Éxodo 30
30
Teꞌxyi̱b li artal li teꞌxcꞌat cuiꞌ li incienso
1Ut te̱yi̱b ajcuiꞌ jun li artal riqꞌuin li cheꞌ acacia re te̱cꞌat cuiꞌ li incienso. 2Te̱yi̱b chi ca̱ xucu̱t. O̱b roxcꞌa̱l (45) centímetro li ru ut o̱b roxcꞌa̱l (45) centímetro li rok ut laje̱b roꞌcꞌa̱l (90) centímetro li xteram. Junaj ru li artal rochben li xucub nak te̱yi̱b. 3Te̱letz li tzꞌakal oro saꞌ xbe̱n. Ut te̱letz ajcuiꞌ saꞌ xca̱ pacꞌalil ut chiru ajcuiꞌ li xucub. Ut chire te̱qꞌue lix sahob ru yi̱banbil riqꞌuin oro. 4Rubel lix sahob ru te̱letz li argollas yi̱banbil riqꞌuin oro. Te̱letz saꞌ xuc xcaꞌ pacꞌalil li artal re nak aran te̱numsi li cheꞌ li te̱pako cuiꞌ. 5Te̱yi̱b ajcuiꞌ cuib li cheꞌ acacia ti̱c rix re xpakonquil li artal. Ut te̱letz li oro chirix. 6Saꞌ li xbe̱n tasal li tabernáculo saꞌ li Santil Naꞌajej te̱qꞌue li artal chiru li tas yi̱banbil riqꞌuin tꞌicr, li naramoc re li Lokꞌlaj Ca̱x li xocbil cuiꞌ li chakꞌrab. Saꞌ li naꞌajej aꞌan tincua̱nk e̱riqꞌuin. 7Rajlal ekꞌela nak ta̱oc laj Aarón chixyi̱banquil li candil, tixcꞌat li sununquil incienso saꞌ xbe̱n li artal aꞌan. 8Ut tixcꞌat ajcuiꞌ rajlal ecuu nak ta̱oc chixlochbal li candil. Joꞌcan nak chalen anakcuan le̱ ralal e̱cꞌajol li teꞌcua̱nk mokon teꞌxcꞌat li incienso chicuu. 9Incꞌaꞌ ta̱cꞌatma̱nk jalan chic incienso saꞌ xbe̱n li artal aꞌin, chi moco ta̱cꞌatma̱nk jalan mayej, chi moco li ru li trigo, chi moco li vino ta̱mayeja̱k aran. 10Li artal aꞌin kꞌaxtesinbilak chi junaj cua chicuu nak laj Aarón tixqꞌue caꞌchꞌinak lix quiqꞌuel li xul li ta̱mayeja̱k re xtzꞌa̱manquil xcuybal xma̱queb laj Israel chiru li xucub li cuan saꞌ xca̱ xucu̱til li artal. Aꞌan tixba̱nu jun sut chiru li chihab. Joꞌcan ajcuiꞌ teꞌxba̱nu rajlal chihab li ralal xcꞌajol li teꞌcua̱nk mokon re xsantobresinquil li artal.
11Ut li Ka̱cuaꞌ quixye ajcuiꞌ re laj Moisés:
12—Nak ta̱cuajlaheb laj Israel chi xjunju̱nkaleb teꞌmayejak chicuu re xcolbal rix lix yuꞌameb re nak incꞌaꞌ teꞌca̱mk. 13Chixjunileb li ac xeꞌajla̱c teꞌxqꞌue caꞌchꞌin ma̱ media onza li plata chokꞌ xmayejeb. Aꞌan li xqꞌuial lix mayejeb teꞌxqꞌue cue la̱in li Ka̱cuaꞌ joꞌ nequeꞌbisoc saꞌ li tabernáculo. 14Chixjunileb li ac queꞌxba̱nu junmay chihab teꞌxqꞌue li mayej aꞌin chicuu. 15Nak teꞌmayejak li junju̱nk re xcolbal rix lix yuꞌameb, juntakꞌe̱t xqꞌuial li teꞌxqꞌue. Li biom tixqꞌue media onza li plata ut joꞌcan ajcuiꞌ xqꞌuial tixqꞌue li nebaꞌ. 16Ut la̱at ta̱xoc li plata li teꞌxqꞌue laj Israel re xcolbal rix lix yuꞌameb. Ut ta̱kꞌaxtesi re li cꞌanjel li ta̱uxma̱nk saꞌ li tabernáculo. Li mayej aꞌan ta̱jultica̱nk re chicuu nak eb li ralal xcꞌajol laj Israel queꞌxtoj rix lix yuꞌameb.
17Li Ka̱cuaꞌ quia̱tinac cuiꞌchic riqꞌuin laj Moisés ut quixye re: 18—Te̱yi̱b ajcuiꞌ jun li pila xnaꞌaj li haꞌ riqꞌuin bronce re teꞌchꞌajok cuiꞌ laj tij. Ut te̱yi̱b ajcuiꞌ riqꞌuin bronce lix naꞌaj li te̱qꞌue cuiꞌ. Te̱qꞌue li pila chiru li artal nachꞌ riqꞌuin li tabernáculo. Ut te̱qꞌue li haꞌ chi saꞌ. 19Ut riqꞌuin li haꞌ li cuan saꞌ li pila teꞌxchꞌaj li rukꞌeb ut teꞌxchꞌaj li rokeb laj Aarón joꞌqueb ajcuiꞌ li ralal.
20Nak teꞌoc saꞌ li tabernáculo tento nak teꞌchꞌajok re nak incꞌaꞌ teꞌca̱mk. Joꞌcan ajcuiꞌ nak teꞌoc chiru li artal chixcꞌatbal li mayej chicuu la̱in li Ka̱cuaꞌ. 21Tento teꞌxchꞌaj li rukꞌeb ut li rokeb re nak incꞌaꞌ teꞌca̱mk. Chalen anakcuan ut chi junelic li chakꞌrab aꞌan tenebanbil saꞌ xbe̱neb laj tij joꞌ ajcuiꞌ saꞌ xbe̱neb li ralal xcꞌajol li teꞌcua̱nk mokon.
22Li Ka̱cuaꞌ quia̱tinac cuiꞌchic riqꞌuin laj Moisés ut quixye re: 23—Ta̱sicꞌ li cha̱bil ban li na-oc re xyi̱banquil li sununquil ban. Ta̱sicꞌ cablaju libra li cha̱bil mirra, cuakib libra li canela ut cuakib libra li cálamo, li sunu̱nc, 24cablaju libra li casia aꞌ yal chanru li bisleb li cuan saꞌ li tabernáculo ut oxib litro riqꞌuin media li aceite oliva. 25Riqꞌuin chixjunil aꞌin te̱yi̱b chi cha̱bil li sununquil ban re xqꞌuebal saꞌ xbe̱neb li teꞌkꞌaxtesi̱k chi cꞌanjelac chicuu. 26Te̱qꞌue li aceite aꞌin chiru li tabernáculo ut chiru li Lokꞌlaj Ca̱x. 27Te̱qꞌue chiru li me̱x ut chiruheb chixjunil li nacꞌanjelac saꞌ li me̱x. Ut te̱qꞌue li aceite chiru li candelero joꞌ ajcuiꞌ chiru chixjunil li nacꞌanjelac re xyi̱banquil lix xamlel. Te̱qꞌue ajcuiꞌ li aceite chiru li artal li ta̱cꞌatma̱nk cuiꞌ li incienso. 28Te̱qꞌue li aceite chiru li artal bar ta̱cꞌatma̱nk cuiꞌ li mayej ut te̱qꞌue chiru chixjunil li chꞌi̱chꞌ li ta̱cꞌanjelak saꞌ li artal. Te̱qꞌue ajcuiꞌ chiru li pila li teꞌchꞌajok cuiꞌ ut te̱qꞌue ajcuiꞌ chiru lix cꞌochleba̱l. 29Joꞌcaꞌin nak te̱kꞌaxtesi cue chixjunil li cꞌaꞌak re ru aꞌin ut santobresinbilakeb chic. Ut chixjunil li ta̱chꞌeꞌekꞌ riqꞌuin li cꞌaꞌak re ru aꞌin, santobresinbilak chic ta̱cana̱k.
30Te̱qꞌue li aceite saꞌ xjolom laj Aarón joꞌqueb ajcuiꞌ li ralal ut ta̱kꞌaxtesiheb chi cꞌanjelac chokꞌ aj tij chicuu. 31Tat-a̱tinak riqꞌuineb laj Israel ut ta̱ye reheb chi joꞌcaꞌin. Chalen anakcuan aꞌin li aceite li ta̱qꞌuehekꞌ saꞌ xjolomeb le̱ ralal e̱cꞌajol li teꞌcua̱nk mokon li teꞌkꞌaxtesi̱k chi cꞌanjelac chiru li Ka̱cuaꞌ. 32Li aceite aꞌin incꞌaꞌ naru xqꞌuebal saꞌ xbe̱n yalak ani xban nak li aceite aꞌin ac santobresinbil, chi moco ta̱ru̱k te̱yi̱b jalan chic aceite chiru aꞌin, xban nak li aceite aꞌin santo ut tento te̱qꞌue xlokꞌal. 33Cui ani tixyi̱b jun chic li aceite joꞌ aꞌin, li jun aꞌan ta̱isi̱k saꞌ xya̱nkeb laj Israel. Ut cui ani tixqꞌue saꞌ xbe̱n junak li ma̱cuaꞌ aj tij, aꞌan ta̱isi̱k ajcuiꞌ saꞌ xya̱nkeb laj Israel.
34Ut li Ka̱cuaꞌ quixye re laj Moisés: Sicꞌ li cha̱bil ban li nacꞌanjelac re xyi̱banquil li incienso. Juntakꞌe̱t riqꞌuin li junju̱nk ta̱qꞌue. Sicꞌ lix kꞌol li cheꞌ li sunu̱nc: li estacte, li uña aromático, li incienso ut li gálbano aromático xcꞌabaꞌeb. 35Riqꞌuin aꞌan ta̱yi̱b jun li incienso kꞌaxal cha̱bil ut santo. Ta̱junaji ru chi us. Ta̱yi̱b chi cha̱bil joꞌ nequeꞌxyi̱b li cha̱bil sununquil ban. 36Ta̱queꞌ chi kꞌun yijachak ut ta̱qꞌue chiru li Lokꞌlaj Ca̱x, li cuan saꞌ li tabernáculo li tincua̱nk cuiꞌ e̱riqꞌuin. Li incienso aꞌin, aꞌan kꞌaxal lokꞌak che̱ru. 37Incꞌaꞌ te̱yi̱b jalan chic incienso chiru aꞌin re ta̱cꞌanjelak che̱ru. Li incienso aꞌin, aꞌan kꞌaxtesinbil chicuu ut kꞌaxal lokꞌak che̱ru. 38Cui ani tixyi̱b junak chic incienso joꞌ aꞌin yal re ta̱rutzꞌ, li jun aꞌan ta̱isi̱k saꞌ xya̱nkeb laj Israel.
Valgt i Øjeblikket:
Éxodo 30: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.