑲᓂᔪᐎᒡ᙮
12ᐊᑯ ᒧᓱᔅ ᒂ ᐊᔭᔅᑯᓯᑦ, ᐊᕋᓐ ᑭᔭ ᐦᐅᕐ ᒂ ᐃᑐᑐᐛᒡ ᐊᓯᓂᔪᐤ ᒧᓱᓴ ᒐᒋ ᑕᑎᐱᔨᒋ᙮ ᐊᑯ ᐊᔨᑐᐤ ᐛᒋᑲᐳᔅᑐᐛᒡ ᒧᓱᓴ ᑭᔭ ᑎᔭᐧᑯᓂᒧᐛᒡ ᐅᔅᐱᑐᓂᔨᐛ ᐃᔅᐱᔅ ᐛᑕᑯᓯᔨᒡ᙮ 13ᐊᑯ ᒐᓱᐛ ᑭᔭ ᐊᓂᔭ ᓇᐸᐛ ᑲ ᐎᒐᐅᑯᑦ ᒋ ᐅᓂᑕᒧᑎᔭᐅᒡ ᐊᒪᓕᒃ ᐃᔪᐛ᙮
14ᑎᐸᔨᒋᒐᓱᐤ ᒂ ᐃᑕᑦ ᒧᓱᓴ, “ᒐ ᒥᓯᓇᑕᒥᓐ ᐅ ᑲᒪᓯᐧᑲᑐᓇᓄᐅᒡ, ᑭᔭ ᒐ ᐃᔨᒥᑐᐅᑦ ᐅᔭ ᒐᓱᐛ ᐅᓴᒻ ᓂᑭ ᑐᑕᓐ ᒐᒋ ᐅᓂᒋᔅᒋᑐᐛᑭᓄᐅᒡ ᐊᒪᓕᒃ ᐃᔪᒡ᙮”
15ᒧᓱᔅ ᒂ ᐅᓯᑕᑦ ᐱᔅᑎᓂᒐᐅᓇᐱᔅᑯᔪᐤ ᑭᔭ “ᑎᐸᔨᒋᒐᓱᐤ ᓂᒋ ᒥᔨᒄ ᐱᔅᒋᔭᒐᐅᓂᔪᐤ᙮” ᒂ ᐃᓯᓂᐧᑲᑕᐧᒃ᙮ 16ᐊᑯ ᒧᓱᔅ ᒂ ᐃᔅᒋᔄᑦ, “ᑎᐸᔨᒋᒐᓱᐤ ᓂᒋ ᐊᔅᐸᔨᒧᑐᑐᐛᐤ, ᒥᒄ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ, ᑎᐸᔨᒋᒐᓱᐤ ᒋᑭ ᒪᓯᐧᑯᐛᐤ ᐊᒪᓕᒃ ᐃᔪᐛ ᒧᔅ ᑲᒋᒡ᙮”
Zur Zeit ausgewählt:
ᐊᒃᓱᑕᔅ 17: ᓇᔅᑲᐱ
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
