मत्ती 2
2
ज्योतिषीयूदे तूरब
1मूरुम् हेरोदजे पोलोने यहूदियाजे बेथलेहेम यब तने येशू जन्मीदीदे, पूर्वजे ज्योतिषीयू यरूशलेमने फ्योरदे मेस्ये थमयूदे यदे, 2“यहूदीयूजे मूरुम् क्यूत्देबे जन्मेदेब केने ख्यङ्? चेनेयलो ङीदे ङूजे कर्चेन् पूर्वने तङ्दे मेस्ये ङी ङूने स्यूव पीनने रख्यङ्।”
3अम्ब पो तदेबे मूरुम् हेरोद सोरो आतीकदे, मेस्ये ङूप्रे यरूशलेमजे मीयूये क्वाने सोरो आतीकदे। 4होर्दे ङूदे पूस्र्या केन्यू मेस्ये दून्याजे पन्डेयू क्वाने रूप् पूत्देबे “ख्रीष्ट कने जन्मीदीय?” यदेबे लोत्दे। 5थमयूदे ङूने यदे, “यहूदियाजे बेथलेहेमने। चेनेयलो अगमवक्तादे येर्बे लिख्दीये ख्यङ्:
6 #
मीका 5:2
‘यहूदिया मुलुकजे त, ओ बेथलेहम, यहूदाने हुकुम चील्लेब मीयूजे अन्द्रने न चै कामनेये कमी त्वो, चेनेयलो नैट्यादे हुकुम चेब मी त्या योङ्रीय, ङूदे इस्राएलने ख्यब ङैजे मीयूने लेक्क्य’।”
7होर्दे हेरोददे हम्ब ज्योतिषीयूने खैदे कोदेबे कर्चेन् कम्ब बीलने तङ ख्य, हम्ब पो थमयूने लोत्देबे था प्रेत्दे। 8ङूदे थमयूने येरे यदेबे बेथलेहेमने कूल्बीदे “प्र, मेस्ये हम्ब पीच चेलाबे मेल्। ङूने त्वमेस्ये ङैने खबर ची, मेस्ये ङैये ङूने स्यूव पीम्बीय।”
9होर्दे थमयू मूरुम्जे पो ङ्यीन्देबे रङ्सेजे लम्ने गीली कम्ब कर्चेन् थमयूदे पूर्वने तङ ख्य हम्ब कर्चेन् थमयूजे खूम्खूम् गीली, मेस्ये पीच ख्यब नेने फ्योये ङ्येदे हम्ब कर्चेन् अम्प्र क्यूरी। 10कन्छ्वाब थमयूदे हम्ब कर्चेन् अम्प्र क्यूरेब तङ्दे हन्छ्वाब थमयू सोरो आनन्द क्यूत्देबे सूग्दे। 11होर्दे थमयू कीम्नङ्ने क्योइब पीचने ङूजे म मरियमप्रे तङ्दे, मेस्ये पून्छ्यल् क्यूत्देबे ङूने स्यूव पीन्दे। होर्दे थमयूदे रेब कोम्लोयू फादेबे मर्, सोरो ज्य बस्न रब धूपप्रे मूर्र यब बस्न रब सेजे भेटी चेर्तीदे। 12होर्दे हेरोद ट्याने अन्-ल्वाबलाची यब परमेश्वरजे आज्ञा मून्दे मोङ्ने प्रेत्देबे थमयू सूजो लम् क्यूत्देबे रङ्से देशने ल्वाइदे।
मिश्र देशने छ्योङ्येब
13थमयू गीलेङ्येदे, परमप्रभुजे दूत त्यादे मून्दे मोङ्ने योसेफ ट्याने रदेबे येरे यदे, “लङ्, पीच चीद मेस्ये ङूजे म प्रे-प्रे टेल्देबे मिश्र देशने छ्योङ्ब, मेस्ये ङैदे नने ल्वाख अन्-यदासेमे हैयानेने टूङ्। चेनेयलो, हेरोददे बल्खने सेजे लागि ङूने मलने सुरु चेमे ख्यङ्।”
14होर्दे योसेफ लङ्देबे पीच मेस्ये म प्रे-प्रे टेल्देबे मून्देने मिश्र देशने गीलीदे, 15#होशे 11:1हेरोद अन्सीइदासेमे थमयू हैयानेने टूङ्दे। परमप्रभुदे यब वचन येर्बे पूरा क्यूत्दे, “ङैदे रङ्से चने मिश्रदेशदे कोदे।”
16होर्दे ज्योतिषीयूदे ङूने छल्लीयेब पो हेरोददे था प्रेत्देबे ङू छीदे मूत्दे क्यूत्दे। मेस्ये ज्योतिषीयूदे ङूने यदेबे थाप्रेब अनुसार बेथलेहेम मेस्ये हम्बजे तीला-छोला नेयूजे बर्ष ङ्ही मेस्ये मो-नङ्जे पीचयू क्वाने सेस्स्ये पीन्दे। 17होर्दे यर्मिया अगमवक्तादे यब वचन पूरा क्यूत्दे,
18 #
यर्मिया 31:15
“रामाने केत्या तदे, क्वाँ-क्वाँ ङूनब मेस्ये शोक चेब के केन्,
राहेल रङ्से पीचयूजे लागि ङूनब, सेम् बूझ्दीमीब अङ्-ङूलाबे टूङ अन्ङ्यीन्।
चेनेयलो ङूजे पीचयू त्याये त्व-क्यूरी।”
19हेरोद सीये ङ्येदे मिश्रने प्रभु परमेश्वरजे स्वर्ग दूतत्या मून्दे मोङ्ने योसेफ ट्याने रदे, मेस्ये येरे यदे, 20“लङ्, पीच मेस्ये ङूजे म प्रे-प्रे टेल्देबे इस्राएल देशने प्र, चेनेयलो पीच सेमेब मीयू सीये जन्क ख्यङ्।”
21योसेफ लङ्देबे पीच मेस्ये म प्रे-प्रे टेल्देबे इस्राएल देशने ल्वाइदे। 22तर हेरोदजे नेने ङूजे च अर्खिलाउसदे यहूदियाने राज्य चीन्न ख्यङ् यब तदेबे होने प्रने ङू फदे, मेस्ये मून्दे मोङ्ने आज्ञा प्रेत्देबे गालील यब नेने ङू गीलीदे। 23#मर्कूस 1:24; लूका 2:39; यूहन्ना 1:45नासरत यब सहरने गीलीदेबे ङू टूङ्दे। येर्बेने अगमवक्तायूदे “ङूने नासरी यदेबे यीय” यब वचन पूरा क्यूत्दे।
Zur Zeit ausgewählt:
मत्ती 2: सर् कबुल
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Ghale New Testament © Nepal Bible Society, 2011.