Beliebte Verse in Popera ga Epéchiuwa yexmagüxü̃ ga yaxõgüxü̃tanüwa namuxü̃ ga Pauru 5

Teilen

Rü ñu̱xma rü Tupanaxacügü ya pexü̃ nangechaü̃güxe pixĩgü. Rü ngẽmaca̱x name i naxca̱x pedauxü̃tae nax naxrüxü̃ pimexü̃. Rü name i pegü pengechaü̃gü yema Cristu tüxü̃ ngechaü̃xü̃rüxü̃. Rü nüma rü taxca̱x nügü inaxã rü taxca̱x nayu nax yemaacü Tupanaca̱x wüxi i ãmare i chi̱xemaxü̃ yixĩxü̃ca̱x.

Rü ngẽmaca̱x name nixĩ i pegüna pedaugü rü mea pemaxẽ. ¡Rü taxṹ i ngẽma duü̃xü̃gü i naechitamare maxü̃xü̃ãcü pemaxẽxü̃! Rü name nixĩ i duü̃xü̃gü i mea naãxẽxü̃ cuáxü̃ãcü pemaxẽxü̃. ¡Rü ñu̱xma nax Tupana pexü̃́ natauxchaxẽẽxü̃ rü peyoxniẽ nax penaxüxü̃ i ngẽma nüma nanaxwa̱xexü̃! Erü ñomaü̃cüü rü muxü̃ma i chixexü̃gü ínangugü.

Rü tama name i pengãxẽ, erü ngẽma rü chixexü̃wa tüxü̃ nagagü i ngẽxguma ngẽmaãcü imaxẽgu. Natürü name nixĩ i Tupanaãẽ i Üünexü̃na pegü pexãgü nax pewa nangẽxmaxü̃ca̱x rü pemaxã inacuáxü̃ca̱x. Rü name nixĩ i Tupanaarü orechigagu rü norü wiyaegügu pegümaxã pidexagü rü pegümaxã nüxü̃ pixu. Rü name nixĩ i naguxü̃raü̃xü̃ i norü wiyaegügu pewiyaegü, nax ngẽmaãcü guxü̃ne ya perü maxü̃nemaxã tórü Corixü̃ picua̱xüü̃güxü̃ca̱x. Rü name nixĩ i guxü̃guma tórü Cori ya Ngechuchu ya Cristuégagu Tanatü ya Tupanana moxẽ pexãgü naxca̱x i guxü̃ma i norü ngü̃xẽxẽ.

Rü ñu̱xma rü tama name i duü̃xü̃gü i ngẽãẽmarexü̃ãcü pemaxẽ. Rü name nixĩ nax nüxü̃ pecuáxü̃ i ta̱xacü nixĩ i tórü Cori pexü̃́ naxwa̱xexü̃ nax penaxüxü̃.

Rü pemax, Pa Yatügüx, rü name i pema̱xü̃ pengechaü̃gü, yema nax Cristu guxü̃ma i yaxõgüxü̃xü̃ nangechaü̃xü̃ rü norü maxü̃ naxca̱x inaxãxü̃rüxü̃.

Rü ü̃pa ga pema rü ẽanexü̃wa pemaxẽ, yerü tama Tupanaxü̃ pecua̱x. Natürü i ñu̱xma nax Cori ya Tupanaxü̃ pecuáxü̃, rü ngóonexü̃wa pemaxẽ. Rü ngẽmaca̱x name i duü̃xü̃gü i ngóonexü̃wa ngẽxmagüxü̃ãcü pemaxẽxü̃.

Rü ñu̱xma nax Cristuaxü̃́ peyaxõgüxü̃ rü nüxü̃ pengechaü̃gü̃xü̃, rü name nixĩ i pegüga pexĩnüe i wüxichigü.

Rü pemax, Pa Ngexü̃güx, rü ngẽma nax tórü Coriga pexĩnüexü̃rüxü̃ rü name nixĩ nax petega pexĩnüexü̃.

Natürü ngẽma ore rü pechiga ta nixĩ. Rü wüxichigü i pema i yatügü rü name nixĩ i pema̱xü̃ nax pengechaü̃xü̃ ngẽma pegütama nax pengechaü̃xü̃rüxü̃. Rü ngẽxgumarüxü̃ ta i pemax, i ngexü̃gü rü penaxwa̱xe i petega pexĩnüe.

Rü ngẽmaca̱x i Tupanaarü ore i ümatüxü̃wa rü ñanagürü: “Wüxichigü ya yatü rü nanatüna rü naéna tá nixũgachi nax naxma̱xmaxã nangẽxmaxü̃ca̱x. Rü ngẽmaãcü i ngẽma taxre rü wüxi tátama nixĩgü”, ñanagürü i ngẽma ore.

Rü tama name i pema rü ta nagu pexĩ i ngẽma chixexü̃gü i taxuwama mexü̃ i ngẽma togü i duü̃xü̃gü i ẽanexü̃wa ngẽxmagüxü̃ ügüxü̃. Natürü narümemae nixĩ i penango̱xẽxẽ nax nachixexü̃ i ngẽma naxügüxü̃.