Beliebte Verse in Fīripo 2

Teilen

ꞌIna kōrua ko aŋa e tahi aŋa mo haka tuꞌu pē nei ē: ꞌauē ꞌō kōrua ē. Ana aŋa kōrua e tahi meꞌe, e aŋa hai haumārū ꞌe hai manaꞌu pē nei ē: i hau rō atu te tētahi nuꞌu ki a kōrua. ꞌE ꞌina ko kimi i te riva-riva mo kōrua mau nō; e uꞌi takoꞌa i te riva-riva mo te rua.

E tuꞌu te kōrua manaꞌu pa he manaꞌu iŋa o Ietū

pē nei ē: Ka ai atu a ia he ꞌAtua, i haŋa nō mo haka rē i rā tōroꞌa mo haka riro i a ia he taŋata, ꞌe mo tuꞌu mai ōꞌona pa he tāvini. ꞌE, ꞌi tōꞌona haꞌere iŋa pa he taŋata, te meꞌe i aŋa he haꞌatura ki te ꞌAtua ꞌātā ki te roa he haꞌatiꞌa i a ia mo mate, ꞌe ꞌātā mo mate ꞌi ruŋa i te tātaurō, he ūtuꞌa mo te nuꞌu taparahi-taꞌata.

O te ꞌAtua, paꞌi, te haka poreko ꞌi roto i a kōrua i te haŋa mo haꞌatura ki a ia ꞌe te vaꞌai atu i te pūai mo aŋa o kōrua i te meꞌe mo koa ōꞌona.

ꞌO ira te ꞌAtua i vaꞌai ai ki a Ietū i te tōroꞌa hopeꞌa o te nui-nui, ꞌe i te parau o te meꞌe taꞌatoꞌa, ki tū-turi ꞌe ki haꞌamuri tahi ai ki a Ietū te meꞌe taꞌatoꞌa ꞌi te raŋi, ꞌi ruŋa i te henua ꞌe ꞌi te pōꞌauahi, ki kī ai te ŋā meꞌe taꞌatoꞌa nei pē nei ē: he parautiꞌa mau ꞌā a Ietū Kiritō he Pūꞌoko Haka Tere o te meꞌe taꞌatoꞌa. Pē ira ka haꞌahana-hana tahi ena ki te ꞌAtua Matuꞌa.

Te meꞌe taꞌatoꞌa aŋa e kōrua, ana aŋa ꞌina ko tātake ꞌe ꞌina ko hēŋuꞌi-ŋuꞌi, ꞌo ai te kōrua hape ꞌe te kōrua meꞌe taꞌe tano mo tuhi atu e te taŋata. ꞌI roto i te nuꞌu haꞌavare ꞌe taparahi-taꞌata o te ao nei e riro kōrua he ŋā poki o te ꞌAtua ꞌina e tahi hape. E māꞌeha kōrua ꞌi roto i a rāua pa he hetuꞌu pura ꞌi roto i te pōhāhā

E te taina, hora era ōꞌoku ꞌi muri i a kōrua, he haꞌatura nō te kōrua aŋa ki te ꞌAtua. ꞌE, hora nei, ꞌina a au o muri o kōrua, e ꞌata haka pūai te kōrua haꞌatura iŋa ki a ia mo aŋa mo oho nō o kōrua, hai moꞌa, i te meꞌe tano aŋa e te nuꞌu eꞌa mai roto i te ūtuꞌa o te hara.