Éxodo 26
26
Chanru nak teꞌxyi̱b li tabernáculo
1Ta̱yi̱b li laje̱b li ni̱nki tꞌicr re xtzꞌapbal ru li tabernáculo riqꞌuin li bakbil nokꞌ lino, li nokꞌ azul, joꞌ ajcuiꞌ púrpura ut cak. Ut te̱qꞌue querubines chiru li tꞌicr aꞌan chokꞌ xsahob ru chi cha̱bil xyi̱banquil. 2Li laje̱b chi tꞌicr aꞌin li te̱yi̱b, juntakꞌe̱t xni̱nkal te̱qꞌue. Cablaju metro riqꞌuin media xni̱nkal rok li junju̱nk. Ut cuib metro li xni̱nkal ru li junju̱nk. 3Te̱letz chi ribil li o̱b chi tꞌicr. Joꞌcan cuiꞌchic te̱ba̱nu riqꞌuin li o̱b chic. Te̱letz cuiꞌchic chi ribil. 4Ut te̱yi̱b ajcuiꞌ xnaꞌaj li gancho chire li nimla tꞌicr li o̱b ru li ac xeyi̱b. Te̱yi̱b aꞌan riqꞌuin tꞌicr azul. Joꞌcan cuiꞌchic te̱ba̱nu riqꞌuin li nimla tꞌicr jun chic li xeyi̱b. 5Mero ciento xchapbal li gancho te̱qꞌue chire li junju̱nk. Mero ciento re li jun ut mero ciento cuiꞌchic re li jun chic re nak teꞌxchap rib chi us li cuib chi ni̱nki tꞌicr. 6Ut te̱yi̱b ajcuiꞌ mero ciento li gancho riqꞌuin oro re li junju̱nk chi tꞌicr re teꞌxchap rib chi us riqꞌuin li jun chic re nak li rix li tabernáculo ta̱cana̱k chi tzꞌaptzꞌo ru. 7Te̱yi̱b ajcuiꞌ junlaju li tꞌicr yi̱banbil riqꞌuin rismal chiba̱t re xtzꞌapbal xbe̱n li tabernáculo. 8Li junlaju chi tꞌicr aꞌin li te̱yi̱b, juntakꞌe̱t xni̱nkal te̱qꞌue. Oxlaju metro riqꞌuin media xni̱nkal rok li junju̱nk ut cuib metro li xni̱nkal ru li junju̱nk. 9Li o̱b chi tꞌicr te̱letz chi ribileb rib. Joꞌcan cuiꞌchic te̱ba̱nu riqꞌuin li cuakib chic. Te̱letz cuiꞌchic chi ribil rib eb aꞌan. Ut li xcuak te̱bas ut ta̱cana̱k chiru li tabernáculo. 10Mero ciento xchapbal li gancho te̱qꞌue chire li junju̱nk. Mero ciento re li jun ut mero ciento cuiꞌchic re li jun chic. 11Ut te̱yi̱b ajcuiꞌ mero ciento li gancho riqꞌuin li chꞌi̱chꞌ bronce re nak li tꞌicr teꞌxchap rib chi us riqꞌuin li jun chic re nak junaj ru ta̱cana̱k. 12Xban nak najt rok li tꞌicr aꞌin, li yijach chic ta̱sobri̱nk ta̱cana̱k chirix. 13Caꞌ pacꞌalil ta̱sobri̱nk o̱b roxcꞌa̱l (45) centímetro. Chi joꞌcaꞌin ta̱cana̱k chi tzꞌaptzꞌo chi us li tabernáculo. 14Te̱yi̱b ajcuiꞌ li rix li carner bonbil riqꞌuin caki bon ut te̱qꞌue saꞌ xbe̱n li tabernáculo. Ut saꞌ xbe̱n aꞌan te̱qꞌue cuiꞌchic li cha̱bil tzꞌu̱m rixeb li tzꞌiꞌ haꞌ. 15Ut riqꞌuin li cheꞌ acacia te̱yi̱b li tzꞌalam cheꞌ re ta̱oc chi xakxo. 16Ca̱hib metro riqꞌuin media li xni̱nkal rok li junju̱nk chi tzꞌalam cheꞌ ut o̱b xca̱cꞌa̱l centímetro (65) li xni̱nkal ru. 17Te̱yi̱b cuib rok li junju̱nk chi tzꞌalam cheꞌ re nak us ta̱cana̱k saꞌ lix naꞌaj. Joꞌcaꞌin te̱ba̱nu re chixjunil li tzꞌalam cheꞌ li teꞌcꞌanjelak re xyi̱banquil li tabernáculo. 18Te̱yi̱b junmay li tzꞌalam cheꞌ ut te̱qꞌue saꞌ li jun pacꞌal li nacana saꞌ li sur. 19Ut te̱yi̱b ajcuiꞌ caꞌcꞌa̱l xnaꞌajeb li rok li tzꞌalam cheꞌ bar teꞌqꞌuehekꞌ cuiꞌ. Aꞌan te̱yi̱b riqꞌuin plata. Caꞌcab xnaꞌaj li junju̱nk chi tzꞌalam cheꞌ. 20Ut te̱yi̱b ajcuiꞌ junmay chic li tzꞌalam cheꞌ re te̱qꞌue jun pacꞌal li tabernáculo li nacana saꞌ li norte. 21Ut te̱yi̱b ajcuiꞌ caꞌcꞌa̱l chic xnaꞌajeb li rok li tzꞌalam cheꞌ bar teꞌqꞌuehekꞌ cuiꞌ. Aꞌan te̱yi̱b riqꞌuin plata. Caꞌcab xnaꞌajeb li junju̱nk chi tzꞌalam cheꞌ. 22Ut te̱yi̱b ajcuiꞌ cuakib chic li tzꞌalam cheꞌ re te̱qꞌue chirix li tabernáculo saꞌ xjayal li na-oc cuiꞌ li sakꞌe. 23Ut te̱yi̱b ajcuiꞌ cuib chic li tzꞌalam cheꞌ re te̱qꞌue saꞌ xuc chirix saꞌ xcaꞌ pacꞌalil. 24Li cuib chi tzꞌalam cheꞌ aꞌin teꞌxchap rib takꞌa ut takecꞌ riqꞌuin gancho. Joꞌcan ta̱uxma̱nk riqꞌuin li cuib chi tzꞌalam cheꞌ li teꞌcana̱k saꞌ xxuc. 25Joꞌcaꞌin te̱ba̱nu riqꞌuin li cuakxakib chi tzꞌalam cheꞌ ut cuaklaju li xnaꞌaj li rokeb yi̱banbil riqꞌuin plata. Caꞌcab xnaꞌajeb li rok li junju̱nk chi tzꞌalam cheꞌ. 26Te̱yi̱b ajcuiꞌ o̱b li cheꞌ riqꞌuin li cheꞌ acacia re te̱qꞌue chi kꞌekꞌo chiru li tzꞌalam cheꞌ li nacana jun pacꞌal. 27Ut te̱yi̱b o̱b chic li cheꞌ re te̱qꞌue chi kꞌekꞌo chiru li tzꞌalam cheꞌ li cuan jun pacꞌal chic. Ut te̱yi̱b o̱b chic li cheꞌ re te̱qꞌue chi kꞌekꞌo chiru li tzꞌalam cheꞌ li cuan chirix saꞌ xjayal li na-oc cuiꞌ li sakꞌe. 28Li cheꞌ li te̱qꞌue chi kꞌekꞌo saꞌ xyi ta̱cuulak saꞌ li xuc jun pacꞌal ut toj saꞌ li xuc jun chic. 29Ut te̱letz li oro chiru li tzꞌalam cheꞌ. Ut te̱letz ajcuiꞌ chiru li tzꞌalam cheꞌ li argollas yi̱banbil riqꞌuin oro li teꞌnumekꞌ cuiꞌ li cheꞌ chi kꞌekꞌo li cuan saꞌ xyi. Ut te̱letz ajcuiꞌ li oro chiru li cheꞌ aꞌin li te̱qꞌue chi kꞌekꞌo. 30Ye reheb laj Israel nak teꞌxyi̱b li tabernáculo chi tzꞌakal joꞌ xinye a̱cue saꞌ li tzu̱l aꞌin. 31Te̱yi̱b ajcuiꞌ jun li nimla tꞌicr riqꞌuin li nokꞌ azul, joꞌ ajcuiꞌ púrpura ut cak ut riqꞌuin li bakbil nokꞌ lino. Ut chokꞌ xsahob ru li tꞌicr aꞌan, te̱qꞌue li querubines chiru chi cha̱bil xyi̱banquil. 32Te̱letz ca̱hib li gancho oro chiru li okech ca̱hib yi̱banbil riqꞌuin li cheꞌ acacia. Ut chiru li gancho aꞌan te̱qꞌue li nimla tꞌicr. Te̱letz li oro chirixeb li okech. Ut te̱yi̱b ajcuiꞌ riqꞌuin plata ca̱hib xnaꞌaj li okech. 33Chiru li gancho oro te̱qꞌue li nimla tꞌicr. Aꞌan ta̱cꞌanjelak chokꞌ tas saꞌ li tabernáculo. Caꞌ tasal ta̱cana̱k xsaꞌ li tabernáculo. Li xbe̱n tasal, aꞌan li Santil Naꞌajej. Ut li xcaꞌ tasal, aꞌan li Lokꞌlaj Santil Naꞌajej. Saꞌ li Lokꞌlaj Santil Naꞌajej aꞌan, te̱qꞌue li Lokꞌlaj Ca̱x bar ta̱xocma̱nk cuiꞌ li chakꞌrab. 34Te̱qꞌue lix tzꞌapbal re saꞌ xbe̱n li Lokꞌlaj Ca̱x li te̱qꞌue saꞌ li Lokꞌlaj Santil Naꞌajej. 35Ut saꞌ li xbe̱n tasal li tabernáculo saꞌ li Santil Naꞌajej te̱qꞌue li me̱x saꞌ li pacꞌal li nacana saꞌ li norte. Ut saꞌ li jun pacꞌal chic li nacana saꞌ li sur saꞌ xcaꞌyaba̱l li me̱x, te̱qꞌue li candelero. 36Ut te̱yi̱b jun chic li nimla tꞌicr li ta̱cꞌanjelak chokꞌ xpuertil li tabernáculo. Te̱yi̱b li tꞌicr aꞌan riqꞌuin li nokꞌ azul, púrpura ut cak ut riqꞌuin li bakbil nokꞌ lino. Te̱qꞌue xsahob ru chi cha̱bil xyi̱banquil. 37Te̱yi̱b ajcuiꞌ o̱b li okech riqꞌuin li cheꞌ acacia bar te̱qꞌue cuiꞌ li tꞌicr. Te̱letz li tzꞌakal oro chiru li o̱b chi cheꞌ. Ut te̱yi̱b ajcuiꞌ riqꞌuin bronce o̱b xnaꞌajeb li okech. Ut te̱yi̱b o̱b li ganchos li te̱chap cuiꞌ li tꞌicr chiru li okech.
Valgt i Øjeblikket:
Éxodo 26: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.