Beliebte Verse in Kolosayï 2

Teilen

Wü di enga wüna, tïtïne yi ra eyi fü Miri Yesu. Te di bala, ah le de yi di fï bü emere wü ngü ꞌburu, de te engu ngbü ele ne. Yi lala eküte Miri Yesu, baka rü te to sï ye, lala gbü tö, de yi nü de ngü kaka kpa engagira nü. Yi rü kpekpeke gbü ngü ka Miri Yesu, de te wüh rï yi di la, de yi di eo to yi, da egbo nga ïrï Me, gbü wü sïkpï ꞌburu.

Yi ceka te-yi mbi, angü wü gara kpara ena afiti yi de töndö rïrï ka-wü. Angü wüh gü ba, rïrï ka-ani la, ah de rïrï ka Me, amba ah de ngü ka Me nda de! Ah ka-ye de mere wu! Ah ka-ye de siti rïrï ka gele ka wü me ka wü kundu wü. Dela rïrï ka Yesu Kurisito nda de.

Angü te enga gina, yi ngbü ta baka wü kövö, teka wü *siti ngü ka-yi, ta te yi ngbü emere ne, angü yi wu ngü ka Me la de. Kpah bala, yi le ngü ka Me ta kpah de. Amba tïtïne, Me küwa yi gbü siti ngü la eyi, teka ngü ka Yesu Kurisito. Angü ah boro wü siti ngü ka-nih la eyi guvu ye ꞌburu asidi. Angü Me kolo ta ngü ka-nih eyi, fü ah aba ngü la gbü köcökpa, gü ba, nih ena akpi akpi fï mere badi, angü nih mere *Rïrï ka-ni, Me, nda-nih de. Amba tïtïne teka ngü ka Yesu, te kpi füh *rü gbegbete, teka aküwa nih ne, Me du sörö ngü, ta te engu ba teka ngü ka-nih ne, eyi asidi.

Ah le de yi lala te zu ngü ka Yesu, angü Yesu Kurisito de Me gegege baka Wö ye. Fü ewü abï engu ba kpara füh kotö ne, teka asere ngü ka Me la mbölö fü nih. Engu kpah de Mere Miri, gbü nzö wü e ꞌburu, wü kpara, de wü *malayïka ka Me, be kpah te wü *siti wü di enga me, de wü muruyi ꞌburu. Angü Me to wazi la me-ye fefe. Dela si-ngü te Me to kpah wazi la di fü yi, angü yi ngbü eyi elala eküte Yesu Kurisito.

Te di bala, wü di enga wüna, wü gara kpara le ao rïrï ka gele ka-wü kpekpeke ba rïrï ka Me, neh teka ne? Wüh gü ba, yi mere e azü mene e dene de, anga yi nzö mene e dene de. Anga teka gele ka to fu-fe, anga *sïkpï ka Me, anga gara gele bane, yi di emere ngü bane, anga yi mere ngü bane de. Amba ma ngbü emala fü yi, gü ba, yi mere e aje ngü ka-ewü la nda-yi de. Angü rïrï ka gele ka wü kundu nih la, ah bü baka kuru e, te Me to ta teka asere nga ngü ka *küküwa, te ni, Me, ena aküwa nih di ne. Amba zu küküwa la, ah ka-ye duu de Yesu Kurisito kpikpi ye. Te di bala, ah le de nih ce ngü ka gele la, nih du, nih lala gbü nga Yesu.