Tura jú̱nis chicharainiak “Iincha Ejiptunmaṉ pujumiajⁱ nui̱ṉ Uunt Yus mantamaitkiurni̱ṉkia maak. Warí nui̱ṉkia yurumkasha namaṉsha tí nukap yurumár ejemarar nútsumiaji. ¿Antsu imiá nukapettajnia jú̱tin atsamunam tsukái kaji̱nkiarat tusarmechuk jukartukniuitrum?” tiármiayi.
Nuyá̱ Uunt Yus Muisaisan chicharuk “Yurumkan nayaimpinmaya̱n akuptúktatjarme. Nu yurumkan Israer shuar tuke tsawant a̱a̱ jíinkiar aya chikichik tsawantin yúatniunak juurmakarti. Nuní̱ túran Wi akupkámun uminiawash tura uminiatsuash nuna paant nekaattajai.