Matááyo 3
3
Yuána gálaat bie gim nannuoká ˈdiiyiminylé
1Bár kinaallá Yuána gálaat bie gim nannuoká yé ká ˈdie. Mu gálaat ˈbakat Yuuˈdia álle ˈdeeny Waaˈgiet ki ˈdiiyime. 2Mu gálaat geey, kieye, ˈDaa giri Guch Uratiká#3:2 Guch Uratiká ubaa Guch Waaˈgiet lúl tikiˈde. ka ˈjobonteká, hé ˈdeđew-, hí gaa seseenneká hayyíe, Waag makan famíe, gáál yie. 3Yuánáállá he máá Waag máállé ˈdeem ka shigiche-, Yisááya léká hí ˈdeenyle hodhe-, mu kieye,
Kóˈd máádhat ˈbakat hai gáá ˈgiˈgita, kóˈd kieye,
Máá Guđoká les met ˈdiidháa,
mú ˈgierimle lođuđaat kóo,
yegetká,#3:3 Yisááya 40:3
yieká.
4Yuána íín giellé he kaadhdheká dhúr galte gaalí tág gaa nie. Mu sáb rokoˈdeká he seet hite. Mú ˈguomle he ˈgamutaach ubaa dhaanite. 5Aalé gál Yerusalem ubaa gál lés Yuuˈdia ˈdinnam lulle gáá yimieká, tá gál wár Yorˈdan ˈdinnam lulle gáá yimieká lulle mú ˈdú seeseme. 6Gaal héllé ˈdeđew-, eekemeyká huogodhe, Waag makan fame, Yuána đo gáál wár Yorˈdan bíélle gim nie.
7Aalé mu gál Farisaay#3:7 Gál Yuuˈdi hé tág nyátál hí burnayye. Gál Farisaay he gál bár kinaalka, nyátál Yuuˈdi súm ki ˈgieká. ubaa gál Saˈdukaay#3:7 Gál Saˈdukaay he gál Yuuˈdi kaamúre-, guch hí gál suoryoká. Gál kinaallá tawunyleka kieye, gál kufoká hé uushim yiem ma gáá ˈdeˈdeminy, ubaa hé geđ ma logolnonno, he yegie. ilishká ˈdaa bie gim niinykáka hí ˈdu gáá yiimie-, argeká, mu gáál geey, kieye, It ˈdálto chaaráal! Mááya hí fuute, hí idho Waaˈgiet ka chiimetoká met kar gaa ˈdonyle geey? 8Saano húgúmle midhab-, gálle Waag makan fameká ˈgáa. 9Tá haí taawûny, hí hol geđîny, hí kieye, ˈJaakúnno he Abirááyam, hí chégen. Yú hí geeye, Waag hé fargogint waarééllá um Abiraayam ki hođichoká ˈgayyo. 10Aaléka, Waag hé yerellé alléká tág ká chirate, ˈguor đuur ˈdú koyye. Ameeny ˈgór saano midhabká hí ma gáá higisinyká lulle ali ha muí gaa muura, ˈjiet ha muí gaa verene.
11Yú it giri hí hé ˈdeđewká hayche-, hí Waag makan faannééllá, in hí bie gim nannaa. Tá Máá ye biiy el gáá ˈjeenká hé ye far ˈdú gogo. Yáá ˈduuw ˈguo-, mú koiy ˈgas gaa furoká mán. Mu íín Hím Naasan Waaˈgiet ubaa ˈjiete hí gim nannaa. 12Aaléka mu hé múchlé sííndí ki tutunoká gíl ká ˈguo. Mu sííndí tuneka, ál sííndí ki tune kinaal hai gaa hegedhe, sííndí buit hai faadhdha, tá sííndí metle íín ˈjiet ma kufuminyká hai gaa verene, Yuána hí gáál yie.
Yuána Yíésu bie gim nie
13Aalé Yíésu Galilááya gaa kie, wár Yorˈdan álle ki ˈjie, Yuána ˈdú sedhe, giri muí bie gim nannuoká. 14Tá Yuána Yíésu moy, kieye, Kúún yaa ye ˈdu gáá chimíe? Yaa onnônyka, kuun ye bie gim nanniyyááte! yie. 15Yíésu Yuána ˈdéé hol ˈdú nie, kieye, Ye hash, he hí káána hatallá yeet. Hatallá ke ekeyka, in hé ˈduwanti-, Waag hí feˈdoká ke đusie, Yíésu hí Yuána yie. Aalé Yuána đo iiy yie.
16Yíésu Yuána hí bie gim nieká, đo bie yé gáá ˈdie. Ál tikiˈde kinaallá úr đo af hí furme, Yuána Hím Naasan Waaˈgiet hát hóleká Yíésu ˈdu gáá lelete-, mú ˈdú yíéđianneká arge. 17Aalé ˈdéé hót úr yé gáá ˈdiiyye, kieye, Hééllá he Iny chia yú gielká, mu hé tág ye geer gaa meey, chie.
Zur Zeit ausgewählt:
Matááyo 3: dsh
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Translation and Literacy