Beliebte Verse in 1Petrus 1

Teilen

Ninewe Endaganggok Yesus Kristus ombae Allah etnogoat pogorako doguwok. At Allah ninebe ninaʼbuwa mondok nen, Yesus Kristus watlagikesikmo nen ilugut disike eti paga nit ninilugut ninakike o. Ninilugut ninakikemo dogolik, ninakla nen, “At nen, yabunggane panot ninabigin, yisike eti dek asigin dek,” yiluk ninakla arlenggen kiligogi o. Esigit diluk panot ninakonem indewerek asugun mende eti pirli agidek, weyak agidek, dek agidek ikok mondok dogogin mende mbogot oba kit ʼbinagasikemo werek o.

Eti paga, yogondak ya, Allah nen kinaren mbaligiluk kagakonem, kinoba anggin-panggin kasi dogolik, elalma ake kinakla weyak arigogo mende, kinakla arlenggen kasi dogono o. Emas onggo nggogat mbaligogi mende eti, Pano a? Weyak a, yiluk kindu aik oba walkiligogi eti kak, Allah nen, “It inendainggen an noba eberogonat panggot diluk werek a? Dek a,” yiluk, enggagat asuwagaluk ambasinem, kinoba anggin-panggin kiligogi o. Emas eti wirlikogonat dek asigin mendeat, ebe nggok kak, kinendainggen Allah oba panggot diluk werek etiat o. Kit kinendainggen at oba panggot diluk dogogun kalok, at nen kinaren mbalko dogoluk nen, Yesus Kristus selekmaat laʼbi wisigin etinem, pogot kinakik, kinalonet kinakik, nggogot dinagagik, kagasigin o.

At Allah nen, “An nobabut weyak kagakidek nggaʼberek mondok werek eti paga, kit men an nake kinobabut nggaʼberek mondok dogono o,” yiluk yisikemo kolal mbalogo ʼbisuka eti paga, kit nen yi mende ndi mende kagako dogolik, kinobabut at Allah kinayonggo ʼbisike mende obabut kagat nggaʼberek mondok dogolik kagako dogono o.

Kit alebat wene eti kinonggodek dogolik, yi mende ndi mende warlok nen kinendainggen nen nasinem kagako lagagip eti, yabunggane kinobabut eti mende waganggup o. Elege nen inombae lak inane kologo dogolik motogo kagarigogi eti kak, kit Allah wene kinasuk kologo motogo kagako dogono o.

Eti paga, wene eti didiluk nen, mbirirli luwogoluk inobaka kerle aʼbetogo warigogi eti kak, kinobabut kwalogo, kinendainggen enggerlogo dogono o. Esigit diluk dogolik, kinakla nen, Allah nen Yesus Kristus ebe selekmaat laʼbi wagonem pano mende woknisa wisigin o, yiluk kinendainggen at oba laʼbiluk oba eberek mondok dogono o.

Eti, Allah wene men yiluk kolal mbalek werek kak, “Akoni taʼbokogonat, inebe isinggangge salegat o. Pano yiluk pogorinabigogo eti, isingga enggen pogorarigogi eti kak pogorarigogi o. Engga mbuk agik, enggen lologo wusigik, kagarigogo o. Mende, Ninewe Endaganggok ane eti mondok dogogin o,” yiluk yisikemo kolal mbalogo ʼbisuka o. At ane eti ebe, nit nen pano wene yokisiligogi etiat o.