Esita 9
9
Abayudaaya basihirisa abasuku baabwe
1Hu ludaalo lw'ehumi neende chidatu, olw'omwoosi kw'ehumi neende chibiri, omwoosi kwa Adaari nilwoola, oludaalo lweene lu silagiro sy'obwaami syali esy'ohwosereswaho, oludaalo lu basuku b'Abayudaaya bali nibasuubira ohubata mu bunyala bwaabwe. Nae ebiindu byakaluuhanira abasuku baabwe, Abayudaaya nibo abayiingira abasuku baabwe. 2Buli abuundu yi Bayudaaya bamenyaanga, mu buli siko sy'obwaami obwo Abayudaaya bahung'aanira mu buli siko ohulwaania buli muundu yeesi oteemaho ohubahola esyonoono syoosi. Buli abuundu woosi nibatya Abayudaaya, mani n'abulao oyo yeesi onyala ohubalwaania. 3Mubwadyeeri bweene, abahoongo b'ebituundu by'obwaami obwo boosi, bagafana, abaami, alala neende bawamwaanda b'obwaami obwo, nibo haandi abeecha bahoonyaanga Abayudaaya, olwohuba boosi bali nibatya muno Modekai. 4Olwohuba Modekai yali omuundu muhunuufu muno mu dooho ly'omutuki, haandi efuma yae yali niyasalaanira mu bituundu byoosi eby'obwaami. Olwohuba omusaacha wuno Modekai, yemeedaanga sa ohuba neende obunyala. 5Mani Abayudaaya nibeeta abasuku baabwe boosi nibabatema neende engaanga, mani nibabasihirisa ohubamalao. Mani nibahola koti lu badaha hu basuku baabwe. Babaseetaanga neende engaanga mani nibabasiinjamo.
6Mu Susa, esiko syali nisihiramo obuhunuufu, Abayudaaya nibeeta haandi nibasihirisa abaandu emia chitaanu (500).
7Beeteramo abasyaani ehumi bano aba Hamani omwaana wa Hamedaata, owali omusuku w'Abayudaaya ohiramo: Parisandaata, Dalifooni, Asipata, 8Porata, Adalia, Aridaata, 9Parimasita, Arisai, Aridai, neende Faisaata. 10Abaana ehumi (10) bano bali aba Hamani omwaana wa Hamedaata, owali omusuku w'Abayudaaya ohiramo. Nae haba sibayayaanga esiindu syoosi daawe.
11Ao mani nibaboolera omutuki obuungi bw'abaandu beetwa mu siko sihunuufu sya Susa hu ludaalo lweene olwo. 12Omutuki yaboolera omuhasi wae Esita ati, “Mu siko sihunuufu sya Susa mwoong'ene, Abayudaaya beetere haandi basihirisa abaandu emia chitaanu (500), omwo nimwo omuli abaana ba Hamani ehumi (10). Bulaanu abaandu baanga babeetere mu bituundu biindi eby'obwaami byoosi! Bulaanu, siina syeene sy'osaba? Ochia ohusinyoola. Siina syeene haandi sy'osaba? Sichia ohwoolerera.”
13Esita nae yamukobolamo ati, “Nikali mbwe siinyala ohuhusangaasa ewe ow'Oluyaali, fukiirira Abayudaaya abali mu Susa, haandi bahole muchuli esyo si baholere enyaanga yino. Haandi emilaambo ch'abaana ba Hamani ehumi nibakyaniha hu bimikiro.” 14Omutuki yalagira bahole batyo, haandi esilangiriro esyo nisutuswa mu Susa mwoosi. Emilaambo ky'abaana ba Hamani ehumi abo kyayirwa mani nikyaanihwa alafu abaandu bakyelolere. 15Hu ludaalo lw'ehumi neende chine, olw'omwoosi kwa Adaari, Abayudaaya abali nibamenya mu Susa, bebuusa alala haandi nibeeta abaandu emia chidatu (300). Nae haba sibayaayaho esiindi syoosi daawe.
16Abayudaaya baandi abali nibamenya mu bituundu by'obwaami biindi mani nibahung'aana, mani nibelwaanaho, abeene nibeewonia. Mu basuku baabwe, beetamo abaandu elifu amahumi kataanu-na-kabiri neende chitaanu (75,000). Nae haba sibayaayaho esiindu syoosi daawe. 17Bino byakwaao hu ludaalo lw'ehumi neende chidatu olw'omwoosi kwa Adaari. Nae hu ludaalo lwaloondaho, olw'ehumi neende chine, haba siyaliyo ohwiita huundi daawe, mani baaluhusa lwaaba oludaalo lw'esangaalo neende olw'esidyaalo. 18Abayudaaya abali mu Susa, nabo nibahung'aana ludaalo lw'ehumi neende chitaanu, olwohuba hu ludaalo lw'ehumi neende chidatu neende olw'ehumi neende chine, nicho endaalo chibeeteraho abasuku baabwe. Bahusa oludaalo lw'ehumi neende chitaanu ohuba oluhuluundu. 19Sino nisyo esikera Abayudaaya abamenya mu biko bidiidi bahusa oludaalo lw'ehumi neende chitaanu olw'omwoosi kwa Adaari ohubechaanga oludaalo luhuluundu olw'esangaalo, oludaalo olw'esidyaalo haandi olw'ohukabiraangaho ebisiimo eby'ebyaahulya eyiri abasyaabwe.
Esidyaalo sya Purimu
20Modekai mani niyaandiika ebiindu bino byoosi, n'atuma ebbarwa eyiri Abayudaaya boosi abali aambi neende eyale mu bituundu byoosi eby'omutuki Ahasuera. 21Modekai yabalagira ohuhusaanga endaalo huluundu chino: olw'ehumi neende chine neende olw'ehumi neende chitaanu ech'omwoosi kwa Adaari buli mwaaka. 22Chino nichio endaalo chi Bayudaaya baoneraho abasuku baabwe. Kuno nikwo omwoosi okweehola okw'esangaalo neende ohwehoya mu sifwo sy'amasira, haandu okwohuwuluuha mu sifwo sy'ohweyendeherera. Mani sakira balagirwa ohuhola endaalo echio ohuba ech'ohuliiraangaho ebidyaalo, neende ohukabiraangaho abasyaabwe ebiyaanwa by'ebyahulya haandi neende ohuhoonyeraho abamanani. 23Mani Abayudaaya nibafukiirira ohuloondakana neende esyo sibali nibataandiikire, haandi koti lu Modekai yali n'abandikiire.
24Olwohuba Hamani omwaana wa Hamedaata, omwiichuhulu wa Agagi haandi omusuku w'Abayudaaya boosi, yali abaholeere oluhobo lw'ohubasihirisa, haandi yali ahubbire eha, elyo li balaanga bati, Puri, ohubamalao haandi neende ohubasihirisa. 25Nae Esita niyachia eyiri omutuki, omutuki y'atusa esilagiro mu bwandiike ati, oluhobo lubi olwo, Hamani lu yali aholeere Abayudaaya, lumukaluhaniire, haandi Hamani neende abaana bae baanihwe hu bimikiro. 26Esyo nisyo esyakera esidyaalo esyo silaangwa Purimu, olw'eliita ly'eha Puri. Sakira endaalo huluundu echio chilaangwa chiti, Purimu. Ohweema hu byali mu bbarwa ya Modekai, neende hulw'ebyo bi babona ebidiira hu sifune yino, neende hulw'ebyo ebyabakwaaho. 27Abayudaaya sakira balihola elako lyaabwe abeene, neende hu buli muundu owahehole Omuyudaaya, bati endaalo echio choombi chihusibweenge buli mwaaka koti lu syandiikwa, neende mu siha syeene esyatekehwa. 28Haandi syaheengwao siti, endaalo echio chiichulisweenge haandi chihusweenge mu buli muleembe, mu buli daala, mu buli situundu neende mu buli siko, haandi endaalo chino echa Purimu, chihayeenge ohubitao sa, haandi abeechuhulu baabwe bahaye ohuchiibirira daawe endaalo choosi pe.
29Bulaanu, omuhasi w'omutuki Esita, omuhaana wali owa Abbihaili, neende Modekai Omuyudaaya, baandiika ebbarwa, nibehoonyera obunyala bwaabwe bwoosi, ohwomiisa ebbarwa eyo eyohubiri eyilomaloma hu Purimu. 30Ebbarwa yino yandiikirwa Abayudaaya boosi abali mu bituundu emia ndala neende amahumi kabiri neende bitaanu-na-bibiri (127) eby'Obwaami bwa Ahasuera, nibabadahisira omuleembe haandi nibabawuluusa ohuba abadyeeri. 31Ebbarwa eyo yabandiikirwa ohwomiisa endaalo echio echa Purimu, ohubaao mu biha byakyo ebyateebwao, koti lu Modekai Omuyudaaya neende omuhasi w'omutuki Esita babalagira, neende koti lu Abayudaaya beene bali beeterao ebilagiro by'ohusiiba, neende ebiha by'amasira. 32Ao mani esilagiro sya Esita nisyomiisa amalako kadiira hu Purimu, haandi nisyaandiikwa hu lupapula lw'eseero lwasiriingiswa.
©Bible Society of Kenya, 2019
©Bible Society of Uganda, 2019