Beliebte Verse in Markus 13

Teilen

Inang mai'di tau la mangkahi'di'koa' aka' untindo'ä'. Ampo' menna ang la tontong mampetahpa' lambi' kapuhaanna yato kamadahhaang inang la salama'.

Dahi madakakoa' aka' daia' ungnginsang di pihhang tempona sule.

Anna ponna la dibahamokoa' pano di olona to ma'kuasa, dakoa' pahallu bata-bata didiona aka ang la untula'. Ampo' ke la lambi'mi tempona ma'tula'koa', tula' tomande'i aka ang yaling di pihki'mu, aka' ponna ke ma'tula'koa', tadia pihki'mu ampo' Inaha Masero ang mamposolaikoa'.

Langi' anna lino la tallang, ampo' ingkänna aka ang kutula' la tontong lolo nei' lambi' sapano-panona.

Didiona pihhang la dahii ingkänna yatoo, dai aha mesa tau ang mala mangnginsang. Moi ingkänna malaeka' yaho di suruka, moi Kodi' inde Änä', datuke' Ko kuinsang. Supung Ambeku ang mangnginsang.

Anna ponna unghingngia' kaheba didiona to sitolla', bahtu' moi unghingngia' oninna, ya' dakoa' la pahallu mahea'. Aka' ingkänna yatoo inang pahallu la dahi ampo' tadiake' tempona la tallang lino.

Umbai' la sule di maloe, ke dai di tängngä bengi, bahtu' mebuhka' baya, bahtu' di dai'-dai' allo; ya' dai diinsang tehte'na. Madakakoa' anna malai ke pihsa' sule tomande'ä' dakoa' hahe kulambi'. Aka ang puha kuoaingkoa', la kuoa toing nei' pano di ingkänna hupatau, diantoo: madaka lolokoa'!”

Bohto ang mesa la kende' umbali bohto senga', anna katomarayaang ang mesa la kende' umbali katomarayaang senga'. La aha lino' käyyäng di umba-umba naongei. Noa tunne' la kende' kabuhohangang. Ampo' ingkänna yato kadahiang, mane pampahandu'annaete' kamadahhaang ungngoloi lino bakahu, sinnoa mesa bahine ang mapi'di' aka' keänä'.

Ampo' Kaheba Mapia didiona kapahentaanna Puang Alataala la dipepainsangnging pano di ingkänna bohto di lino akinna la tallang lino.

Aka' mai'di tau la kende' umpake sangangku anna naoaitee, ‘Kodi'mito indee ang ungngempeia'!’ lambi' la mai'di tau napasähsä' lalang.

Ampo' dioa' indee pahallu madaka, aka' la dibehokoa' pano di to panghohto' anna dipohetongkoa' yaling di pa'sambayangang. Anna la napapengngolo toukoa'ne' pano di to pa'kuasa anna tomaraya aka' mampetahpa'koa' mai di Kodi', lambi' sika la unghingngi kasa'biammu didiona Kalaeku.

Aka' mai'di la sule ang unsanga kalaena: ‘To Dilanti' la Mepasalama'’ ampo' setonganna tadiaetee'. Anna la aha toe' ang unsanga kalaena: ‘nabi’ ampo' setonganna tadiaetee'. La umpapia ang mepusa'-pusa' anna malai disanga si'da ‘to pepasalama'’ bahtu' ‘nabinna Dehata,’ ampo' pahtuyunna la umbulitu' hupatau, moi petauanna Puang Alataala.

Ke puhang yatoo tempona kamasuhsaang, ‘La malillimmi kalane aka' dang la aha pesilona mata allo anna bulang. Ingkänna bintäng la manahoi yaho mai di langi' anna ingkänna kakuasaang ang aha yaho di langi' la sisähä'-sähä'.’