Lutaangu 36
36
Mikele mu makweele ma bakyeetu bataambula saala
1Bakuutu ba makaanda ma kaanda dya Ngaladi, mwaana Makiri, muteekulu Manase, mu kaanda dya Yoosefi, bakokosolo kuri Moose na bakuutu ba makaanda ma baala ba Iselili, badzoonso ha mankula ma bo. 2Baleele ti : Moose, Yaave wakutumini mu kukabula nsi ha kakati dya makaanda ma Iselili, mu nteelulu wari. Wakutumini se mu kuha kibari kya nsi kya mpaangi beetu Selofadi kuri baala baandi babakyeetu#36.2 Kumono 27.1-11.. 3Mu lumalu mbuti bo bakweeriri mubakala mukimi mu kaanda dya Iselili, lo kibari kya nsi kya bo sa bakiyusula mu kya kaanda dyeetu mu kubweese kuha kuri kaanda dya bo dyamoono. Mu bubwo saala dya beetu di twabakiri mu wari sa dyaba dyakuluka. 4Ntaangu yikwiisa Yubile#36.4 Kumono Bal 25.8-54. kuri baala ba Iselili, saala dya bo sa dyateeteme ha yulu saala dya kaanda dibakoto na sa bayusula mu dya kaanda dya beetu.
5Mu lutumu lwa Yaave, Moose wayaabisa kuri baala ba Iselili ntumunu dzimadzi : « Baala ba kaanda dya Yoosefi bari na buungu mu kudzoonso bubwo. 6Mamama maampu ma Yaave makayaabisiri mu ntoono baala ba Selofadi babakyeetu : Sa bakweele wunde wubamono ti wamubwe ha miisu mya bo, ngo korodooko mulumi yelemini kuba mu kaanda dya bataayi ba bo. 7Mu bubwo mansi ma baala ba Iselili mari nyookolo kuri kaanda dikimi ko. Bukuri baala ba Iselili bayelemini kukaangama mpisi muutu mu kaanda dya bataayi baaku. 8Mpisi mwaana wamukyeetu wuholo saala mu makaanda ma baala ba Iselili, yelemini kukweele mubakala wa mu kaanda dya kaanda dya bataayi baandi. Mu kuri ti baala ba Iselili baba mpisi muutu na saala dya bataayi baandi. 9Bubwo saala diri nyookolo kuri kaanda dya kaka ko. Bukuri baala ba Iselili bayelemini kukaangama mpisi muutu mu kaanda dya bataayi baaku. »
10Baala babakyeetu ba Tselofade bayirika bunu bwa yaabisiri Yaave kuri Moose. 11Mahela, Tiretsa, Hongela, Milika na Nowa, baala babakyeetu ba Tselofade, bakweele baala ba taayi dyaaku dya kilesi, 12bababakala babo bari mu makaanda ma Manase, mwaana Yosefi. Bubwo mansi ma babakiri mu saala manamitina munsa kaanda dya bataayi baaku.
13Dzidzo ngo ntumunu na mikele myayaabisiri Yaave mu munwa Moose kuri baala ba Iselili, ku bibiti bya Mohabi, bebele na Yorodaani ku Yeriko.
Alliance Biblique du Congo 2024