1 KƆRƐŊGTU 10
10
1 KƆRƐŊGTU 10
1Yɛ̧ɛ̧dɛ mi wɛ, ha̧a̧mi an nɛ mɔk nɛ mɛɛ bɛttɔnɔ a yɔ baa wɛ hi da hi ɛmbik a hɛtdɔŋ du hi Muusa hi sɛw hi da hi gi ɛmbik a kuus wɛɛdisɛ, wɛɛ hi sɛw hi tal a mɛmbal gbɔɔl bɔ nuŋgɔ a Maaliya gedu hi kar a kasiŋ zaa bɔ ge. 2Yɔ hi tal a kuus bɔ gedu anbɔ, hi a mɛmbal gbɔɔl bɔ gedu, hi dag Bɛtmɛm anbɔ an hi wɛɛ Muusa fɔkyaadɛ ɔ̧ɔ̧. 3Hi sɛw hi le lees gɛrs mɔkilya gbuna bɔ Bɛt gaazihi, 4hi sɛw hi yɔ̧ mɛm gɛrs mɔkilya gbuna bɔ Bɛt gaazihi, ya̧a̧nɛ hi yɔ̧ a hɛɛl mɔkilya bɔ gihi fɔk muulɔ ge, hɛɛl mɔkilya bɔ gi Kristu giya. 5Yɔ anbɔ si̧, dood kit wɔ a hi teesdu hi bɛs Bɛt gɛ, ya̧a̧nɛ hi wɔr a hɛtdɔŋ du.
6Yɛrɛ hin wɔrɔ hi tuurɔ an wɛ see wɛ mɛɛnɔ an bɔ wɛɛ wɛ dag mɔkil ha̧a̧l anbɔ an hii yɔ hi dag be. 7Bɔwɛ wɛɛ maakha̧a̧l fɔkyaadɛ an dood zaadɛ wɔ hi teesdu hi wɛɛ nɛ be anyɔ Bɛt ɗɛɛrwolɔ raa
a dood hi ɗɔɔtɔ an hi le hi yɔ̧, hi wɛɛ hi ɗundɔ an hi daŋgɔ.
8Bɔwɛ naamansi an dood zaadɛ a hi teesdu hi naanɛ mans be, yɔ anbɔ dood duk yɔ̧ɔ̧lgbunu daatɔ taarɛ (23.000) hi mat wɔrk ɔ̧t gbun bɔ gedu. 9Bɔwɛ maat Waar Bɛto an dood zaadɛ wɔ hi maatige beks hi wɛɛ hi torihi hi wɔrɔ.
10Bɔwɛ dɔnt Waar Bɛto anyɔ dood zaadɛ a Israhilaya wɔ hi tees du hi dɔntige, Bɛtwalsɛrɔ gbɔŋkya bɔ gi gbɔ̧hi. 11Hin wɔrɔ hi turs dood amntɛ wɔ an wɛɛ wɛ mɛɛnɔ. Hi bi̧i̧ hinya̧ an wɛ oon zul wɛ, wɛɛ yɔ wɛ waak a ɔ̧t yɔ̧ɔ̧sum du. 12Yɔ anbɔ, za̧a̧nyɔ mɔk a be gi erik-erɔ, oog zulɔ bɛttɔnɔ an bɔgi matɔ.
13Maatil yɔ tursinɛ dāār maatilyɔ gɔ gi tursig dood zaadɛ gɛ. Yɛrɛ Bɛt taan ya̧a̧luurɛ, hinyɔ dɔg sɛw gi wooko, taa an gi ɔɔ gbɔnɔ an hinza gi maatin gi daar tɛŋk nɛ. Hi maatil bɔ, Bɛt gi gaan tɛŋko an nɛ mɔmɔ nɛ dag gbɔnɔ tuuk gedu hɛw an nɛ za̧a̧. 14Yɔ anbɔ saam mi rɔbɛ wɛ, nɔɔn maakwɔd wɔ fɔkɔ dɔglɔ. 15Mi gin book an dood wɔ nɛ mɛɛhin hiya. Nɛɛ dɛ̧ɛ̧tin hinyɔ mi book nɛ kpoos du ma.
16Dakwaa rɔbsya bɔ gɔ wɛ baanik Bɛt hage wɛ yɔ̧k hin duge, nɛ gi wɛ ɔksig hi Kristu a ga̧a̧mɔ bɔ gedu ma mi? Nɛ kok yɔ gɔ wɛ gig ɓɛɛdugo, nɛ giwɛ ɔksig hi Kristu muulɔ bɔ gii ma mi? 17Anyɔ kok gi gbunu, wɛɛ yɔ wɛ gi kittɔnɔ be wɛ ɔks muul gbun kpɔd, anyɔ wɛ gi sɛw wɛ ɔksig a kok gbuna bɔ gedu. 18Seen dood Israhilaya wɔ maakya̧ woosɛ: nɛ wɔ hi tɔk namb yɔ hi gɔns Bɛt maak a sɛŋk ha hi ɔks hi Bɛt a maaksɛŋk bɔ dɔŋgɔ ge ma mi? 19Yɛrɛ mi dɔg a nɔ ma? Gi an mi dɔg a namb yɔ hi gɔsig maak ha̧a̧l gi hinza ɗɔbti ya? Zaabe a maakwɔd gii gi hinza ɗɔbt ya?
20Lab gɛ! Mi raak a namb yɔ hi gbɛrsig maakwɔd ya̧a̧gɔ̧ɔ̧nya wɔ hi taas Bɛt gii gbɛɛruko, hi gbɛrsig loorɛha̧a̧l wɔ hiya! Yɔ labɔ, ha̧a̧mi an nɛ ɔks hi loorɛha̧a̧l gɛ. 21Nɛ ɗɛ̄ɛ̄ an nɛ yɔ̧ hin a Waar Yeesu dakwaa bɔ gedu hi loorɛha̧a̧l dakwaa bɔ gedu lɛlgbun gɛ, dɛɛ̄ an nɛ lehin hi Waar Yeesu hi loorɛha̧a̧l lɛlgbun hɛw gɛ. 22Ha̧a̧wɛ an wɛ naamans hi loorɛha̧a̧l wɛ kɛt Waar Bɛt kubl-nɔɔtig ɔ̧ɔ̧n ya? Wɛ gin tɛŋk wɛ daarigdaar ya? 23Hɔɔ, hin sɛw gbɔnɔ giro, wɛɛ hin sɛw taa hinza ɗaako, hin sɛw gbɔnɔ giro, wɛɛ hin sɛw taa doo ɔksigya̧ tɔɔsugo.
24Bɔ doo gi tɛb hinyɔ gɔ gi ɗaas zulɔ kpɔd, an bɔ ɓɛ tɛge an gi ɗaas naaza be. 25Nɛ ɗɛɛ an nɛ le hinyɔ gɔ hi zek luumha sɛw, bɔ kpoos nɛ gi insin hinza hi mɔkili. 26Ya̧a̧nɛ, Bɛt ɗɛɛrwolɔ raa a hɛbt gi Waar Bɛt ɔ̧ɔ̧nɛ hi hinwɔ hi gidu sɛw. 27Za̧a̧nyɔ taa Bɛt ɗɔbsig gɛ gi elin a gi lɛldu an nɛ lehinɛ, nɛɛ be gi ha̧a̧n reki, rekin nɛ le hinyɔ gɔ gi kamsin sɛw, bɔ kpoos nɛ gi insin hinza a mɔkil dɔŋgo.
28Yɛrɛ doo gi raanɛ a namb yɛrɛ hi gbɛrs maako, bɔnɛ tɔbɔ! Anyɔ za̧a̧n bɔ raasin anbɔ hi a mɔkil yɔ kpoos du gi dɔŋgo. 29Yɛrɛ mí bōō mɔkil nɛnɛ bɔ kpoos du dɔglɔ gii gɛ, mi book doo zaabɔ mɔkil ɔnɛ bɔ dɔglɔ bɔ giya. Nɛ ɛrko a ri ɔnɛ doo za mɔkilɔ kpoos du gi gbaas zul be gikyɔ aakil du dɔgl ma nɔ? 30À be baanik Bɛt a hinyɔ be lek hage, doo gi dɔ̧ɔ̧lib ri a lees yɔ be baan Bɛt hage?
31Ya̧a̧nɛ, mi gisin raako: a nɛ gi lees leko, nɛ gi yɔ̧kyɔ̧, an nɛ gi wook nɛ nɔ, woon hin sɛw an hi ɗɔbsin Bɛto. 32Bɔnɛ wɛɛs Yahuduya wɔ, zaabe Yonaniŋkoya wɔ, zaabe Yeesu fɔkya wɔ ɔksilya̧ dɔɔsiŋklɛlɛ, 33woon an mii yɔ mi i̧i̧yyik a hinyɔ mi wook gedu sɛw an dood sɛw gi harihi. Yɔ anbɔ, mi ɓɛ̄ɛ̄ hinyɔ gɔ gi ɗaasim gii gɛ, mi ɓɛɛk hinyɔ gɔ gi ɗaas dood kittɔnɔ an hi za̧a̧ giya.
Valgt i Øjeblikket:
1 KƆRƐŊGTU 10: NTD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Doyayo New Testament © Bible Society of Cameroon, 1991.