TƆMSYAADƐ WOOSƐ 10
10
TƆMSYAADƐ WOOSƐ 10
1Walza laaya gbɔɔl giro, nuŋgɔ a Kɔrnɛliyus gi waak a Kaysariya, gin laaya dɛɛt yɔ̧ɔ̧lɔ nɔɔnɛ. Gɔ hi elik a Itali layaadɛyɔ. 2Walɔ gi fɔk Bɛt rɔbtɔnɔ hi hoobo hi raatɔ sɛw, gɔ gi gaak Yahuduya ya̧a̧rya wɔ gaas gbɔɔltɔnɔ, wɛɛ gi waak Bɛt zɔ̧ki.
3Ɔ̧tyɔ gi a naaba̧a̧n du gbɛn Bɛtwalsɛr za raasig hinza a gɛrs du bɛttɔnɔ gul gi lɛl du, elige
a Kɔrnɛliyus!
4Yɔ lag anbɔ wɛɛ see Bɛtwalsɛr bɔ hi hooblɔlɛ warige
a Ɗɛntyɔ, kɔm ri?
Bɛtwalsɛr bɔ wɛɛ raage
a zɔ̧k mɔ hi gaas mɔ sɛw tuur a Bɛt muutdu, Bɛt ta̧a̧ta̧. 5Yɛrɛ yaam dood a Zope hi elz Simɔŋ yɔ nuŋgɔ zaa a Piyɛr gi zaa a mɔɔge. 6Gi waak a Simɔŋ za zoolnukya bɔ gi raa du, raaɔ sɛ̧ɛ̧b gi a mɛmbal gbɔɔl ya̧di.
7Yɔ Bɛtwalsɛr bɔ bɛɛsig raak anbɔ rekɔ, gii wɛɛ elz woosyaadɛ ɔ̧ɔ̧ eerɛ hi laaya za gbun yɔ gi fɔk Bɛt hi gbɔnɔ yɔ gi woos wootingo elo, fɔksihi hin sɛw. 8Yɔ fɔksihi hinyɔ daa sɛw gi da̧a̧, yaahi hi rek gɔ a Zope.
9Yoosugɔ yɔ hi gi gbɔnɔ di hi sɛ̧ɛ̧bik tuurik a Zope waal gbɔɔl bɔ dɔŋgɔdi, Piyɛr kar lukzul ha a lurk teesdu gi zɔ̧k Bɛto. 10Yɔ a̧a̧kil gig ha̧a̧k an gi le leesɛ, hi gisig hindɔɔko an gi le be, Bɛt zunsig hinza gbɛn a gɛrs du.
11Gbɛn bɛtha kpɛ̧ɛ̧rɔ, gbɛn hinza an gban gbɔɔl fɛɛti ha̧y lɛl nasɔ gi sizig an gi tuur hɛbtdi. 12Namb wɔ hi naŋkar wɔ hi gi a hɛbtdi dɔ̧ɔ̧tya̧ sɔmsɔm hi nɔɔs bɛtha sɛw dɔ̧ɔ̧tya̧ hi gi a gban fɛɛt gbɔɔl bɔ muulɔge. 13Wɛɛ ya̧a̧ za raazig bɛtha
a Piyɛr , ɗukum mɔ wa̧a̧ mɔ gbɛɛrihi mɔ tɔbɔ.
14Piyɛr wɛɛ raage
a ewwee! Waar Bɛto, be tɔbdir hin libtya, zaabe hin ɓi̧i̧limya ket gɛ nɛ zaŋ.
15Wɛɛ kɛm Bɛt ya̧a̧ɔ dɔɔ eesimɛ, gig raak
a hinyɔ be gaasige bɔmɔ see hinɔ an hin ɓi̧i̧limyayɔ.
16Hinɔ tuur anbɔ dɔɔ taarɛ, yaala hinɔ wɛɛ kɔl dɔɔ a bɛtha. 17Piyɛr war zulɔ
a hinyɔ be gbɛnz gɛrs du hinɔ raakɔ a nɔ?
Hɔnɛyɔ gi zulɔ hin wark anbɔ te dood wɔ Kɔrnɛliyus yaazihi hi ɛrkig Simɔŋ raaɔ bɔ lɛlɔ be. Yaala hi tuur gɔ, hi er gi tutin gbɔnɔya̧, hi mɛɛ gɛ be. 18Hi el dood zaadɛ hi warihi
a Simɔŋ yɔ nuŋgɔ zaa a Piyɛr gi waak dihɛ ya?
19Yɔ Piyɛr gi mɔkig hin a hinyɔ Bɛt zunsig a gɛrs du geha te be, Bɛt Mɔkilɔ raage
a kɛmɔ, dood taarɛ hi gim tɛk gɛrɛ. 20Ɗukum mɔ silɔ mɔ retin hi hii a Kaysariya, bɔ hoob gi ha̧a̧mɔ, bee yaazihi a mɔɔge an hi elumɔ.
21Yɔ anbɔ Piyɛr silɔ, raa dood wɔ
a be gi gɛrɛ, za̧a̧nyɔ nɛ gig tɛk gii beeya. Nɛ zaa nɔ?
22Wɔrɔ hi ta̧a̧
a laaya gbɔɔl zulya bɔ Kɔrnɛliyus gii yaaziwi. Gi doo riit yɔ hoob gig ha̧a̧k Bɛto, Yahuduya wɔ sɛw hi mɛɛ dɔglɔ hi gig sɔ̧ɔ̧k an doo rɔbo. Bɛtwalsɛr za zaa raage a gi elumɔ mɔ rek a ge a gi lɛl du an gi lag hinyɔ gɔ mɔ dɔgsige.
23Piyɛr dɛ̧ɛ̧hi hi yo; yoosugɔ ɗuk retin gɔ hi hii a Kaysariya.
Yɛ̧ɛ̧dɛ Yeesu fɔkya zaadɛ hi fu̧u̧ a Zope hi sɔkig be. 24Yoosugɔ anyɔ gɔ hi tuur a Kaysariya anbɔ, Kɔrnɛliyus mɔks nɛsɛ ɔ̧ɔ̧ hi saamɔ rɔ́bɛ wɔ hi oohi. 25Yɔ Piyɛr sɛ̧ɛ̧b gulk Kɔrnɛliyus raa du, Kɔrnɛliyus tuu dagige zagl gi dɔɔ dɔŋdi ɗɔbsige. 26Hɔnɛ Piyɛr wɛɛ ɗunsig raage
a ɗundum ha, bee be gi doo an mɔɔ hɛw.
27Yɔ Piyɛr gul raa du gi bookya̧a̧ hi Kɔrnɛliyus zɛm dood hi mɔks kittɔnɔ. 28Piyɛr raahi
a nɛ mɛɛ bɛttɔnɔ a maak wi gāā gbɔnɔ an Yahuduya gi ɔks hi rɔ̀bi, zaabe an gi tal gi lɛl du gɛ. Yɛrɛ Bɛt gogsib a bɔbe see doo za gbun mɔɔt an gi hin libtyayɔ, zaabe an hin ɓi̧i̧limyayɔ. 29Ànyɔ nɛ elzib an be zaa hɛdi, bé ı̄n zaakɔ gɛ be. Yɛrɛ ha̧a̧b an be mɛɛ hinyɔ nɛ elinbe.
30Kɔrnɛliyus gòò raage
a tuur ɔ̧t nas nɛɛko, ɔ̧t gi a naaba̧a̧n du an yɛrɛ lɛ an be zɔ̧b Bɛto. Yɔ be zɔ̧k Bɛt a be lɛl du doo za zaa be muutdu gin gban gaat buu fɛr a gi muulɛ, 31raabe a Kɔrnɛliyus, Bɛt kɛmsum zɔ̧k mɔ kɛmsɔ, wɛɛ mɛɛ gaas yɔ mɔ ɗansig ya̧a̧rya wɔ. 32Yaam doo za a Zope gi elz Simɔŋ yɔ nuŋgɔ zaa a Piyɛr gi zaa. Gi waak a Simɔŋ zoolnukya bɔ gi raa du a mɛmbal gbɔɔl ya̧gbarɔ.
33Be wɛɛ be yaa doo gɛrɛ nɔɔktɔnɔ a mɔɔge an gi elzumɔ. Mɔɔ be bɛsum mɔ zaa gɔ be. Yɛrɛ wɛ gi ma Bɛt muutdu sɛw an wɛ lag ma hinyɔ Bɛt raasum sɛw an mɔ dɔgsɛ.
34Piyɛr yɛɛl ya̧a̧book dɔgɔ
a yɛrɛ be mɛɛ gɔ bɛttɔnɔ a Bɛt gɛ̧̄ks dood gɛ. 35Dood hɛbtdi sɛw, za̧a̧nyɔ hoob gig ha̧a̧k Bɛto gi wɛɛ gi wook hinrɔb a gi muutdu, bɛs Bɛt bɛsɔ. 36Nɛ mɛɛ dɔgl yɔ Bɛt yaas dood Israhilaya wɔ. Dɔgl bɔ kamz saŋtum dɔglɛ a Yeesu Kristu yɔ gi dood sɛw waar ya̧ nuŋg du.
37Nɛ mɛɛ hingbɔɔlyɔ tuur a Yahuduya waal du sɛw. Hinɔ yɛɛl a Galile hi Yohana Bɛtmɛmɔ bɔ gi Bɛt dɔgl dɔgnik sɛw. 38Nɛ mɛɛ Yeesu Nazarɛdya bɔ dɔglɔ yɔ Bɛt yaaz Mɔkilɔ gi zulha gi gaag tɛŋko. Yeesu ɛmb waal du sɛw woo hinrɔbo, za̧a̧s dood wɔ hi gi a loorɛha̧a̧l tɛŋk du sɛw anyɔ Bɛt gi hi giya.
39Wii wi gi segyaadɛ ɔɔnɛ; wi gbɛn hinyɔ woo sɛw a Yahuduya hɛbt du hi a Urusalima, hi wa̧a̧ge hi doog a dɔ̧ɔ̧r ha wɔrɔ. 40Bɛt wɛɛ rɛmsig wɔrk du ɗunsige a ɔ̧t taasimɛ, wɛɛ midige. 41Yɔ mida, Israhilaya dood sɛw hí gbɛnig gɛ, gɛ mits wii segyaadɛ ɔ̧ɔ̧ wɔ Bɛt heriw biitiri. Yɔ Bɛt rɛmsig a wɔrk du gi wɛnzig a za̧a̧tig du, wi lehin hi giya, wi yɔ̧ hi giya.
42Raawi a wi dɔgs dood Bɛtdɔglɛ, a wi wɛɛ wi dɔg a Bɛt gbaa gii dɔgl-gbaakya a wɔrkɛ wɔ hi dood za̧a̧til wɔ hi zulha. 43Bɛtya̧a̧kɛŋkya wɔ sɛw hi raa dɔglɔ a za̧a̧nyɔ ɗɔbsige Bɛt gi bitsig hinha̧a̧lɔ a Yeesu nuŋgɔ tɛŋk du.
44Anyɔ Piyɛr gi dɔgl wɔrɔ dɔk te, Bɛt Mɔkilɔ siz a dood wɔ hi lak nɛ Piyɛr dɔglɔ sɛw hi zulha. 45Yɔ Yahuduya Yeesu ɗɔbsigya wɔ hi fu̧u̧z a Zope hi Piyɛr hi gi di hi gbɛn Bɛt yaas dɔ̧ɔ̧t dɔɔmɛ wɔ Mɔkilɔ hi zulha hɛw, kɔmsihi gɛrsɛ. 46Ànyɔ hi lag hi book ya̧a̧boon segdɛ be hi ɗɔbsig Bɛto, Piyɛr warɔ
47a dood wɛrɛ hi dag Bɛt Mɔkilɔ an wɛɛ her be, bɔ ɗɛɛ an gi ansihi Bɛtmɛm bɔ dakɔ nɔ?
48Yɔ anbɔ Piyɛr wɛɛ raa dood a hi hotinihi Bɛtmɛm a Yeesu Kristu nuŋg du. Dood wɔ hi wɛɛ hi zɔ̧ge an gi kɔm hi hii ɔ̧t kaasi.
Valgt i Øjeblikket:
TƆMSYAADƐ WOOSƐ 10: NTD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Doyayo New Testament © Bible Society of Cameroon, 1991.