Éxodo 25
25
Li mayej re xyi̱banquil li tabernáculo
1Li Ka̱cuaꞌ quia̱tinac riqꞌuin laj Moisés ut quixye re: 2—Ye reheb laj Israel nak teꞌxxoc junak li cha̱bil mayej chokꞌ cue. Teꞌxqꞌue li joꞌ qꞌuial li na-ala saꞌ xchꞌo̱leb xqꞌuebal ut teꞌxqꞌue chi anchaleb xchꞌo̱l. 3Li mayej li teꞌxxoc, aꞌaneb aꞌin: li oro, li plata, li cobre, 4li tꞌicr azul, li tꞌicr púrpura, li tꞌicr cak, li cha̱bil tꞌicr lino, joꞌ ajcuiꞌ li tꞌicr yi̱banbil riqꞌuin li rismal li chiba̱t, 5joꞌ ajcuiꞌ lix tzꞌu̱mal li carner bonbil riqꞌuin caki bon, ut li cha̱bil tzꞌu̱m rix li tzꞌiꞌ haꞌ, joꞌ ajcuiꞌ li cha̱bil cheꞌ acacia xcꞌabaꞌ, 6ut li aceite re li candil joꞌ ajcuiꞌ li cꞌaꞌak re ru li nacꞌanjelac re xyi̱banquil li aceite li naqꞌueheꞌ saꞌ xbe̱neb li nequeꞌxakaba̱c chi cꞌanjelac chiru li Ka̱cuaꞌ, ut nacꞌanjelac ajcuiꞌ re xyi̱banquil li incienso li sunu̱nc, 7ut li terto̱quil pec ónice xcꞌabaꞌ joꞌqueb ajcuiꞌ li cha̱bil pec re xqꞌuebal xsahob ru li rakꞌ#Saꞌ li versículo 25:7 “Efod” ut “pectoral” xcꞌabaꞌ li rakꞌ li xbe̱nil aj tij li cuan li terto̱quil pec chiru chokꞌ xsahob ru. li xbe̱nil aj tij ut re ajcuiꞌ xqꞌuebal xsahob ru li naxqꞌue chire xchꞌo̱l. 8Ut te̱yi̱b junak li muheba̱l re nak ta̱ru̱k tincua̱nk aran saꞌ e̱ya̱nk. 9La̱in tinye e̱re chanru nak te̱yi̱b li naꞌajej li tincua̱nk cuiꞌ ut tinye e̱re chanru te̱yi̱b li cꞌaꞌru ta̱cꞌanjelak chi saꞌ. Te̱yi̱b chi tzꞌakal joꞌ tinye e̱re.
Teꞌxyi̱b li Lokꞌlaj Ca̱x li teꞌxxoc cuiꞌ li contrato
10Te̱yi̱b junak Lokꞌlaj Ca̱x riqꞌuin li cha̱bil cheꞌ acacia xcꞌabaꞌ. Jun metro riqꞌuin laje̱b centímetro xnimal li rok. Ut o̱b xca̱cꞌa̱l (65) centímetro xnimal li ru ut o̱b xca̱cꞌa̱l (65) centímetro xteram. 11Ut te̱letz li tzꞌakal oro chirix ut chi saꞌ ut te̱qꞌue ajcuiꞌ lix sahob ru yi̱banbil riqꞌuin oro chire li ca̱x bar ta̱hila̱nk cuiꞌ lix tzꞌapbal re. 12Ut te̱yi̱b ca̱hib argolla oro ut te̱letz saꞌ xxuc li ca̱x, cuib saꞌ jun pacꞌal ut li cuib chic saꞌ li jun pacꞌal chic. 13Ut te̱yi̱b cuib li cheꞌ ti̱c rix yi̱banbil riqꞌuin li cha̱bil cheꞌ acacia ut te̱letz ajcuiꞌ oro chirix. 14Ut te̱numsi li cheꞌ aꞌan saꞌ li argolla li letzlo chixcꞌatk li ca̱x re nak riqꞌuin li cheꞌ aꞌan te̱pako li ca̱x. 15Li cheꞌ aꞌan incꞌaꞌ chic te̱risi saꞌ li argolla. Aran teꞌcana̱k. 16Ut saꞌ li ca̱x aꞌan te̱xoc li chakꞌrab li tinqꞌue e̱re. 17Te̱yi̱b jun xtzꞌapbal re li ca̱x#Saꞌ li versículo 25:17 “Propiciatorio” xcꞌabaꞌ lix tzꞌapbal re li Lokꞌlaj Ca̱x saꞌ castellano. Aꞌan naraj naxye li naꞌajej bar nacuyeꞌ cuiꞌ li ma̱c. riqꞌuin oro jun metro riqꞌuin laje̱b centímetro xnimal li rok ut o̱b xca̱cꞌa̱l (65) centímetro xnimal li ru. 18Ut te̱yi̱b cuib li querubines chanchaneb li ángel riqꞌuin oro tenbil riqꞌuin martillo. Ut te̱qꞌue saꞌ xbe̱n lix tzꞌapbal re li ca̱x, junju̱nk saꞌ li ju̱nk pacꞌal. 19Te̱qꞌue li cuib chi querubines junju̱nk saꞌ li ju̱nk pacꞌal lix tzꞌapbal re li ca̱x. Li cuib chi querubines rochben lix tzꞌapbal re li ca̱x jun ajcuiꞌ ru nak te̱yi̱b. 20Eb li querubines teꞌxcaꞌya ribeb ut yo̱keb chi iloc saꞌ xbe̱n lix tzꞌapbal re li ca̱x. Lix xiqꞌueb teꞌxhel rib ut teꞌxtzꞌap xbe̱n li ca̱x. 21Te̱tzꞌap li ca̱x riqꞌuin lix tzꞌapbal re li xeyi̱b. Ut saꞌ li Lokꞌlaj Ca̱x aꞌan, te̱xoc li chakꞌrab li tinqꞌue e̱re. 22Ut aran saꞌ xbe̱n li Lokꞌlaj Ca̱x saꞌ xyi li cuib chi querubines li cuanqueb saꞌ xbe̱n lix tzꞌapbal re, la̱in tincua̱nk saꞌ musikꞌej. Aran tina̱tinak a̱cuiqꞌuin ut tinqꞌue a̱cue li chakꞌrab li ta̱qꞌue reheb li ralal xcꞌajol laj Israel.
Teꞌxyi̱b li me̱x li teꞌxqꞌue cuiꞌ li mayejanbil caxlan cua
23Te̱yi̱b ajcuiꞌ junak me̱x riqꞌuin li cheꞌ acacia xcꞌabaꞌ. Laje̱b roꞌcꞌa̱l (90) centímetro lix nimal rok ut o̱b roxcꞌa̱l (45) centímetro lix nimal ru. O̱b xca̱cꞌa̱l (65) centímetro xnajtil xteram. 24Ut te̱letz li tzꞌakal oro chiru li me̱x ut te̱yi̱b ajcuiꞌ lix sahob ru chire yi̱banbil riqꞌuin oro. 25Saꞌ xca̱ pacꞌalil li me̱x te̱letz li cheꞌ cuukub centímetro xnimal ru. Ut te̱qꞌue li tzꞌakal oro chokꞌ xsahob ru chire li cheꞌ aꞌan li te̱letz saꞌ li me̱x. 26Te̱yi̱b ca̱hib li argolla oro ut te̱letz saꞌ xca̱ xucu̱til li me̱x bar cuanqueb cuiꞌ li rok li me̱x. 27Te̱letz li argollas saꞌ xca̱ xucu̱til li me̱x chixcꞌatk li cheꞌ li cuukub centímetro ru re nak teꞌxnumsi li cheꞌ li ti̱c rix saꞌ li argollas re xpakonquil li me̱x. 28Te̱yi̱b riqꞌuin li cheꞌ acacia li cuib chi cheꞌ ti̱c rix ut te̱letz li tzꞌakal oro chiru. Riqꞌuin li cheꞌ aꞌan te̱pako li me̱x. 29Te̱yi̱b ajcuiꞌ riqꞌuin tzꞌakal oro li secꞌ li ta̱cꞌanjelak saꞌ li tabernáculo. Te̱yi̱b li xar ut li cuchara ut li plato joꞌ ajcuiꞌ li ni̱nki secꞌ li ta̱cꞌanjelak re li mayejac. 30Ut rajlal te̱qꞌue li caxlan cua saꞌ xbe̱n li me̱x. Junelic cua̱nk li mayejanbil caxlan cua aran.
Teꞌxyi̱b li candelero riqꞌuin oro
31Te̱yi̱b ajcuiꞌ jun li candelero riqꞌuin tzꞌakal oro, tenbil riqꞌuin martillo. Te̱yi̱b li rok ut li xakxo saꞌ xyi joꞌ ajcuiꞌ lix naꞌajeb lix xamlel. Lix sahob ru li te̱yi̱b chanchan utzꞌuꞌuj ut xak. 32Saꞌ li candelero aꞌan, te̱yi̱b cuukub xnaꞌaj li candil. Jun xnaꞌaj candil cua̱nk saꞌ xyi ut ox ox saꞌ xcaꞌ pacꞌalil. 33Li junju̱nk chi xnaꞌaj li candil chanchan rukꞌ li cheꞌ almendro nak te̱yi̱b. Ta̱cua̱nk oxib lix sahob ru joꞌ rutzꞌuꞌujil li almendro. Joꞌcan nak te̱yi̱b li cuakib xnaꞌaj li candil. 34Ut li xnaꞌaj candil li cua̱nk saꞌ xyi ta̱cua̱nk ca̱hib lix sahob ru joꞌ rutzꞌuꞌujil li almendro. 35Rubel li xbe̱n cuib chi rukꞌeb li candelero saꞌ li rok te̱yi̱b jun li utzꞌuꞌuj li toj ma̱jiꞌ napuqꞌueꞌ. Rubel li cuib chic te̱yi̱b jun chic li utzꞌuꞌuj li toj ma̱jiꞌ napuqꞌueꞌ. Ut rubel li cuib chic joꞌcan cuiꞌchic te̱ba̱nu. Joꞌcan nak te̱yi̱b li cuakib chi xnaꞌajeb li candil. 36Chixjunil li candelero rochben lix sahob ru, junaj ru nak te̱yi̱b riqꞌuin tzꞌakal oro tenbil riqꞌuin martillo. 37Ut nak acak xya̱loꞌ li candelero, te̱yi̱b ajcuiꞌ cuukub li candil ut te̱qꞌue saꞌ xnaꞌaj saꞌ li candelero re nak lix xamlel tixcutanobresi li naꞌajej cua̱nk cuiꞌ. 38Te̱yi̱b ajcuiꞌ riqꞌuin tzꞌakal oro li chꞌi̱chꞌ li ta̱cꞌanjelak re xsetbal lix mechil ut joꞌ ajcuiꞌ li plato li naxocman cuiꞌ li te̱set saꞌ lix mechil. 39Numenak ca̱laju xca̱cꞌa̱l libra li tzꞌakal oro li ta̱cꞌanjelak e̱re re xyi̱banquil li candelero joꞌqueb ajcuiꞌ li chꞌi̱chꞌ li ta̱cꞌanjelak re xyi̱banquil lix mechil li candil. 40Qꞌue retal chi us re nak te̱yi̱b chi tzꞌakal re ru joꞌ xincꞌut cha̱cuu arin saꞌ li tzu̱l aꞌin.
Valgt i Øjeblikket:
Éxodo 25: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.