Obolo - 2005 Edition (NT) Drama

Atata Tiofilọs ogwu ògbegbe umin, ike owu oriọọn̄be, owuwa ene mîwuuk lek ige mfufuk ofolek otutuuk inu òmọmọnọ irek me etete kiji. Ebi ìgege mfufuk chi, ege inu eji enọbe me otu ebi ìsasa chieen̄ kiban̄ imun̄ inu cha okirọ bene me ibebene, mè ikitumu si inu chi isibi inyi ebi ene. Eya orọ, mgbọ emi me lek n̄a mwuwuuk lek ifiat mgbọ iwọlọ iweek ubọk otutuuk inu chi osabe irọ bene me ibebene, mmun̄ si ibe ke îgbe ibe emi ǹge ubọk inu chi orọbe, me onineen̄ me onineen̄, ǹjet owu, inyi owu òriọọn̄ atikọ òkup me emen otutuuk inu etumube ijeen̄ owu.

Me mgbọ ogwu ubọọn̄ Erọdu okikpulu agan̄ Judia, îkaan̄ ogwu ngwugwa ge òkukup, ekigwen Jekaraya. Ọmọ ìnan̄a me owot iman ebi ngwugwa eyi agan̄ kè Abija ogwu owot iman kè Erọn . Nwa ogwu ngwugwa yi ìre Elisabet, ogwu ònan̄a si me owot iman kè Erọn. Jekaraya mè Elisabet mîluk ugwem òtatat me isi Awaji, mè ikirọ otutuuk nteme mè ikan geelek Awaji onyibe, kpunu geege ema erọbe ilọ. Ire, ema kpekaan̄ gwun̄ geege, mije, Elisabet ìre òra. Ema ene iba cha si mîkan enenen.
Me mgbọ ge, irek isisi ikwaan̄ me Uwu Mbuban onenikana ire lek ebi owot iman ebi ngwugwa eyi agan̄ kè Abija. Ike orọmijọn̄ ebi ngwugwa okupbe, eneniroon̄ nriroon̄ iweek ogwu òbosi iwọp nsensi me Ere Mbuban me Uwu Mbuban, mè inisa me ikeya igobo Jekaraya ibe isi. Mgbọ îrebe mgbọ ekiwọp nsensi, otutuuk ebi ìtititiin̄ ibenitọbọ ebum inyi Awaji ekup me oyet ikiriaak uriaak, mè itele Jekaraya gaalek me agba lek ntook ere îkupbe ikiwọp nsensi me emen Uwu Mbuban.
Ogwu osat Okumugwem ge okakana isibi me isi kan̄, mè ikeke me agan̄ ulom ntook nsensi ya. Mgbọ Jekaraya omun̄be ogwu osat ya, iririki, ukpook otetet. Ire, ogwu osat ya otutumu inyi ọmọ ibe, “Jekaraya katet ukpook, mije, Awaji înọ ida uriaak kwun̄. Elisabet nwa kwun̄ mônin̄ owot, mè iman gwun̄ enerieen̄ ge inyi owu. Owu mônyi gwun̄ ya erieen̄, Jọn. Gwun̄ ya môre inu unwọọn̄ mè ubelejit inyi owu. Imaman kan̄ môrọ si inyi owuwa ene enwọọn̄ unwọọn̄, mije, gwun̄ ya môre ikpele ene me isi Okumugwem. Ire, gwun̄ ya ìkpochak miin̄ gerep geege me otu, ìkponwọnwọ si unye miin̄ geege me ugwem kan̄. Ekwukwu Mbuban môjot gwun̄ ya me emen, bene me emen owot ogwu uga. Gwun̄ ya môrọ inyi owuwa ebi Ijeren egwu ekom egọọk Okumugwem Awaji kiban̄. Îre ọmọ obodasi inu sabum Okaan̄-ene ònonu. Isinu, môsa ojelek Ekwukwu mè ikpele unye eyi kè Ilaija ogwu nriran inu inisi ikwaan̄. Môgwu ejit ute ikom ifo lek ebi bọn, mè igwu ejit ebi unye-ibot ikom ifo lek iriọọn̄-inu eyi ata irọrọ, mè irọ inyi ebi enen̄ebe isun̄ inyi Okaan̄-ene ekup me mbem-lek ekekpọ inunu Okaan̄-ene.”
Jekaraya onenido ogwu osat ya ibe, “Ìre emi m̀bajeje iriọọn̄ ibe ke inu yi môrọ kubọk owu otumube? Mije, mgbọ keyi, emi ìre oka enerieen̄, nwa n̄a si îkan enenen.”
Ogwu osat ya ofọfọọk ọmọ ibe, “Emi ìre Geberen, ǹkikup me isi Awaji. Îre Awaji oria emi ibe emi ǹnenlook owu ata etip yi. Mgbọ keyi, ike owu okachieekge ikọ n̄a, eyi kpolọbe irọrọ iso me mgbọ mgbọ kan̄ môkembe, owu mônin̄ mbuuk, òkpoyaka ikọt itumu ikọ bene me mgbọ keyi si re usen inu yi môrọbe iso.”
Otutuuk mgbọ ya, ebi ene mêkikup ikpọ Jekaraya, mè ikikeek inu òrọrọ inyi ọmọ ikup ifiin̄ me emen Ere Mbuban ikeya. Mgbọ Jekaraya onan̄abe isibi inu, ìkakọt ìsan̄a amọn ìnyi ema. Ìyaka ikisa ubọk ubọk ikitọ ijeen̄ ema. Ema erọriọọn̄ ibe ke îra imun̄ ilaak ọkpọchieen̄ me emen Ere Mbuban. Jekaraya okpọkpọ ikup ikeya mbuuk.
Mgbọ Jekaraya osibe ikwaan̄ kan̄ isan̄a me Uwu Mbuban, isisibi ifo. Ìkajọn̄ọ mgbọ, Elisabet ogwu nwa omọmọnọ onyan̄, mè ichit me uwu onyan̄ go, mè itumu ibe, “Okumugwem îrọ ikpele inu inyi emi. Cherekeyi, Okumugwem îjeen̄ emi imumechieen̄ kan̄, mè isan̄a emi esip me isi me etete ebilene.”

Me òso onyan̄ gweregwen Elisabet okupbe me owot, Awaji oraria ogwu osat, Geberen, isi Najeret me Galili, me lek obaak enenwaan̄ ge ikariọọn̄ge enerieen̄, ekigwen Meri, ogwu gwun̄ enerieen̄ ge ekigwen Josefu, otetbe itele ibodo me lek nwa. Josefu yi ìnan̄a me owot iman ogwu ubọọn̄ Debit. Ogwu osat ya osisi lek gwun̄ enenwaan̄ ya, mè itọp ọmọ amọn, ibe, “Nnyi owu amọn, owu ogwu Awaji omabe enenen! Okumugwem òwa melek kwun̄.”
Ikọ ya otetet Meri ukpook enenen. Ibebene ikikeek inu amọn ya osibibe. Ogwu osat ya onenitumu inyi ọmọ ibe, “Meri, katet ukpook. Awaji îkeke inyi owu. Owu mônin̄ owot, mè iman gwun̄ enerieen̄. Owu mônyi gwun̄ ya erieen̄, Jisọs. Gwun̄ ya môre ikpele ene, mêgwen ọmọ Gwun̄ Awaji Ogwu Òbebene Ichit. Okumugwem Awaji môrọ gwun̄ ya ubọọn̄ inyi inibọkọ irek ubọọn̄ kè Debit ogwu ute. Gwun̄ ya môkikpulu otutuuk ebi owot iman kè Jekọp ire mgbọ ikakaan̄ge itata. Mkpulu kan̄ ìkpokaan̄ okputut.”
Meri onenido ogwu osat ya ibe, “Ìre inu yi ìbojeje irọ? Mije, emi ǹkariọọn̄ enerieen̄.”
Ogwu osat ya obebe ọmọ, “Ekwukwu Mbuban mônu me lek kwun̄, unye Awaji Ogwu Òbebene Ichit môkana ichit owu. Mije keya, gwun̄ ya owu oboman môre gwun̄ òkup mbuban, mêkigwen ọmọ Gwun̄ Awaji. Ofifi si, Elisabet, ogwu uwu kinyi, înin̄ owot me ukan. Me mgbọ keyi, owot onyan̄ gweregwen okup me lek ogwu enenwaan̄ ya, ogwu otutuuk ene ekigwen ogwu òra, mije, kpunu inu geege òyọyọt igak Awaji irọrọ.”
Meri onenitumu inyi ogwu osat ya ibe, “Emi ìre gwun̄ usun̄ Okumugwem. Ike owu otumube, nchieek, ikup si ikeya melek n̄a.” Mgbọ Meri otumube ikọ yi isan̄a, ogwu osat ya otetele ọmọ.

Meri ogwagwat lek ineen̄ lek, mè inan̄a ije isi gwun̄ ama ere Jekaraya mè Elisabet elukbe, me inyọn̄ ogoon̄ me agan̄ Judia. Mgbọ îrebe ama ya, ijeje isi inin̄ uwu kè Jekaraya, mè imun̄ Elisabet, mè itọp amọn. Elisabet inọnọ amọn kè Meri, gwun̄ òkup me owot kan̄ okpọkpọ itọp lek ikana. Ekwukwu Mbuban oninin̄ ijot emen kè Elisabet. Itataan̄ ukpo itumu inyi Meri ibe, “Owu ke Awaji ogbana ichit me etete otutuuk ebibaan̄. Gwun̄ yi owu oboman si ìre gwun̄ egbanabe. Jei, ìre umin òkup ikeyi ìjeje inire emi lek, ibe ke owu nga Okaan̄ n̄a oyaka ikinu inikpọ emi? Mgbọ yaage nnọbe ida amọn kwun̄, gwun̄ òkup emi me owot okpọkpọ inwọọn̄ unwọọn̄, mè itọp lek ikana. Awaji îgbana owu, mije, owu ochieek ibe ke ida ikọ Okumugwem môrọ iso.”

Meri onenitumu ibe,
“Ibot ejit n̄a îtọn̄ Okumugwem.
Emi nnwọọn̄ unwọọn̄,
mije inu Awaji ogwu Unyan̄a n̄a
orọbe inyi emi.
Mije, Okumugwem ìkawuuk emi,
usun̄ kan̄ enenwaan̄ ogwu irek kan̄ osikibe.
Bene me mgbọ keyi fo isi,
otutuuk ebilene me ukot geelek
mêkigwen emi ogwu egbanabe,
mije, Awaji ilile îrọ
ikpele inu inyi emi.
Erieen̄ Awaji îkup mbuban.
Me ukot me ukot,
Awaji îkikaan̄ ejit nsan me lek
ebi geelek ìkinyi ọmọ ulibi.
Awaji îsa unye kan̄ isi ikpele ikwaan̄.
Îyiyala ebi ìkigumu lek,
mè ijijaka nkeek kiban̄ geelek.
Îsan̄a ebi ibot mkpulu
me inyọn̄ ogboon̄ mkpulu kiban̄,
mè ibene ebi irek kiban̄ osikibe
ifo inyọn̄.
Îsa owuwa ata inu inyi
ebi uraafiọọn̄ okitaka,
mè ilap ebi ìbọbọọn̄ ubọọn̄
isan̄a ukpọk ubọk.
Îtap ubọk inyi ebi kan̄, ebi Ijeren.
Ìkawuuk ikakaan̄ ejit nsan me
lek kè Ebereyam mè bọn
owot iman kan̄ ire mgbọ geelek,
kubọk îchieekbe use inyi ebi
nte nte kiji me ukot ikaan̄.”
Meri îgọọk Elisabet ikup iso onyan̄ ita sabum înigwu ikom ifo Najeret.

Onyan̄ isoso me lek kè Elisabet, imaman gwun̄ enerieen̄. Ebi uwu kiban̄ mè ebi melek kiban̄ elukbe me ere ge enọnọ ikpele ata inu yi Okumugwem orọbe inyi Elisabet, mè inu inigọọk ọmọ inwọọn̄ unwọọn̄.
Òso egwe jeeta, ema enunu si ibenigọọk ifieek gwun̄ ya afi, mè iben me ejit isasa gwun̄ ya isan̄a Jekaraya, ogwu ute. Ire, nga gwun̄ ya otutumu inyi ema ibe ke kpebesa gwun̄ ya isan̄a ogwu ute; ke ebegwen gwun̄ ya Jọn. Ema edodo ọmọ ibe, “Ìre ekene okichieek erieen̄ keya me uwu kinyi?”
Ema enenisa ubọk ubọk itọ inyi ogwu ute ibe mè ìre ebegwegwen gwun̄ ya ye? Jekaraya osasa ubọk ubọk itọ ibe enyi ọmọ uwot ige-inu. Mgbọ esabe uwot ya ijet, igege ibe, “Erieen̄ kan̄ ìre Jọn.” Inu ya okeke otutuuk ene chieen̄. Mgbọ yaage alọm kan̄ otọtọn̄ọ, ibebene ikitumu ikọ, mè ikitọn̄ Awaji. Ukpook otetet ebi ife cha ìnunu enenen. Etip inu chi òrọrọ otataan̄ ikana otutuuk agan̄ Judia ya òkup me inyọn̄ ogoon̄. Ebi ìnọnọ ekekibe, “Ìre kpasi gwun̄ ire eyi? Sà ìre gwun̄ yi ìbokana keke mọnọ?” Mije, otutuuk ene mîmun̄ ibe ke ubọk Okumugwem me lek gwun̄ ya okupbe.

Ekwukwu Mbuban onenijot emen kè Jekaraya, ibebene ikiben nriran ibe,
“Itọn̄ ikup inyi Okumugwem,
Awaji ebi Ijeren,
mije, înu ininyan̄a ebi kan̄,
mè ifaka ema isibi.
Înyi eji ikpele Ogwu Unyan̄a
inan̄a me ototun̄ ukan̄ kè Debit
ogwu usun̄ kan̄,
kubọk îtumube inan̄a me otu ebi
nriran kan̄, karake ukot ikaan̄,
ibe ke ọmọ mônyan̄a eji isibi
me ubọk ebi ochicha kiji
mè ebi geelek ekamage eji;
ke ọmọ môkaan̄ ejit nsan me lek
ebi nte nte kiji,
mè ikeek inyan̄a-ibot kan̄
eyi òkup mbuban.
Îchieek si use inyi Ebereyam
nte kiji ibe
ke ọmọ môsan̄a eji isibi
me ubọk ebi ochicha kiji,
mè irọ inyi eji ekayaka ìtọbọ ebum
ìnyi ọmọ me ukpook,
mè isun̄ eji esese inyi lek kan̄,
inyi eji etana me isi kan̄ usen geelek
me ugwem kiji.

“Owu gwun̄ n̄a, mêgwen owu ogwu
nriran Awaji Ogwu Òbebene Ichit,
mije, owu obodasi ije
me isi Okaan̄-ene,
mè isi inen̄e oniin̄ isun̄ iban ọmọ,
mè isi ilook ebi kan̄ ibe
ke Awaji môtele ijo kiban̄ inyi ema,
mè isa me ikeya inyan̄a ema isibi.
Awaji kiji môsa me ejit nsan kan̄ inyi
eji ogwu unyan̄a ogwu mônube
me lek kiji kubọk ìre egwe owele
itoon̄ eji me lek,
mè isa utoon̄ ònan̄a me emen
inyọn̄ initoon̄ me lek otutuuk ebi ìluk
me emen ikpele udun, ebi ìkup me
emen ubọk mkpa mgbọ geelek.
Awaji môsa me ikeyi ijeen̄ eji
oniin̄ eyi esuuk.”
Gwun̄ ya okekimin me akpalek mè emen iriọọn̄-inu eyi Awaji, mè iluk me emen èwê mege ire mgbọ îsan̄abe lek kan̄ isibi ijeen̄ ebi Ijeren.

Höre Luk 1