Jujé 10
10
Juje dum dɔ Amɔrje
1Loo gə́ Adoni-Sedek, mbai gə́ Jerusalem oo to gə́ Juje taa ɓee gə́ Ai tujee pugudu-pugudu ləm, oo to gə́ yeḛ ra gə Ai gə mbai gə́ keneŋ to gə́ yeḛ ra gə Jeriko gə mbai gə́ keneŋ ləma, oo to gə́ njé gə́ Gabao̰ d’ɔm na̰’d gə Israɛlje d’isi ne mbuna dee’g ləm tɔ ndá, 2ɓəl-boo undá badə gaŋgee, mbata Gabao̰ lé to ɓee-boo gə́ boi yaa̰ kára mbuna ɓee-booje gə́ lə mbaije ləm, boi yaa̰ unda ɓee-boo gə́ Ai kara ləma, ar diŋgamje lai gə́ d’isi keneŋ to gə́ bao-rɔje ləm tɔ. 3Togə́bè Adoni-Sedek, mbai gə́ Jerusalem ula kula rɔ Hoham, mbai gə́ Ebro̰ ləm, gə rɔ Piream, mbai gə́ Jarmut ləm, gə rɔ Japia, mbai gə́ Lakis ləma, gə rɔ Dəbir, mbai gə́ Eglo̰ ləm tɔ pana: 4Gə́ reeje rɔm’g, ree laje səm mba kar sí j’aw n’rɔje gə njé gə́ Gabao̰ mbata deḛ d’ɔm na̰’d gə Juje gə Israɛlje tɔ.
5Yen ŋga mbaije lə Amɔrje gə́ mi gə́ to mbai gə́ Jerusalem ləm, gə mbai gə́ Ebro̰ ləm, gə mbai gə́ Jarmut ləm, gə mbai gə́ Lakis ləma, gə mbai gə́ Eglo̰ ləm tɔ lé, mbo̰ dɔ na̰ ndá d’aw gə njérɔje lə dee na̰’d lai, deḛ ree d’isi mbɔr Gabao̰’g ndá d’ubá naŋg bus rɔ səa tɔ. 6Njé gə́ Gabao̰ d’ula kula rɔ Juje’g loo-siée’g Gilgal d’ulá pana: Maji kari uba kuraje ləi ya̰ dee gə goo ŋgalee el ləm, ḭ kalaŋ gə tɔgi ree rɔ sí’g taa sí ɔm sí tar la ne sə sí ləm tɔ, mbata mbaije lə Amɔrje lai gə́ d’isi kaar mbal’g lé d’unda siŋga dee na̰’d rɔ sə sí.
7Léegəneeya Juje ḭ Gilgal gə njérɔje lai ləm, gə bao-rɔje lai ləm tɔ ndá d’ɔd d’aw. 8Njesigənea̰ ula Juje pana: Ɓəl dee el mbata m’ɔm dee jii’g yəg mba̰ ndá dəw kára kara dan dee’g a kaar gəs nɔḭ’g el.
9Juje ḭ Gilgal loondul’g njaa saar teḛ dɔ dee’g wai. 10Ndá Njesigənea̰ sané dee kad-kad no̰ Israɛlje’g, ar Israɛlje tɔl dee bula mbɔr Gabao̰’g ləm, tuba goo dee gə rəw gə́ aw gə́ Bet-Oron ləma, dum dɔ dee saar teḛ ne Ajeka gə Makéda ləm tɔ. 11Loo gə́ d’isi d’aḭ no̰ Israɛlje’g teḛ ne loo-suru-ɗum’g lə ɓee gə́ Bet-Oron ndá Njesigənea̰ tila dee gə kwɔjije gə́ boi-boi gə́ d’ḭ dara saar ndá deḛ d’wəi ne lai ya mee ɓee gə́ Ajeka, deḛ gə́ d’wəi yoo-kwɔji lé bula d’unda deḛ gə́ Israɛlje tɔl dee gə kiambas tɔ.
12Mee ndəa gə́ Njesigənea̰ ɔm Amɔrje ji Israɛlje’g lé Juje ula Njesigənea̰ ta kəm Israɛlje’g pana:
I kàr lé aar naŋg dɔ ɓee gə́ Gabao̰ bèe ɓa ləm,
I naḭ kara aar naŋg wəl-loo gə́ Ajalon bèe ləm tɔ.
13Yen ŋga kàr lé aar naŋg ləm, naḭ kara ya̰ goo kaḭ tar ləa ləm tɔ saar ar ginkoji dəwje neelé dal ba̰ lə dee rɔ njéba̰je’g lə dee. Ta neelé see ndaŋg taree mee maktub’g lə Njéra nédanaje el wa, kàr lé aar naŋg dan dara’g dana bab ɓó ɔs rəa ɓad gə mba kandə el, saar nai lam karee as ndɔ kára doŋgɔ#2Sam 1.18. 14Ndɔ gə́ Njesigənea̰ oo ndu dəw togə́bè lé d’oo garee kédé el ləm, gə gogo el ləm tɔ mbata Njesigənea̰ nja rɔ mbata lə Israɛlje.
15Gée gə́ gogo Juje gə Israɛlje lai tel d’aw loo-si dee’g Gilgal tɔ.
Juje tɔl mbaije gə́ mi lé
16Mbaije gə́ mi lé d’aḭ d’iya rɔ dee mee bolè mbal gə́ Makéda. 17D’ula Juje taree pana: Mbaije gə́ mi lé d’iya rɔ dee mee bolè mbal gə́ Makéda. 18Juje pana: Nduburuje biri mbalje aw uduje ne ta bolè mbal lé ndá undaje dəwje keneŋ mba kar dee ŋgəm ta dee. 19Nɛ seḭ lé, tubaje goo njéba̰je lə sí lé boo aarje naŋg el ləm, gaŋgje gel dee ɓó, ya̰je loo ar deeje d’andə mee ɓee-booje’g lə dee el mbata Njesigənea̰, Ala lə sí ya̰ dee ji sí’g mba̰.
20Loo gə́ Juje gə Israɛlje tɔl dee bula dum dɔ dee gə no̰ mba̰ ndá deḛ gə́ d’askəm kaḭ kaw mba kaji rɔ dee lé d’aḭ d’uru mee ɓee-booje gə́ ndògo-bɔrɔ gugu dɔ dee sub ndá, 21Israɛlje lai tel ree gə loo-kulee lɔm rɔ Juje’g loo-si dee’g Makéda, ar dəw kára kara teḛ təa ila dɔ Israɛlje’g bèe el ŋga.
22Yen ŋga Juje pana: Ɔrje ta bolè mbal arje mbaije gə́ mi neelé d’unda loo teḛ raga ndá reeje sə dee rɔm’g nee. 23Deḛ ra togə́bè ya, mbaije gə́ mi gə́ d’ar dee d’unda loo mee bolè mbal’g teḛ raga gə́ deḛ ree sə dee rəa’g lé ɓa nee: mbai gə́ Jerusalem ləm, gə mbai gə́ Ebro̰ ləm, gə mbai gə́ Jarmut ləm, gə mbai gə́ Lakis ləma, gə mbai gə́ Eglo̰ ləm tɔ. 24Loo gə́ deḛ ree gə mbaije neelé no̰ Juje’g mba̰ ndá Juje ɓar dəwje gə́ Israɛl lai ɓa ula ɓé-njérɔje gə́ d’aw səa na̰’d lé pana: Rəmje gə́ kédé nee ndá tilaje gɔl sí gwɔb mbaije’g neelé. Togə́bè ɓa deḛ rəm pər gə́ rɔ dee’g tila gɔl dee gwɔb mbaije’g lé tɔ. 25Juje ula dee pana: Ɓəlje el ləm, undaje bala el ləm tɔ, waje rɔ sí kɔgərɔ ləm, waje diŋgam meḛ sí’g ləm tɔ, mbata yee gə́ bèe ɓa Njesigənea̰ a ra gə njéba̰je lə sí lai gə́ seḭ a gə rɔje sə dee lé.
26Gée gə́ gogo ndá Juje kunda dee tɔl dee, tɔɓəi yeḛ na nin dee kəm kagje’g mi ar dee to keneŋ saar kàr andə. 27Loo gə́ kàr a gə kandə lé Juje un ndia gə mba kar dee tɔr nin dee kəm kagje’g ndá d’ɔm dee mee bolè mbal gə́ deḛ d’iya rɔ dee keneŋ kédé lé tɔɓəi d’udu ta bolè mbal gə biri mbalje gə́ to keneŋ un kudee mee ndəa gən saar teḛ ɓogənè.
Juje taa ɓee-booje gə́ to par gə́ dɔkɔl lé
28Mee ndəa’g neelé Juje rɔ gə ɓee gə́ Makéda gə kiambas ɓa taa ne, yeḛ tɔl mbai gə́ keneŋ ləm, gə koso-dəwje lai gə́ d’isi keneŋ ləma, yeḛ tuji ne ɓee-boo neelé pugudu-pugudu ləm tɔ, yeḛ ya̰ loo ar dəw kára kara teḛ aḭ aw el ndá yeḛ ra gə mbai gə́ Makéda to gə́ yeḛ ra ne gə mbai gə́ Jeriko lé bèe tɔ.
29Juje gə Israɛlje lai d’ḭ Makéda d’aw Libna ndá d’ur dɔ njé gə́ Libna’g gə rɔ. 30Njesigənea̰ ya̰ Libna gə mbai gə́ keneŋ ji Israɛlje’g ar dee rɔ səa gə kiambas tuji ɓee-boo ləm, gə deḛ lai gə́ d’isi keneŋ pugudu-pugudu ləm tɔ, yeḛ ya̰ loo ar dəw kára kara teḛ aḭ aw el ndá yeḛ ra gə mbai gə́ keneŋ to gə́ yeḛ ra ne gə mbai gə́ Jeriko lé bèe tɔ.
31Juje gə Israɛlje lai d’ḭ Libna d’aw Lakis, deḛ d’wa loo-si dee ta ɓee’g neelé ɓa d’ur dəa’g gə rɔ ɓəi. 32Njesigənea̰ ya̰ Lakis ji Israɛlje’g ar dee taa mee ndɔ gə́ njekɔm’g joo ndá deḛ tuji ɓee-boo neelé gə deḛ lai gə́ d’isi keneŋ pugudu-pugudu gə kiambas to gə́ deḛ ra ne gə Libna bèe ya tɔ. 33Togə́bè ɓa Hɔram, mbai gə́ Gejer ḭ aw gə mba la gə njé gə́ Lakis. Juje dum dəa-yeḛ gə dəwje ləa ləm, ya̰ loo ar dəw kára kara aḭ aw el ləm tɔ.
34Juje gə Israɛlje lai d’ḭ Lakis d’aw Eglo̰, deḛ d’wa loo-si dee ta ɓee’g neelé ɓa d’ur dəa’g gə rɔ ɓəi. 35Deḛ taa gə́ mee ndəa gən ya ndá deḛ tuji ɓee-boo gə deḛ lai gə́ d’isi keneŋ lé pugudu-pugudu gə kiambas tɔ, Juje tuji ɓee-boo lé pugudu-pugudu gə́ mee ndəa gən to gə́ yeḛ tuji ne Lakis lé bèe ya tɔ.
36Juje gə Israɛlje lai d’ḭ Eglo̰ ndá d’aw d’ur dɔ Ebro̰’g gə rɔ. 37Deḛ taa tɔɓəi deḛ tujee-yeḛ ləm, gə mbai gə́ keneŋ ləm, gə ɓee-booje ləa lai ləma, gə deḛ lai gə́ d’isi keneŋ ləm tɔ gə kiambas, Juje ya̰ loo ar dəw kára kara aḭ aw el to gə́ yeḛ ra ne gə Eglo̰ bèe tɔ ndá yeḛ tuji ɓee-boo neelé gə deḛ lai gə́ d’isi lé keneŋ pugudu-pugudu tɔ.
38Juje gə Israɛlje lai tel dɔ dee njoroŋ d’aw d’ur dɔ Debir’g gə rɔ. 39Deḛ taa ɓee neelé ləm, tuji mbai gə́ keneŋ ləm, gə ɓee-booje ləa lai ləma, gə deḛ lai gə́ d’isi keneŋ pugudu-pugudu gə kiambas ləm tɔ ɓó d’ya̰ loo d’ar dəw kára kara aḭ aw el, Juje ra gə Dəbir gə mbai gə́ keneŋ to gə́ yeḛ ra ne gə Ebro̰ ləm, gə Libna gə mbai gə́ keneŋ lé ləm tɔ.
40Togə́bè Juje dum dɔ ɓeeje neelé lai, ɓeeje gə́ to kaar mbal’g ləm, gə njé gə́ par gə́ dɔkɔl ləm, gə njé gə́ to ndag-loo’g ləma, gə njé gə́ to dɔdərloo’g ləm tɔ ndá yeḛ tuji mbaije lai, yeḛ ya̰ loo ar dəw kára kara aḭ aw el ləm, yeḛ tuji néje lai gə́ d’əmə ləm tɔ, to gə́ Njesigənea̰, Ala lə Israɛlje un ne ndia aree lé. 41Juje dum dɔ dee un kudee Kades-Barnea saar teḛ ne Gaja ləm, yeḛ dum dɔ ɓee gə́ Gosen lai saar teḛ ne Gabao̰ ləm tɔ. 42Juje taa ɓeeje neelé lai ləm, gə mbaije lə dee gə́ keneŋ ləm tɔ mbata Njesigənea̰, Ala lə Israɛlje rɔ ar dee tɔ. 43Gée gə́ gogo ndá Juje gə Israɛlje lai tel d’aw loo-si dee’g Gilgal tɔ.
Valgt i Øjeblikket:
Jujé 10: SBA2015
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Ngambai Bible © Alliance Biblique du Tchad 1989, 2015.