Koonzime - 1998 Edition (Drama NT)

Jɔ̌ʼ Yésʉs á sil elwib bilwǐb bínɨ̌ bíbyɛ̂h yɨ́, nye nzě lɛ́ɛ le ompʉ́n bé ó: «Bɨ̌n bé lɨ́ egʉ́a ó, nzɔɔ Páska, nyɨ́ kǎ lîʼ mélú mébá ó, nye bwálɔɔ. Nó ó Mwân mé Mʉr ónzě bɛ́mɔɔ, ó bé bómlaa nye ɨ́ kolôs kʉ́.»
Ojwɨ́ɨ o mpáh Nzyɛ̌m le otɔ́má bʉ̂r o b'Ɨ́zraɛ̂l, bê nzě syɛŋa lɨ́ ebɛhɛɛ mé Kayɨáfa, njwɨ́ɨ opara. Bé á komlo tɨ̂ʼ ó mpʉ bé jálá le emɛ̂r Yésʉs ɨ́ nzɨ̌ mikóo, bé nkʉ̂ jʉ̂ nyé yɨ́. Sâ gwár, bé á be yɨ́ɛ ó, lɨ́ elɛ́ɛla páʼ nyɔ́ɔ́ ó: «Mɨná bé ayɨ́ pǎ mɛ̂r gá nye ɨ́ jɔʼ nzɔ́ɔ. Minzɨnzɨ mi bʉ̂r, myé ámû sâ bíntʉ̌.»


Ɨ́ mpʉ̌ Yésʉs á bě Bétanî, ɨ́ mbɛ̌r mé Simon, mʉr á bíle nzǎm nyá yɨ́, nyʉ́ʉ́ mʉ́má nzě nî. Nye á bě e ntǎʼ albâr, lwɨ́ŋlá le lɔbína yé á be ɨ́ buo día yɨ́. Nye nzě sʉ̌ Yésʉs lɔbína yaá ɨ́ lʉ̂, jɔʼ nyé á be, nye dína lɨ́ ede yɨ́. Mpʉ ómpʉ́n bé, bé á bee syɛ́ɛla yaá yɨ́, bê kʉ́ nzě bene. Bé ó: «Wáǎ nyɔm nyé bá sǎm dimé lɔbína yɨ̂, mbi wɨ̂ʼ yɨ́? Yê kʉ jala ó, bɛ́ma ó bɛ́máa e tâŋ mɔnɨ́ ɨ́ buo buo, kab míndyêbndyéb!»
Yésʉs ntɔ̂ʼ gʉ́ǎ sá bé á lwibla páʼ nyɔ́ɔ́ yɨ́. Nye ntɔ̂ʼ dî e bé ó: «Bɨ̌n bá ntɨ́ʼ mʉ́má nyâʼ ɨ́ yé? Nyɨ́ sâ mé sá dí ɨ́ buú mbɨa yɨ́. Ebě, bɨ̌n e baántéʼenteʼe o bʉ̂r ó dí ɨ́ jɔʼ yɨ́yɛ̂h. Mɨná bɨɛ bé ákóʼó di gá jɔʼ yɨ́yɛ̂h. Jɔʼ nyê sʉ mé múló ménɨ̌ ɨ́ nyʉ̂l yɨ́, nye sá nó ó ɨ́ lɔ̌b dɨlá yâm. Mě lɛ́ɛ́ bɨ́n lɨ́ otyeetye ó, súm yɨ́yɛ̂h bé ngá túnǒ Mbɨambɨa Lɔ́ɔ́ wɨ̂ʼ ɨ́ sí yɨ̂ʼ yɨ́yɛ̂h yɨ́, syɛ́ɛla mʉ́má nyâʼ sá yɨ́, yé ólɛ́ɔɔ ntémé. Bʉr, bé ósímsa nyé tɨ̂.»

Nó ó, nyʉ́ʉ́ mpʉ́n ɨ́ sɔ́má bʉ̂r kám le obá á be e díe ó, Yʉ́das Iskariôt nyá, á nze tô kwá ojwɨ́ɨ o mpáh Nzyɛ̌m. Nye ó: «Bɨ̌n bé ódwe mé yé, mé bɛ́má bɨ́n Yésʉs nó?» Bé ntɔ̂ʼ kɛʼ nyé minzaŋ mí mɔnɨ́ mekám mélɛ̂l. Táare ɨ́ jɔʼ yaá, nye ntɔ̂ʼ sáǎ mpǎŋ jɔʼ ébɛ́ma nyê.


Ɨ́ móhó ésóʼ é nzɔ́ɔ bé á de biblêr bi dí abe e levure bí nyɨ́, ompʉ́n mé Yésʉs nzě sîhlě bǎʼ e né, bê nzě lɛ́ɛ ó: «Mede mé Páska gó ngá de má, gǒ kpɛ̌l ó, bɨ̌h jámaa go mǎ wó?» Nye nzě yala e bé ó: «Tóʼ gá ɨ́ nkana kwá nyʉ́ʉ́ mʉ̂r. Bɨ̌n a lɛ́ɛ́ e né ó: “Lɛ̂ʼla lɛ́ɛ́ ó, jɔʼ yé, yé mû ó kúno epyâl. Nó ó, bé le ompʉ́n bé, bé ónzě bwal nzɔ́ɔ Páska ó kwá nyǒ.”» Ompʉ́n bé ntɔ̂ʼ sâ mpʉ̌ Yésʉs á lɛ́ɛ bé yɨ́. Bê nzě jâm méde mé Páska.
Ɨ́ bíí kʉ̌ʼ nɛ́ɛ: Yésʉs, bé le ompʉ́n kám le obá bê nzě diŋɔɔ sí. Jɔʼ bé á be, bé mû lɨ́ ede yɨ́, Yésʉs ntɔ̂ʼ lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, mʉr ngwár ɨ́ sɔ́má yɨ́n óbɛ́ma mê.» Nyʉ̂l ntɔ̂ʼ tyɛʼ bê. Bê nzě gɔ́na le edî nyé mʉr ngúngwár ó: «Dâ ɛ̌, yé abe mê, yé abe nó?»
Nye ntɔ̂ʼ yala e bé ó: «Yé ó mʉr bɨ́h e nê twǎr épulo ɨ́ sʉ́á gwár nyá. Nyɨɛ ó ngá bɛ́ma mê. Yé ó nó. Mwân mé Mʉr ódwě mpʉ yé á boo be cɛmá ɨ́ lɔ̌b wé yɨ́. Sâ gwár, nkoó, nye ó e mʉr ngá bɛ́ma Mwân mé Mʉr nyá! Yé á gwa mbɨa mʉr waá ó, mpa nye á bé abyɛ̂l!»
Nó ó, Yʉ́das, mʉr á be lɨ́ edǐ bɛ́ma nyé nyá, á nze lɛ́ɛ e né ó: «Lɛ̂ʼla, abe mɛ̂m da! Yé abe nó?» Nye ntɔ̂ʼ yala e né ó: «Yé ó gó mʉr tɨ̂ʼ dí sí lɛ́ɛ̌ nɨ̌.»


Ɨ́ mpʉ bé á be, bé mû lɨ́ ede yɨ́, Yésʉs ntɔ̂ʼ nʉǎ blêr, dwě Nzyɛ̌m nzyǒo, pɛ̂ʼ yé bipêh, dwe ómpʉ́n byǎ. Nye ó: «Nʉaa gâ. Bɨ̌n a dê. Nyʉ̂l nyǎm ó nyɨ̂.» Píe tɨ̂, nye ntɔ̂ʼ nʉǎ bélé ményoʼ mé rezɛ̂ŋ, dwě Nzyɛ̌m nzyǒo, ntɔ̂ʼ dwe bé yǎ. Nye ó: «Déʼ gâ, bɨ̌n óbɛ̂h!» Ebě, metié mâm ó mâ, metié mû lɨ́ eswɨɨ lɨ́ esú ó, Nzyɛ̌m tyélɨɨ saá páʼ nyɔ́ɔ́ le bʉr ɨ́ buo buo má. Nyě tyél nyé ó, nye nkʉ̂ pɛʼ bé bibaa bí ébébe byɔ́ɔ́. Me lɨ́ elɛ́ɛ bɨ́n ó, me ákǎ báʼǎ de ményoʼ mâ, táare ɨ́ báánâ, tó pyâl ɨ́ jɔʼ mɨ́ná ngá kǎ de gá maá medwân ɨ́ sí mé Sɔ́ŋ wǎm yɨ́. Bê nzě dyɛɛ méjéme méswɨ̂ʼlʉ. Bê nzě mɔǎ sûm yaá, tóŋɔɔ lɨ́ Ecwɨ́ʼ lé ólivier.
Yésʉs nzě lɛ́ɛ e bé ó: «Me óbe ɨ́ pum wɨ̂ʼ mûh ó, ebɔ̌ʼ lé óbɨma bɨ́n bɨ́bɛ̂h ɨ́ miléme lɨ́, ebě, yê cɛmá ó: Me ójʉ̂ pála binteme; ekul e bínteme laá, lé omyamǎ dwǐʼ e dwǐʼ. Sâ gwár, ɨ́ jɔʼ mé ngá pah yɨ́, me ósámle, tó bóno bɨ́n ɨ́ sí Galilê.»
Pétrus, nye e né ó: «Damá jóʼǒ lɔ̌b gô, wé óbɨma bʉ̂r bɨ́bɛ̂h ɨ́ miléme le esâ ó, bé sâʼ ebébe, mɛm, me ákóʼó bɨm ébɔ̌ʼ.» Nó ó Yésʉs á lɛ́ɛ e né ó: «Me lɨ́ elɛ́ɛ gó lɨ́ otyeetye ó, gua, ɨ́ pum wɨ̂, njʉ́m kúo apǎ kwâʼ, go ókɛ́la mé nzɔʼ lɛ̂l.» Pétrus ntɔ̂ʼ lɛ́ɛ e né ó: «Yé damá pyâl mé ó, mɨná e go dwêʼ sɔ́má, me ányamlě kɛ́la gô.»
Bʉ́ʉ́ bɨ́bɛ̂h ntémé, bé á lwib ó nó.

Píe tɨ̂, Yésʉs nzě tô le ompʉ́n bé gúmó dí ejébɔɔ ó, «Gétsémane» yɨ́. Yésʉs, nye e bé ó: «Diʼee gá wâʼ sí, jɔʼ mé dína lɨ́ etó jɨʼla e Nzyɛ̌m yɨ́!»
Nó nyé á nze jébe Pétrus ndu e bwán mé Zebedê obá, bé e boo nɔ́ɔ́ ntɔ̂ʼ tô. Nyʉ̂l mé Yésʉs ntɔ̂ʼ tyɛʼ. Nye nzě syɛ̌l bá. Nye ó: «Lémé wâm, wê le ebúʼ, mpʉ̌ sá lɛ́ɛ́, me ópuro e tɨ̂. Diʼee gá wâʼ lɨ́ emo e me. Diʼee gá ɨ́ doho.» Nye nzě bá tô dóló, ntɔ̂ʼ kúrwo sí, píʼe mpóm ɨ́ bibwǎh, nzě jɨʼla e Nzyɛ̌m. Nye e né ó: «Dâ ɛ̌, yé óbána nó, sáʼ ó me l'ayɨ́ bɔma e mitúú mî. Sâ gwár, yé díʼee, abě mpʉ mé dí ekpɛl yɨ́, njɨ mpʉ gó dí ekpɛl yɨ́.»
Nye nzě gbɔlwa sí, tô nko ómpʉ́n bé, bé á be yɨ́, tó kœb bé ɨ́ bijô. Nye e Pétrus ó: «Nzê yé abána gó lɨ́ edi ɨ́ doho tâŋ ewala egwár e me ɛ̌? Diʼee gá ɨ́ mpʉ̂n. Jɨʼlaa gâ, bɨ̌n ámû jaá bóblɔɔ, bɨ̌n ntɔ̂ʼ duma. Sísǐm mʉ̂r, wé damá gwɨ̂m ésâ bísyɛ́ɛla bimpâ, bipúno bíɛ, byé ɨ́ tyɛʼ.»
Nye ntɔ̂ʼ báʼǎ tô ɨ́ jɔʼ mbá, tó jɨʼla e Nzyɛ̌m. Nye e né ó: «Dâ ɛ̌, yé óbe, abána ó, mitúú mîʼ láŋaa me, me l'abɔma e myé nó, sáʼ mpʉ̌ gwɨ́má yô dí yɨ́.»
Nye nzě báʼǎ búla, tó kœb bé ɨ́ bijô, ebě, mîh, mé á be ɨ́ buú ntie bê. Jɔʼ yaá ó nyé á líʼe bê, nzě báʼǎ tó jɨʼla ɨ́ jɔʼ lɛ̂l, lɨ̂lɛɛ̌ njɨ mekǎn mempwár. Nó nyé á ka tô nko ómpʉ́n bé, bé á be yɨ́. Nye ó: «Nzê bɨ̌n bɨɛ bé ójaá kǎ didi ó, njɨ ɨ́ bijô le egbala ɨ́ jɔʼ yɨ́yɛ̂h ɛ̌? Jɔʼ, yé múo nzě kúnwo. Mwân mé Mʉr, nyɨ́ bɛ́mɔɔ kwá osyɛ̂l o mísyóm. Gbɔlwaa gá sí. Ncʉ̂ʼ gâ. Jwɛ́ʼɛ́ɛ́ gâ. Mʉr bɛ́má mé nyá ó dí enzě nɨ̌!»

Yésʉs dína lɨ́ elwib nó nɛ́ɛ: Yʉ́das nzě pyâl le entumo e bʉ̂r. (Yʉ́das á be ó mʉr ngwár lɨ́ ompʉ́n kám le obá mé Yésʉs.) Bʉr o b'á nze bá, bé á nze ó, bâʼ, le opasoŋ; bʉ́ʉ́, e mimbɨ́ŋ. Ojwɨ́ɨ o mpáh Nzyɛ̌m le otɔ́má bʉ̂r o b'Ɨ́zraɛ̂l ó b'á lómo bê. Yʉ́das, mʉr á bɛ́ma Yésʉs nyá, á si boo tɨ́e bʉr baá ó: «Bɨ̌n bé ódweʼe nyé ó, mbi wɨ̂: mʉr bɨ́n ngá bee mé lɨ́ edû koo ékœ́h lé nyá, nye ó nɨ̌. Mɛ́rɨ́ɨ́ gá nye.» Lě Yʉ́das á kʉ pyâl, le nyé á sîhle ntémé bǎʼ e Yésʉs, ntɔ̂ʼ lɛ́ɛ ó: «Lɛ̂ʼla, me lɨ́ ebâʼ e go!»
Nye ntɔ̂ʼ dû koo ékœ́h lé ɨ́ swííá. Nó ó Yésʉs á nze yala e né ó: «Só wǎm, sá gô nze sá yɨ́, kaá sâ yê.»
Bʉr baá ntɔ̂ʼ sîhlě nkǒ Yésʉs á be yɨ́, mɛ́rɔɔ nyê. Nyʉ́ʉ́ mʉ̂r á be bé e boo Yésʉs sɔ́má nyá, nzě gœ̂m pɛl yé lɨ́ ebɔ́m, tíʼe syɛ̂l mesâ mé njwɨ́ɨ opara egwǎl ɨ́ pyâ. Yésʉs ntɔ̂ʼ lɛ́ɛ e né ó: «Swamaǎ pɛl yô lɨ́ ebɔ́m, ebě, baá bɨ́bɛ̂h dí elwímla le opasoŋ bá, bé ójʉ́ŋɔɔ ntémé ó, le opasoŋ. Nzê go bé agʉ́a ó, mé jɨʼla e Sɔ́ŋ wǎm nó, nye ólómlo mé beéngeles otɔ́ɔ́sin kám le obá ɛ̌? Syɛ́ɛla yɨ̂, yɨ́ lóŋlǎ sá dí micɛmá ɨ́ Mekaná mé Nzyɛ̌m yɨ́. Yê cɛmá ó, yé ɨ́ jala le esyɛ́ɛ nó.»
Jɔʼ yaá ó Yésʉs á nze lɛ́ɛ le sɔ́má bʉ̂r yaá ó: «Bɨ́n pa nze mɛ́r mé le opasoŋ le mimbɨ́ŋ nó, nzê bɨ̂n jóʼó ó, me ó nzilngǎn? Me á bɨbe ó, dʉ́ó lɨ́lɛ̂h ndîndǐl tʉ́ŋlʉ̌ mpáh Nzyɛ̌m, lɨ́ elɛ̂ʼle bʉ̂r. Bɨ̌n bé á bé amɛ̂r mê. Nó ó, syɛ́ɛla yɨ̂, yê ka syɛ́ɛ́ ó mpʉ ógwíha o mílɔ̌b bé á cɛma ó, yé díraa yɨ́.»
Píe tɨ̂, ompʉ́n bɨ́bɛ̂h, bé ntɔ̂ʼ líʼe nyê, sîl ékpɛ́ɔɔ.

Bʉr o b'á mɛ̂r Yésʉs bá, bê nzě tóŋɔɔ e né kwá mé Kayɨáfa, njwɨ́ɨ opara. Bʉ́ʉ́ ólɛ̂ʼla o métié le otɔ́má bʉ̂r o b'Ɨ́zraɛ̂l, bé ntɔ̂ʼ gwɨ̂hlǎ sûm yaá. Pétrus á be ó lɨ́ edû nyé ká ká píhe, nze ɨ́ nze nze, ntɔ̂ʼ nî tʉ́ŋlʉ̌ ebɛhɛɛ mé njwɨ́ɨ opara, ntɔ̂ʼ di sí bǎʼ e bisója gúmo gwár, lɨ́ esáa ébeě mpʉ yé ngá sûʼla yɨ́.
Ojwɨ́ɨ o mpáh Nzyɛ̌m le bʉ́ʉ́ bʉ̂r ó bʉ̌m nɨ́nɨ́ɨ́, bé á be ó lɨ́ esáa ékǎn bé búʼó Yésʉs lɔ̌b e tɨ̂ʼ lɨ́, bé nkʉ̂ jʉ̂ nyê. Sâ gwár, bé á bé akœb lê. Bʉ́ʉ́ bʉ̂r ɨ́ buo buo, bé á si nze lɨ́ elɨlaʼ nyé milɔ̌b. Píe tɨ̂ʼ ó bé á ka kœb bʉr obá bé á lɨ̂lɛɛ ó:
«Nye á lɛ́ɛ ó, nye ógbɛ́ɛ mpáh Nzyɛ̌m, ntɔ̂ʼ sumo nyaá swîh njɨ ɨ́ melú mélɛ̂l.» Nó ó njwɨ́ɨ opara á nze mɔa sí, dî e né ó: «Gó ayala? Wáǎ mbǐ purá bʉ̂r bâʼ dí epur gó wɨ̂?» Yésʉs á jaa di ó, njɨ ɨ́ mes. Nó ó njwɨ́ɨ opara á nze lɛ́ɛ e né ó: «Me lɨ́ entɛŋ gó minkâl ɨ́ díé mé Nzyɛ̌m dí kublakúbla nyá ó, go lɛ́yɨɨ bɨ̌h, nkʉ̂ go ó dí Mʉ̌r Nzyɛ̌m á lœm múló mé jwɨ́ɨ nyá, mʉr dí Mwân mé Nzyɛ̌m nyá?» Yésʉs ntɔ̂ʼ yala e né ó: «Yé ó go mʉr tɨ̂ʼ dí sí lɛ́ɛ̌ nɨ̌. Me lɨ́ elɛ́ɛ bɨ́n, táare ɨ́ báánâ, bɨ̌n bé óbee Mwân mé Mʉr, ndîndǐl ɨ́ páʼ mbó éjʉ́m mé Nzyɛ̌m nkul nyɨnyɛ̂h . Bɨ̌n bé óbee nyé lɨ́ enze, témé dwiné.» Nó ó njwɨ́ɨ opara á nze nya kán wé. Nye e né ó: «Nyɨ́ sâ Nzyɛ̌m nkěh! Mɨná bé akǎ báʼǎ sáa gá bʉr o ká nwâhle nyé bá! Bɨ̌n bɨ́ jóʼo ɨ́ báánâʼ mpʉ nyé dí esâ Nzyɛ̌m nkěh yɨ́. Bɨ̌n nyɨɛ́ pahlě lɔ̌b wɨ̂ʼ nyá?»
Nó ó bʉ̂r, bé á lɛ́ɛ ó: «Nye ɨ́ jala le ejʉ́ŋɔɔ.»
Nó ó bʉ́ʉ́ bʉ̂r ɨ́ sɔ́má yɔ́ɔ́ bé á nze syɛɛ nye metyéelé ɨ́ mîh le etû nyé bikúra. Bʉ́ʉ́, bé á ŋmɨŋmɛ̂h ó nye mempɛ̂h. Bé e né ó: «Krîst, twóóláá bɨ́h díé é mʉ̂r ŋmɛ́h gó nyá.»

Pétrus dína ndîndǐl ɨ́ kʉ̌l lɨ́ ebɛhɛɛ nɛ́ɛ: nyʉ́ʉ́ mʉ́má á séa e njwɨ́ɨ opara nyá, nzě pyâl gúmó nyé á be yɨ́, nzě lɛ́ɛ ó: «Go, go ntémé, go á be ó, bɨ̌n e Yésʉs, mʉr Galilê.» Pétrus ntɔ̂ʼ kɛ́la tɨ̂ʼ ɨ́ mpǒm bʉr bɨ́bɛ̂h. Nye e né ó: «Mé agʉ́ǎ sá gó dí ekpɛl élɛ́ɛ yɨ́.» Mpʉ nyé á be, nye mû lɨ́ etô lɨ́ ebé é kóʼ mbɛ̌r mé pára waá yɨ́, nyʉ́ʉ́ syɛ̂l mesâ ntémé á baʼa bee nye nyá, ntɔ̂ʼ lɛ́ɛ e baá bé e boo nɔ́ɔ́ bé á be bá ó: «Mʉr nyâ, bé e boo Yésʉs mʉr Nazarɛ̂t ó b'á bɨbe.» Nye ntémé ntɔ̂ʼ báʼǎ kɛ́la le entaa mínkâl. Nye e né ó: «Mé agʉ́a mʉ̂r nɨ̌.»
Abea nɛ́ɛ: bʉr o b'á be tɨ̂ʼ bá, ntɔ̂ʼ báʼǎ lɛ́ɔɔ̌ Pétrus ó: «Yê tyeetye ó, go ó mʉr sɔ́má yɔ́ɔ́, ebě, etyél lô, lé lɨ́ egwîh mbi mʉ̂r gô.» Nó ó Pétrus á nze baʼa kɛ́la. Nye e bé ó: «Nzyɛ̌m ntɨ́ʼɨɨ me, yé bé mě lɛ́ɛ́ ó bibɛr nó! Mé abá gʉ́a mʉ̂r waá!» Tyé e tyé yaá, njʉ́m kúo nzě kwâʼ. Jɔʼ yaá ó Pétrus á símsa sá Yésʉs á lɛ́ɛ e né ó: «Njʉ́m kúo dína apǎ kwâʼ, go ókɛ́la mé nzɔʼ lɛ̂l» yɨ́. Nye nzě tô kʉ̌l, ntɔ̂ʼ gɔ́na le ejɨ ɨ́ buo buo.

Höre Matthieu 26