Beliebte Verse in Gálatas 5

A̱ndá ti Ncha̱kuén Díos tꞌe̱tue̱hen a̱séni la tjue̱he kíchóni, tso̱chéhe̱ni, kjuaxróxin tsꞌejóni, tso̱nínkakonhñani, nkojína tsꞌejókoni kíchóni, tjinki̱tsani íso chojni, nchexiteyáni ti nkehe ndáchroni, nkehyani la ko tjachani tꞌe̱tue̱nheni a̱séni. Ndá ti xi̱kaha sichꞌeni la kohya nijnko ley tsjanchia ijie tsjasótexíni.

Méxra̱ ndáxrja̱n: Tꞌejora éxi tjinkaon Ncha̱kuén Díos, la chrókjuénka̱yáxinhñara si̱chꞌera ti nkehe jínahña tjénka̱yáxinra.

Mé xi̱kaha ti tjejókoni Ncha̱kuén Díos, la ticháxi̱n tsíto̱heni kixin Ncha̱kuén Díos tsꞌe̱tue̱hen ti jeheni.

Méxra̱ ti chojni tinkáchónki Jesucristo, la chꞌehya sin ti nkehe tjinkaon cuerpoé sin, la í xraxinkakonhña sin ti nkehe jínahña kꞌuékjenka̱yáxin sin.

Kaín ti nkehe jínahña ichꞌe chojni la xra̱hya tjatso̱ani: kixin tóxríhi̱n sin tsochónta sin ókjé chojnichjin o̱ ókjé chojnindoa, tjenka̱yáxin sin nkehe jínahña, la ko náxrjónhña, tinkáchónki sin nkehe tsíkjano̱ña, la ko nchexro̱a̱n sin, nínkakohen kícho sin, tjeyá sin kjuanínkaon, chjio sin, xra̱hya tónínkaon sin, tjinkaon sin itsjé nkehe kixin jehó sin jína tsꞌejó sin, tjinkaon tsꞌaxrjentá sin, tꞌóxika̱ye̱he kícho sin, chji̱no̱xíhin sin, tjàya sin, tjasin sin kia la tókoan sin la nduáhya tjenka̱yáxin sin, la ko tjenka̱yáxin sin íso nkehe jínahña. La éxi senó tjo̱nka̱ra, ti nkexro xi̱kaha ichꞌe la xrokjuahya tsjiji sin ti itjen Díos tꞌe̱to̱an.

Jahara kíchóni, Díos kjueyá ti jahara kixin tsaára. Méxra̱ chrókjuénka̱yáxinhñara kixin jína chrókjui̱chꞌera kaín nkehe nduáhya. Ícha jína chrókjuinki̱tsa kichuara la ko chrótjue̱héra kichuara.

*Kixin ti nkehe jínahña tjénka̱yáxinra la tjajo̱nko ti Ncha̱kuén Díos, la ti nkehe tjinkaon Ncha̱kuén Díos la tjajo̱nko ti nkehe jínahña tjénka̱yáxinra. La yóí nínkakohen kícho. Méxra̱ xitjahya si̱chꞌera ti nkehe jína tjénka̱yáxinra.

*Kixin kaín ti nkehe ndáchro ti ley mé tꞌóna éxi nkoko̱a nkehe la ndáchro: “Chrotjue̱heni kíchóni éxi tju̱éxini a̱séni.”

La sinchenkehyani la ko chrókjua̱cha̱xi̱nhñani kíchóni la ko chrókóchji̱no̱xíenhñani ti nkehe ichꞌe íjnko kíchóni.

Cristo mé kuaáxini, la ti ley í tꞌe̱tue̱nhña ti jeheni. Méxra̱ ndoá chrókꞌuejora la jína titekáonra Cristo la í chrókjanhñara chrókꞌónara ijnko chojni tꞌítuehen.