Lute 4
4
Boodze wayirika musamu wa masaala ma Elimeleke
1Boodze watoomboko ku mweelu bvula na wadzakala haho. Na mukuuri wabaleele Boodze waba mu kuluta. Boodze wamuleele ti : « Kisungulu ! Kokosolo na dzakala hamaha. » Nde wakokosolo na wadzakala. 2Boodze waholo baatu kuumi mu bakulu bababakala ba bvula na waleele ti : Dzakaleenu hamaha. Bo se badzakala. 3Tumi nde waleele kuri mukuuri ti : « Nahomi, wafumini ku nkoonsi ya Mohabi, weki yarika kibari kya nsi kyasiisa mpaangi yeetu Elimeleke. 4Na me nsiminyee mu kukuyaabisa dyo, mu kukuleele ti : Suumba, ha mankula ma minzakiri na bakulu bababakala ba kaanda dyaami ! Mbuti ye tiiri kukuula, kuula ! Mbuti wahele kukuula, leele me, mpisi me nyaaba, bukuri kwahele muutu mukimi ha yulu ye, wuri lo kuuriri ; me ha mambisa ma ye nyiri. » Nde wabvutula ti : « Me nyisa nkuululu. » 5Boodze waleele ti : « Kiluumbu ki wusuumba ye nseke kuri Nahomi, lo ye sa kondolo Lute wa ku Mohabi, mukasi wunde wafwiiri#4.5 Ye fwanikini mukasi Lute : Mbangulu yantama ; Kihebereho wuyisuumba se ku Lute. Mu kitsuri kyokinso, kumono 2.20 na myatina., mu kukebe nkuumbu wunde wafwiiri ha saala dyaandi. » 6Mukuuri wabvutula ti : « Me lo nyahele kukuula, mu kubata kubiiyisa saala dyaami. Ye suumba kwaaku miswa mya me mya nkuululu, bukuri me nyahele kukuula. »
7Mu ntaangu yantama, mu Iselili, mu kudzeenge mpisi musamu wutariri nkuululu bunu pele kuyiingisa, babayusulaana sapaatu na kudiha kuri mbaasi. Kikyo kyaba kimbaangi mu Iselili. 8Mukuuri waleele kuri Boodze : Suumba kwaaku ye-meene ! Nde wayusula sapaatu dyaandi. 9Boodze waleele kuri bakulu bababakala na kaanda dyodinso ti : « Beenu luri bambaangi lumalu ti me nsuumbiri kuri Nahomi byobinso byabeeri bya Elimeleke, bya Kilyoni na bya Maloni, 10ti mporiri se Lute, wa ku Mohabi, mukasi Maloni, mu kuba mukasi waami, mu kukebe nkuumbu wunde wafwiiri ha yulu saala dyaandi, mpisi nkuumbu wunde wafwiiri yihele kudziimbila ha kakati dya bampaangi baandi na ha mfuundu bula bwaandi. Beenu luri bambaangi mu kiluumbu ki. » 11Baatu bobanso baba ha kibeendu kikyo na bakulu bababakala baleele ti : « Beetu turi bambaangi ! Hemese Yaave kasa ti mukyeetu, wukoto mu nzo yaaku kaba bunu Laakele na Leya bari, mu boboolo, batuungiri nzo Iselili. Buukisa busina bwaaku mu Efarata#4.11 Laakele na Leya : Bakasi ba Yakobi, kumono Mba 29.11 : Efarata : Kumono 1.2 na myatina., na sa nkuumbu yaaku mvuumfu mu Beteleemi ! 12Hemese Yaave kaha bilesi kuri ye, mu kituuti kyamukyeetu wu, mpisi heki nzo yaaku yiba bunu nzo Perese#4.12 Perese nkaaka Boodze, kumono 4.18-21 ; 1 Mampolo 2.5 ; 9-12. wabutukila mu Yuuda bo na Tamaari ! »
Boodze wakweele Lute ; mbutukulu Obedi, nkaaka Daavidi
13Boodze waholo Lute na waba weki mukasi waandi ; wabvuutuna na nde. Mu kutya kwa Yaave, Lute wabaka yimi na wabuta mwaana wamubakala. 14Bakyeetu baleele kuri Nahomi ti : « Yaave kaba wakeembusu, nde wuri kasiiri katala ko ti, lolo dimadi, ye ba mukuuri pe ; nkuumbu yaandi yiyukukuna mu Iselili ! 15Nde wubweese kukuha kidziingu, na wukubakisa mu bununi bwaaku ; bukuri buko bwaaku wukutiiri, wukuheeri muteekulu. Nde wubvuri ntalu kuri ye ti na baala nsaamu bababakala. » 16Nahomi waholo mwaana, wamusa ha nkata#4.16 Wamusa ku nkata : Bu basaanaana kuri mwaana wantele, fwanikiseenu na Mba 30.3-8 ; 48.5-12 ; 50.23. yaandi, nde weki mubuungiri mwaana. 17Bambaasi bakyeetu bamuluka nkuumbu na kuleele ti : « Mwaana wubabutiri Nahomi ! » Bamuha nkuumbu ya Obedi. Ngo taayi dya Yese, taayi dya Daavidi.
Muloongo kinkaaka kya Daavidi
18Bamaba ngo babutukila mu Perese : Perese wabuta Heseroni. 19Heseroni wabuta Lame ; Lame wabuta Aminadabe ; 20Aminadabe wabuta Nasoni ; Nasoni wabuta Salema ; 21Salema wabuta Boodze ; Boodze wabuta Obedi ; 22Obedi wabuta Yese ; Yese wabuta Daavidi.
Alliance Biblique du Congo 2024