Beliebte Verse in Naṉ. 15

Teilen

Nuyá̱ Apramsha nekas nuna túrattawai tu enentáimias nekas enentáiji̱a̱i̱ Uunt Yusan enentáimtusmiayi. Tú enentáimkiui Yus “nekas péṉkeraitme” tímiayi.

Nuyá̱ ukunam Uunt Yus Apraman ishí íkiajtiusaṉ ímiaja̱i̱k chicharuk “Apramá, ashamkaipia, tantarja̱i̱ ejaktinia áintsanak ejaajme. Amincha nekas péṉker pujustinian amastatjai” tímiayi.

Tura Uunt Yus Apraman “a̱a̱ jiinkitia” tinia chicharuk “Nayaimp nakaasa iisam yaa nekapmarianá. Wats jeakmeka nekapmarta. Yaa wáinmena imianú untsurí áme shuarumin awajsattajai” tímiayi.

Takui̱ Uunt Yus Apraman aya̱k “Atsá chíkichkia nérentin ajaschattawai. Antsu ame nekas uchiram nérentin átatui” tímiayi.

Nuyá̱ Yus Apraman chicharuk “Amé shuarum chíkich nuṉkanam yajá pujusártatna nuna paant ujajme. Tura nui̱ iniatai̱ tuke wáitsar kuatrusiántu uwí pujusártatui.

Tutai Apram Yusan aya̱k “Uunt Yusru, wi uchin takaktsujna nusha nékarme. Túmaisha amastájai túrutmena nu ¿itiura yáintkiattam? Winiaja chikichík uchiksha yajutmartin tsaṉkatrukchaitme. Tuma asamtai winia iniatai̱r Tamaskunmaya̱ Iriesér ashí takakjana núnaka nérentin ajastatui” tímiayi.

Tura nú tsawantin Uunt Yus Apramja̱i̱ chichaman nájanuk “Jú̱ nuṉkan ame shuarumin Ejiptu entsari̱ya̱ nuyá̱ juárkiniak uunt entsa Yúpratisa tímianai susattajai.

Tura tí ukunam ame tiraṉmi tiraṉki̱ iwiaakainia nu yajá nuṉkanmaya̱ jú̱ nuṉkanam ataksha táartatui. Kame Amur aents jú̱ nuṉkanam matsatainia nu, ti yajauchin túrin áiniayat ataksha nú tunaarintin ajasár amuukartinia nunasha nékajai. Nu tsawant jeamtai amé shuarumin ataksha itiartatjai” tímiayi Yus.