Lute 1
1
Manyoongi ma kaanda dya Elimeleke
1Mu biluumbu byabatumaana banzoonsi, kwabakama nzala mu nsi. Mubakala mosi wa ku Beteleemi dya Yuuda wayende, na mukasi waandi na baala baandi boboolo, mu kweedzakala mu bunzeense ku nsi ya Mohabi#1.1 Ntaangu yabatumaa babvuukisi ku Iselili : Kampe 1 100 tekesele Yisu kabutuka, kumono mu mukaanda Balarimi. Mohabi : Mulaandu wabweeye wuri ku esete dya mubu Wafwa.. 2Mubakala wunde waba nkuumbu Elimeleke ; mukasi waandi nkuumbu Nahomi na baala baba mankuumbu Maloni na Kilyoni. Bo baba bari Efarata#1.2 Efarata : Kitsuumbu kya Yuuda kiri ku nkoonsi Beteleemi, bula buri ku suude dya Yerusalemi., dya Beteleemi dya Yuuda. Batuula ku nkoonsi ya Mohabi na badzakala kukwo. 3Elimeleke, mulumi Nahomi, wafwa, na mukasi wasaala nde mukaka na baala baandi boboolo. 4Baala bamaba, bayisa kukweele bakyeetu ba ku Mohabi. Mosi mu bo waba nkuumbu Orepa, waboolo nkuumbu Lute. Bo badzakala haho kampe mibvu kuumi. 5Ha mambisa haho, Maloni na Kilyoni se bafwa. Nahomi wasaala nde mukaka kwahele baala baandi boboolo na mulumi waandi.
Lute wayende bo na Nahomi ku Beteleemi
6Wateleme, nde na bako baandi boboolo, basiisa nkoonsi ya Mohabi, bukuri kukwo, Nahomi wayuka ti Yaave waseenge kaanda dyaandi mu kubaha byandya. 7Nde wasiisa kibeendu kikabadzakalaana na bako baandi boboolo. Bo baholo nzila, mu kubvutuka ku nsi ya Yuuda. 8Nahomi waleele kuri bako baandi boboolo ti : Yendeenu, mpisi nde kabvutuka ku nzo nguri yaandi. Hemese Yaave kasoongo mbweeyulu mutima waandi kuri beenu, bunu bu lwasoongiri beenu kuri babo bafwiiri, na kuri me se. 9Hemese Yaave kasa kuri ti, mpisi nde mu beenu, kabaka kibeendu kyadzuuna mu nzo mulumi. Nde wabanyumbutina. Bo bafula misaakulu na badila, 10bo bamuleele ti : « Pele ! Beetu tubvutuka kintwaari na ye kuri kaanda dyaaku ! » 11Nahomi waleele ti : « Bvutukeenu, baala baami ! Bukuri nki beenu lutiiriri kweende na me ? Buri me nyakiri na baala bababakala mu mwooyo waami, bari lo babeeri balumi beenu#1.11 Mbuti wamubakala fwiiri kwahele kusiisa mwaana, mpaangi yaandi, bunu mpe kaanda dyabele, fwanikini kukondolo mufwiiri mu kubuta baala na nde. Kikyo kikulu kiri nkuumbu « lebvira », kumono Ngi 38.6-8 ; Mat 22.24. ? 12Bvutukeenu, baala baami, yendeenu ! Bukuri me nyeki nkati kinuni mu kubweese kukweele ; ti hayuku me ndeeriri ti : “Kwakiri na nsiitu mu me, mbuti mu nsinsika yi, me nkweeriri na mbutiri baala bababakala”, 13buri beenu lo lukiingiri natee ku babuuka bo ? Buri beenu lo lubisiri kubweese kukweele ? Pele, baala baami ! Manyoongi ma me mabvuri ti na ma beenu. Yaave wantekiri#1.13 Mpasi dzaami dzibvuri makwa mu beenu : Mbangukulu yikimi nyiri na ngebe dzalaka mu ntoono ya beenu. mbisa. »
14Bako boboolo bafula misaakulu na babweese kudila. Tumi Orepa wanyumbutina buko bwaandi, ngo Lute bunu bu kamunamitina. 15Nahomi waleele kuri Lute : « Mbaasi-kweele yaaku bvutukiryee kuri kaanda dyaandi na kuri banzaambi baandi ; ye se bvutuka busiiri mbaasi-kweele yaaku. » 16Ngo Lute wabvutula ti : « Yaa nkwiikisa mu kukuyekele ko na kubvutuka ; bukuri kukwo ku wukweende ye, me se kunu kwo nyikweende ; haho ha wubwiila ye tolo, me se hanaho nyibwiila tolo ; Kaanda dyaaku ngo kaanda dyaami, na nzaambi yaaku sa yiba nzaambi yaami. 17Haho ha wufwiila ye, hanaho me se nyifwiila, na haho banziika. Yaave kanyirikila ma na kabweese manaa, mbuti kari lufwa luhaambila ye na me ko ! »
18Nahomi kamonaa ti Lute wabamusiilaa siri mu kweende na nde, wahoto mu kubweese kumudzoonsolo myo. 19Bo bayende boboolo natee kubatubikiri ku Beteleemi Bu batuula ku Beteleemi, bvula dyodinso dyaningina mu ntoono bo. Bakyeetu baleele ti : « Buri wumawu Nahomi ? » 20Nahomi wabaleele ti : « Yaa lubweese kunteele mu nkuumbu ya Nahomi ko ; ngo nteelee mu nkuumbu ya "Mara#1.20 Nkuumbu Nweemi, mbangukulu lo ti « nyeke », wuri mu bubwe. Mara mbangukulu lo ti « nkari », wuri mu manyoongi.", bukuri Nzaambi ngaa-mpinu wanyirikiri myankari ! 21Me bu nyaba kweende myooko myaluula, Yaave mvutiri myooko myamukangala. Bukuri nki beenu lunteele ti Nahomi ? Yaave wateeri kimbaangi kyakibi mu me, Nzaambi ngaa-mpinu wayirikiri mamabi kuri me. »
22Bubwo Nahomi kabvutukiri ha kimosi na buko bwaandi Lute wa ku nkoonsi ya Mohabi. Bo batuula ku Beteleemi, mu mbandukulu ntololo looso.
Alliance Biblique du Congo 2024