TƆMSYAADƐ WOOSƐ 24
24
TƆMSYAADƐ WOOSƐ 24
1Yɔ ɔ̧t tal nɔɔn-gbunu Bɛtmaakwookya gbɔɔl mɔɔt bɔ Ananiyas tuur gɔ a Kaysariya. Zaatin hi Yahuduya ɗɛntɛ zaadɛ hi Tɛrtulus doo ya̧a̧mɛɛkya bɔ. Yɔ hi tuur a hɛbtzulya bɔ Felikus ge hi dɔg hinyɔ hi gɛ̧ɛ̧n nɛ Pol gɔ. 2Yɔ hi el Pol i, Tɛrtulus yɛɛl hinɔ gɔ gi gɛ̧ɛ̧nig gɔ anyɔ lɛ:
a Baa Felikus Doo gbɔɔlɛ, wi ɗɔɔtig rɔbtɔnɔ a mɔ gbɔlums dɔŋgo. Hinyɔ rēk a hɛbtyɔ gedu gɛ, hi gɛbsig a mɔ dɔŋgo. 3Hin wɔrɔ lab sɛw wi dak a mɔɔge a lɛl sɛw, wi wɛɛ wi gim baanik gbɔɔltɔnɔ. 4Taa an be mɔɔsum hi dɔgl kito, yɛrɛ baa, be zɔ̧mɔ, anyɔ mɔ gisiw ya̧a̧rmɛɛko, laksiwi dɔgl yɛrɛ kaasi.
5Wi zɛm wal yɛrɛ gi doo bɔbtin lɛlha̧tirgoyayɔ, gi sɔmbik Yahuduya wɔ waal du sɛw. Gii gi dood Nazarɛdya wɔ hi gɛ̧ksig gbɔnɔ zulya̧. 6Tɛb nɛ an gi ɓi̧i̧l Bɛtluk bɔ, wi wa̧a̧ge. [Ha̧a̧w nɛ an wi gbaasig dɔgl anyɔ maakdɔgl wi gi raako, 7wɛɛ laaya gbɔɔl mɔɔt bɔ Liiziyas zaa loog wi naan du hi tɛŋko, 8raa dɔglɔgɛ̧ɛ̧nikya wɔ hi zaa a mɔɔge. ] Gɔ mɔ watig hin hi zul mɔ, mɔ ɗɛɛ an mɔ mɛɛ dɔgl yɔ wi gig gɛ̧ɛ̧nik sɛw rɔbɔ lɛl a hinyɔ gɔ gi dɔgsum gedu.
9Yahuduya wɔ hi ɔks ya̧a̧ya̧ hi Tɛrtulus hɛw, hi raa a hɔɔ, hinyɔ dɔg sɛw gi rɔbo. 10Hɛbtzulya bɔ Felikus yaas Pol naanɛ a gi booya̧a̧. Pol dɔgɔ:
a be mɛɛ a wɛl kittɔnɔ mɔ gi ɗɔɔtig dɔglyɛ̧ɛ̧kya a hɛbt yɛrɛ gedu. Yɛrɛ be dag hato an be dɔks zul be hin hi kpoos esigi a mɔ muutdu. 11Yɔ be dɔɔ a Urusalima an be ɗɔbs Bɛto, dāār yɛms koobl daa eer gɛ. An mɔ tɛb dɔglɔ rɔbtɔnɔ mɔ zɛŋk anbɔ. 12Hí zɛ̧be a Bɛtluk du, zaabe a mɔksilluk du, zaa a waal gbɔɔl du, be ya̧a̧ gɔtingo hi doo za gɛ, zaabe a be sɔmbik dood saal gɛ. 13Wɛɛ hi ɗɛ̄ɛ̄ an hi zuun hinyɔ hi gib gɛ̧ɛ̧nik hi rɔb ɓɔri gɛ.
14Yɛrɛ hinyɔ gɔ be zunsum gɛrɛ: be gi woosig baa wi Bɛtya̧ hin hi gbɔnɔ za segyɔ hii gɔ hi el a gbɔnɔ gɛ̧ksilyɔ. Be ɗɔbsig maakdɔglyɔ Muusa bi̧i̧ a ɗɛɛrwol du hi Bɛtya̧a̧kɛŋkya wɔ ya̧nɛ wɔ hi bi̧i̧ sɛw be. 15Mɔkil benɛ a Bɛt ge riitin hi mɔkil ya̧nɛ yɔ hi ta̧a̧ her. Bɛt gí rɛms dood rɔ́bɛ hi dood ha̧a̧lɛ wɔ gi wɛɛ gi ɗunsihi a wɔrk du. 16Yɔ anbɔ be kɛɛko an kpoos be gi er a Bɛt muut du, hi a dood muutdu sɛw.
17Yɔ be tuu be ɔɔ Urusalima hɛbtɔ wɛl kittɔnɔ, be wɛɛ be rek hɔ ma an be kams dood be hii tusɛ, be gaa gaasɛ be wɛɛ be woos Bɛt maako. 18Yɔ be wook maak bɔ a Bɛtluk du anbɔ hi gul hi zɛ̧be, yɔ be da̧a̧s muul be gaasugɔ. Bé ɔ́ks nɛ hi dood saal gɛ, be taa nɛ nams gɔk gɛ. 19Yahuduya zaadɛ wɔ hi fu̧u̧ a Àaziya hi gidi be. Gi nɛ an hii hi zaa nɛ hi gɛ̧ɛ̧nib hin a mɔ muutdu gid hi gin hinza an hi dɔg be zulha.
20Zaabe, an dood wɔ hi gi dihɛ hi dɔgsum hin-a̧a̧b yɔ hi zɛm a be woo a ɔ̧tyɔ be erk nɛ a dɔglyɛ̧ɛ̧kyaya̧ wɔ hi muutdu gedu. 21Hi zɛm hin gbun yɛrɛ gii kpɔd: yɔ be erk hi muutdu be ɓooya̧a̧ be raa a yɔ be ɗɔbsig a Bɛt gi ɗuns wɔrkɛ gii ro, nɛ gisib dɔgl gbaak nɛɛko! Anbɔ.
22Hɔnɛyɔ Felikus mɛɛ Yeesu gbɔnɔ dɔgl rɔbtɔnɔ, raa
a laya wɔ gbɔɔlya̧ mɔɔt bɔ Liiziyas gɔ gi zaa ro, be ɔɔ dɔgl mɔ gbɛɛruko. Wɛɛ hɛks dood sɛw.
23Wɛɛ raa laaya gbɔɔl bɔ a gi ooge, gi ɔsig lɛlfɛɛtil kaasi, bɔgi ans naaza wɔ ha̧a̧hi zaak a ge gbɔnɔ an hi ɗansig hinyɔ ha̧a̧ge.
24Kuudu yɔ ɔ̧t kaasi talɔ, Felikus zaatin hi nistɔ Yahu-duya bɔ Durusila. Wɛɛ yaa doo elz Pol zaa. Wɛɛ lagsig ɗɔbsig dɔgl yɔ dɔg a Yeesu Kristu zulha. 25Hɔnɛyɔ Pol gi book hinwook riit dɔglɛ hi zul-ook dɔglɛ, hi dɔglyɛ̧ɛ̧k yɔ gɔ gi zaa kuudu dɔglɔ, Felikus bɛɛ lak anbɔ kolɔ tuugtu, wɛɛ raa Pol
a rekum kete, lɛl gɔ gi fɛɛb be elzum mɔ zaa ɓɛ.
26Hɔnɛyɔ Felikus gi gɔk anbɔ be, rum a Pol gi gaag tus an gi bisige, wɛɛ Pol be gaag gɛ be. Hinɔ gii gɔ gi gig waak elzig an hi bootinya̧a̧. 27Yɔ wɛl eer talɔ, Pɔrkiyus Fɛstus yɛr hɛbtzulya bɔ Felikus ɗɔɔtillɛlɔ an hɛbtzulya be. Yɔ Felikus ha̧a̧g an gi gɔ Yahuduya wɔ kpoosya̧ gi harihi, wɛɛ ɔɔ Pol a luknɔ du.
Valgt i Øjeblikket:
TƆMSYAADƐ WOOSƐ 24: NTD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Doyayo New Testament © Bible Society of Cameroon, 1991.