Éxodo 15
15
Lix bich laj Moisés ut lix María
1Laj Moisés rochbeneb laj Israel queꞌbichan re xlokꞌoninquil li Ka̱cuaꞌ Dios. Aꞌin lix bicheb:
La̱in tinbicha̱nk chiru li Ka̱cuaꞌ Dios xban nak kꞌaxal nim lix cuanquilal.
Quixcanabeb chi osocꞌ saꞌ li haꞌ li cacua̱y joꞌ eb ajcuiꞌ li cuanqueb chirix.
2Li Ka̱cuaꞌ Dios naxqꞌue incuanquilal. Xban aꞌan ninbichan. Li Dios aꞌan quinixcol. Aꞌan lin Dios ut aꞌan tinlokꞌoni. Aꞌan ajcuiꞌ lix Dios lin yucuaꞌ ut aꞌan tinnima ru.
3Li Dios numtajenak xcuanquil saꞌ xbe̱neb li xicꞌ nequeꞌiloc ke. Ka̱cuaꞌ Dios xcꞌabaꞌ.
4Quixcanabeb chi osocꞌ saꞌ li haꞌ lix carruaje laj faraón joꞌ eb ajcuiꞌ lix soldado. Lix soldado li kꞌaxal tzolbileb queꞌosoꞌ saꞌ li Caki Palau.
5Quixjunaji rib li haꞌ saꞌ xbe̱neb. Queꞌco̱eb rubel li haꞌ joꞌ nak nasube li pec saꞌ li haꞌ.
6At Ka̱cuaꞌ, kꞌaxal nim la̱ cuanquilal. Caqꞌue la̱ cuukꞌ saꞌ xbe̱neb li queꞌrahobtesin chak ke ut xeꞌosoꞌ.
7Riqꞌuin xnimal la̱ cuanquilal xasacheb li queꞌxyal xnimobresinquil rib cha̱cuu. Cacꞌutbesi la̱ joskꞌil chiruheb ut quilajeꞌosoꞌ joꞌ nak na-osoꞌ li qꞌuim nak nacuteꞌ saꞌ xam.
8Chanchan apunbil xaba̱nu nak xajach ru li palau. Chanchan li tzꞌac quicana li haꞌ saꞌ xcaꞌ pacꞌalil li be saꞌ xyi li palau.
9Eb li xicꞌ queꞌiloc ke queꞌxye: —Takata̱keheb. Takachapeb laj Israel. Take̱chani li cꞌaꞌak re ru cuan reheb. Takaba̱nu li cꞌaꞌru takaj reheb. Riqꞌuin li kachꞌi̱chꞌ takacamsiheb, chanqueb laj Egipto.
10Xatakla li cacuil ikꞌ ut quixjunaji rib li haꞌ saꞌ xbe̱neb. Joꞌ li chꞌi̱chꞌ li kꞌaxal a̱l, nak quilajeꞌsubeꞌ rubel haꞌ.
11Ma̱cꞌaꞌ chic junak dios joꞌ la̱at, at Ka̱cuaꞌ. Ma̱ ani chic junak cuan xti̱quilal joꞌ la̱ ti̱quilal la̱at. Ma̱ ani chic junak nim xcuanquil joꞌ la̱ nimajcual cuanquilal la̱at. Ma̱ ani chic junak naru ta̱ba̱nu̱nk re li sachba chꞌo̱lej xaba̱nu la̱at.
12Nak xacꞌutbesi la̱ cuanquil chiruheb quilajeꞌosoꞌ chixjunileb.
13Xban nak kꞌaxal nim la̱ cuusilal, la̱at yo̱cat chi cꞌamoc be chiku ut xoa̱col. Riqꞌuin lix nimal a̱cuanquilal toa̱cꞌam saꞌ li naꞌajej li xayechiꞌi ke junxilaj.
14Eb li jalaneb xtenamit teꞌrabi resil li cꞌaꞌru xaba̱nu. Ut sicsotkeb xbaneb xxiu. Ut cꞌajoꞌ nak teꞌxucuak laj filisteo.
15Ma̱ caꞌchꞌin nak teꞌxucuak eb li nequeꞌtaklan saꞌ xbe̱neb laj Edom. Sicsotkeb xbaneb xxiu li cuanqueb xcuanquil saꞌ xya̱nkeb laj Moab. Teꞌsachk xchꞌo̱l chixjunileb laj cananeo.
16Chacuocsiheb taxak xxiuheb chixjunil li tenamit. Mem ta cheꞌcana̱k nak teꞌrabi lix nimal la̱ cuanquilal re nak la̱o li tenamit li xasicꞌ ru tonumekꞌ saꞌ xya̱nkeb.
17Toa̱cꞌam saꞌ li tzu̱l li sicꞌbil ru a̱ban li cuan saꞌ li naꞌajej li xayechiꞌi chak ke junxilaj. Toa̱qꞌue chi cua̱nc saꞌ li naꞌajej li xakabanbil a̱ban re nak tatkalokꞌoni.
18Acuabej Dios, la̱at ta̱takla̱nk saꞌ kabe̱n riqꞌuin xnimal la̱ cuanquilal chi junelic kꞌe cutan.
19Chixjunileb lix cacua̱yeb ut lix carruaje, joꞌ ajcuiꞌ chixjunileb lix soldado laj faraón quilajeꞌco̱eb rubel li haꞌ nak quixjunaji rib li palau xban xcuanquil li Ka̱cuaꞌ Dios. Abanan la̱o aj Israel conumeꞌ saꞌ chaki chꞌochꞌ saꞌ xyi li palau.
20Lix María li ranab laj Aarón aꞌan jun xprofeta li Dios. Lix María quixchap jun lix chꞌina cuajb pandero xcꞌabaꞌ. Ut quicꞌamoc be chiruheb li rech ixkilal chirecꞌasinquileb lix pandero ut chi xajoc re xlokꞌoninquil li Dios. 21Lix María quixbicha li bich aꞌin:
Bichanko chiru li Ka̱cuaꞌ Dios xban nak kꞌaxal nim lix cuanquilal.
Quixcuteb chi haꞌ li cacua̱y joꞌ eb ajcuiꞌ li cuanqueb chirix, chan nak quibichan.
Li haꞌ cꞌa saꞌ li naꞌajej Mara xcꞌabaꞌ
22Laj Moisés quicꞌamoc be chiruheb laj Israel nak queꞌel chire li Mar Rojo. Queꞌco̱eb saꞌ li chaki chꞌochꞌ Shur xcꞌabaꞌ. Oxib cutan queꞌbe̱c saꞌ li chaki chꞌochꞌ ut ma̱ bar queꞌxtau li haꞌ. 23Queꞌcuulac saꞌ jun li naꞌajej bar queꞌxtau jun li haꞌ. Li haꞌ aꞌan incꞌaꞌ naru rucꞌbal xban nak cꞌa. Xban nak cꞌa li haꞌ quixcꞌabaꞌin li naꞌajej aꞌan Mara. 24Eb laj Israel queꞌchal xjoskꞌileb ut queꞌoc chi cuechꞌi̱nc chiru laj Moisés ut queꞌxye re: —¿Anakcuan cꞌaꞌru takucꞌ? chanqueb. 25Ut laj Moisés quitijoc chiru li Ka̱cuaꞌ Dios. Li Dios quixcꞌut jun to̱n li cheꞌ chiru laj Moisés. Laj Moisés quixcut li cheꞌ aꞌan saꞌ li haꞌ ut quicha̱biloꞌ li haꞌ. Sa chic rucꞌbal. Li Ka̱cuaꞌ Dios quixqꞌue jun li chakꞌrab reheb ut quixyaleb saꞌ lix pa̱ba̱leb. 26Quixye reheb: —Junelic te̱rabi li cua̱tin. Te̱ba̱nu li ti̱quilal chicuu. La̱ex te̱pa̱b lin chakꞌrab. Cui te̱ba̱nu chixjunil li texintakla cuiꞌ, incꞌaꞌ tinqꞌue li yajel saꞌ e̱be̱n, li quinqꞌue saꞌ xbe̱neb laj Egipto. La̱in li Ka̱cuaꞌ Dios. La̱in li ninqꞌuirtesin e̱re, chan li Dios. 27Queꞌcuulac saꞌ jun li naꞌajej Elim xcꞌabaꞌ. Aran cuanqueb cablaju li yuꞌam haꞌ ut cuanqueb ajcuiꞌ laje̱b xca̱cꞌa̱l (70) li ni̱nki cheꞌ palmera. Ut aran quilajeꞌxyi̱b xmuheba̱l chire eb li haꞌ.
Valgt i Øjeblikket:
Éxodo 15: kek
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators. All rights reserved.