ทิน เต่ย โต้ว 40
40
โยเซ้บ พ้อ ฒุ์ย-เมี่ยน เญย เบ๋ย
1เจี๋ย ลิ์ว เหยียด หธาม, เถง อียิบ เต่ย-ปูง เญย ฟาโล ฮู่ง โป้ว อะหงุ่น ติ๊ว วั้ว เต้า ต้ม เจียน เหธา โหฒว ฌั้ว ปุน ฟาโล ฮู่ง หญั่น วั้ว เต้า ต้ม เจียน ต่อง ฮู่ง เตี๋ย. 2ฮู่ง เตี๋ย เฉีย เจี์ย ไห่ น้าย เต๋ย อี เต้า เจียน, 3ฯฒฯ เฒาะ นิ่น บัว หววน เจี๊ยน โก๋ว ฮู่ง ติ่น วั้ว เต้า ต้ม แปง-เปย๊ย เญย เปย๊า เญย โล่, ต้ง โยเซ้บ หฒุ หววน วั้ว นอม โล่. 4โก๋ว ฮู่ง ติ่น วั้ว เต้า ต้ม แปง-เปย๊ย พ้าย โยเซ้บ โก๋ว นิ่น บัว.
นิ่น บัว อี เต้า หย่า หฒุ หววน เจี๊ยน โล่ เล่า เญย. 5ม่าย ม์วน นอ, โป้ว ติ๊ว เหธา โหฒว ฌั้ว วั้ว เต๋ย อี เต้า ต้ม เจียน เยียม วั้ว โล่ เบ๋ยๆ. เหยียด เต้า เบ๋ย ปวัด เหยียด หญู่ง. เหยียด เต้า เญย เบ๋ย หย่า ม่าย เหยียด หญู่ง เอ๋ย เล์ย.
6ตะเหญ่ย ดอม โยเซ้บ เปียะ มี่ง หมั่ง, ปวัด นิ่น บัว อี เต้า ฒู้ง เฑ่าๆ วั้ว. 7นิ่น หน่าย ก๋า ฟาโล เญย ต้ม เจียน, ต้ง เหธา นิ่น หฒุ หววน เจี๊ยน นิ่น เญย เฒี้ยว เญย เปย๊า เญย โล่ วั้ว เต๋ย อี เต้า, “เม่ย บัว อี้ ฮนอย โหฒว หาย หญู่ง? ปวัด เฑ่าๆ วั้ว!”
8นิ่น บัว เตา, “อะหฮมวัง เยีย บัว อี เต้า ฒู้ง เบ๋ยๆ. เยียม น้าย หย่า ไม้ ม่าย หาย เต้า ไฮ่ เถง เยีย บัว พ้อ เบ๋ย.”
โยเซ้บ เตา, “ขูง ทิน-ฮู่ง ฮนั้ง ไฮ่ พ้อ เบ๋ย ไม้ เฒ์ย? เม่ย บัว ก๊อง เม่ย บัว เญย เบ๋ย ปุน เยีย หมวัง ม่าะ!”
9โป้ว อะหงุ่น ติ๊ว วั้ว เต้า ต้ม เจียน ฯฒฯ ก๊อง นิ่น เญย เบ๋ย ปุน โยเซ้บ หมวัง. นิ่น ก๊อง, “เยีย ปวัด ติ้ว อะหงุ่น เฮมย เยียม เยีย เญย หฑะเฮมียน. 10วั้ว ติ้ว เฮมย หย่า ม่าย ปัว หธา ฆว่า. เยี้ยด ธ้วด หธุน ต้าย หย่า ฆอย เปี้ยง, เปี๊ยว-จ้อย หย่า หฒัวะ. 11วั้ว หฒั่น ฟาโล ฮู่ง เญย ฒ้าน เยียม เยีย เญย ปั์ว. เยีย ฯฒฯ แก๊ะ วั้ว เต๋ย อะหงุ่น เปี๊ยว นั้น เปี๊ยว-ววม ตั๊บ เจี๊ยน ฒ้าน โป้ว ปุน ฟาโล.”
12โยเซ้บ ก๊อง, “เม่ย เญย เบ๋ย เญย เอ๋ย เล์ย เซ ฮนั้ง น้าย. วั้ว เต๋ย ปัว ฆว้า ฆว่า เป๊ย ปัว ฮนอย. 13แอ๋ง ปัว ฮนอย ฟาโล ฮู่ง อ๋อย ปู๋ง เม่ย ธ้วด, อ๋อย กวั่ง เม่ย เญย ฒุ์ย, หย่า ปุน เม่ย ตุ๊ โหฒว กง ฮนั้ง โล์ วั้ว นอ. เม่ย แอ๋ง ตุ๊ โป้ว อะหงุ่น ติ๊ว ปุน ฟาโล ฮู่ง ฮนั้ง ฒิ่น ด่าง เม่ย โหฒว วั้ว นอ. 14เม่ย ตุ๊ หลง เญย เฒี่ยง โห่ โท้ จั๋ง เต๋ย เยีย, โหฒว หลง ปุน เยีย. ก๊อง เต๋ย เยีย เญย เจ๊า ปุน ฟาโล ฮู่ง หมวัง, เหฌียว เยีย ธ้วด น้าย นอม โล่. 15เยีย เยียม ฮิบลู เมี่ยน เญย เต่ย-ปูง หฒุ ต้อ เถา น้าย ต้าย. เยียม น้าย อียิบ เต่ย-ปูง เยีย หย่า ไม้ ต่อง หาย หญู่ง หฒี่ ตุ๊ ปุน เยีย หฒุ หววน เจี๊ยน น้าย โล่ หฮมวัง.”
16โหฒว ฌั้ว เญย ต้ม เจียน ปวัด โยเซ้บ พ้อ เบ๋ย เญย เอ๋ย เล์ย หลง, นิ่น ฯฒฯ ก๊อง บั๋ว โยเซ้บ, “เยีย หย่า เบ๋ย นอม เบ๋ย. เยีย ปวัด เยีย กั้น เญย มฆ้อง ด๋ง เจี๊ยน ปัว นอม เจย, ตั๊บ เจี๊ยน ฌั้ว เญย. 17กู้ หงว่าย วั้ว นอม เจย ม่าย หญู่งๆ ฒิ ต้าย เญย ฌั้ว ปุน ฟาโล ฮู่ง หญั่น. มป่า เหนาะ ต้าย หญั่น วั้ว เต๋ย ฌั้ว.”
18โยเซ้บ ก๊อง, “เม่ย เญย เบ๋ย เญย เอ๋ย เล์ย เซ ฮนั้ง น้าย. วั้ว เต๋ย ปัว นอม เจย เป๊ย ปัว ฮนอย. 19แอ๋ง ปัว ฮนอย ฟาโล ฮู่ง อ๋อย ปุน เมี่ยน ฮงะ ดุ๊ด เม่ย เญย มฆ้อง แอ๋ง เฒาะ เม่ย เญย เซย ดิ๋ว เจี๊ยน เดี๋ยง. เหนาะ หย่า อ๋อย ต้าย หญั่น เม่ย เญย อ๊อ.”
20แอ๋ง เจี๋ย ปัว ฮนอย เถา ฟาโล ฮู่ง เญย ซี่ เญี้ยด-ฮนอย, นิ่น ฯฒฯ เบ่น หญั่น ฮบ โหฒว จอม ธี้ง นิ่น เญย เหยียด ฒู้ง โหฒว เจียน เญย เมี่ยน ต้าย. นิ่น หย่า ปู๋ง โป้ว อะหงุ่น ติ๊ว เหธา โหฒว ฌั้ว วั้ว เต๋ย อี เต้า ต้ม เจียน ธ้วด ต้าย เยียม หฒวัง เจียน เญย หฑะเฮมียน. 21โป้ว อะหงุ่น ติ๊ว วั้ว เต้า แอ๋ง ตุ๊ โหฒว กง ฮนั้ง โล์ วั้ว นอ, ฯฒฯ เฒาะ ติ๊ว-ฒ้าน โป้ว มี่ง ปุน ฮู่ง เตี๋ย. 22มป่า โหฒว ฌั้ว วั้ว เต้า แอ๊ะ, ฟาโล ฮู่ง เห่ว เฒาะ ต้าย ดิ๋ว เจี๊ยน วั้ว เดี๋ยง ไต๋ กวั่ง หมี่ อ๊ะ. น้าย เต๋ย สี่ หฒะเก้ง ต๋อย เหฑ่ง โยเซ้บ พ้อ เญย เบ๋ย.
23มป่า โป้ว อะหงุ่น ติ๊ว วั้ว เต้า เจียน หละคุ โยเซ้บ หมี่ อ๊ะ. ไม้ จั๋ง หฒุ นิ่น อ๊ะ.
Zur Zeit ausgewählt:
ทิน เต่ย โต้ว 40: IuMiTH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mien Bible (Thai Script) © Thailand Bible Society, 2007
