Mankuma 1
1
1Mankuma ma Solomo,
mwaana Daavidi mbyaasi mu Iselili.
Mufunu mukaanda
2Mu kuyaaba madyeele na nyikusulu,
na mu kuyikisa bitoolo bya mbakukulu.
3Mu kutaambula nyikusulu dza kimuutu,
nzeengulu yahele na bubayi, nsungumunu na nzelu byahele na mankoondoko.
4Mu kuha kuri madzeeke ndubukulu,
kuri munkuula nyaabulu na nsimu.
5Bangaa-madyeele ma mbakukulu bayuka na babweese nyukulu,
bangaa-nyaabulu babaka bwa kutwaalisila.
6Mu kubakula Mankuma na mambangukulu,
nzoonsulu dza bangaa-madyeele na manzungukulu.
7Kibvumi kya Yaave ngo mbandukulu nyaabulu na madyeele.
Biwulu binyaafunaa nyikusulu.
Nkebusulu mwaa minkuula
8Mwaana waami, yuka nyikusulu dza taayi dyaaku,
yaa nyaafuna nyikusulu dza nguri yaaku ko.
9Bukuri dziri bunu lukoongolo lwa bweese ku mutu waaku,
na bilebete mu nkiingu yaaku.
10Mwaana waami, mbuti bangaa-masumu batiiriri kukuwumuna,
lo yaa wubatambukila ko.
11Mbuti baleele ti : « Wasa ba kintwaari na beetu !
Tweendee tuswemekineenu mu kutsaamuna makila.
Tuswemekineenu wahele na ntoono.
12Tubamineenu bamwooyo, bunu bu saana nsi ya bafwa,
babatsiina, bunu babo basundukaa mu bulu.
13Sa twabakeenu bitsuumbu byobinso bya busina bwantalu,
na sa twaluuluseenu manzo mu bwo.
14Ye sa baka kikuuku kyaaku ha kakati dya beetu,
na kuba na kisweekulu kya ntwaari ! »
15Mwaana waami, yaa weende nzila mosi na bo ko.
Ba ha luteke na sasila kuulu kwaaku la na nzila bo.
16Bukuri miilu mya bo midzumuna mu kusa bubi,
na miwasula mu kweetsaamuna makila.
17Kwabuunu bataamba siinga
ha busu bwa mpisi kiri na mapapu.
18Ngo bo bakete mu kutsaamuna makila ma bo-meene,
bakwesa mu manyutu ma bo-meene mu mansweemunu.
19Mono, mamo ngo manzila mabatiiri kwebakila ndaandu mu bungaka :
Baholo kidziingu kuri wuri na kyo.
Nteelulu mbila na ndubukulu ya madyeele
20Madyeele mari mu kwefula misaakulu mu nzila,
mo mari mu kwedzaangisa mbeembu mu bibeendu,
21makweteele mambila mu bibeendu bi bari mu kwesa lusuku,
mu mankotulu ma myeelu mya mabvula, mayaabisa mukeensu waandi.
22Natee nkya ntaangu madzeeke, batya budzeeke ? Beenu bangaa-kinwa lunyiima kinwa ?
Na biwulu lunyaafuna nyaabulu ?
23Sa lwiisa bvutuka mu ndubukulu dzaami.
Mono me nyinyaka ha yulu beenu Mpeeve waami,
na kuyaabisa kuri beenu maampu maami ;
24Bukuri me nteeriryee mbila, beenu lubisiryee,
me ndaambiryee myooko myaami, kuri muutu ti mosi ko, wukebikiryeenu.
25Beenu lunyaafunyee mandoongi maami momanso,
lwahele se kutaambula ndubukulu dzaami.
26Me se sa nyaluseye ha luba mu mpasi,
sa nyalusiila munsiku ha lubaka boomo.
27Mu ntaangu yi lukwisikila nsisi, mpopi yeenu bunu kimbwongolo,
ha lukwisikila ngebe na bunsaana.
28Mu ntaangu yiyo, beenu sa lwateele me mbila, ngo me mbasi tsuku nyiluha mvutu ko,
sa lwansaka, ngo ludzuukila ko.
29Bukuri beenu lwanyaafuni nyaabulu,
na lwahele kusoolo kibvumi kya Yaave,
30lwasiiri kutya mandoongi ma me ko,
lwanyaafuni ndubukulu dzaami dzodzinso.
31Beenu sa lwataambula nseembulu dza ndyaatulu yeenu,
na sa lwamono mpasi mu ntoono mamfuundu ma beenu-meene.
32Bukuri mbisulu madzeeke sa yibadzusa,
na kuhele kwa ngebe kwa biwulu sa kwabafuukisa.
33Ngo kuri wunde wuywiila me, sa kaba mu kidzuunu, kwahele kuba na boomo bwa mpasi.
Alliance Biblique du Congo 2024