Miika 2
2
Kuri bangaa-bumbabu
1Kyaari, kuri babo bari, mu butsuku ha yulu mambuka,
bakwetaasila kuyirika mamabi,
bwiisi bukyaanaana, bamayirikiri,
bukuri bakuka mu kumayirika.
2Mbuti manseke batiiri,
lo badzikiri ;
mbuti manzo,
lo bakalimini ;
bo bakwekwaamisa baatu na makaanda maaku,
bakwebaholo
na bi bari babaka.
3Mu didyo Yaave kaleele ti :
« Me nyiri mu kutaasila manyoongi
kuri kaanda dya beenu ;
beenu lubangisina kupala mu mo ko,
na luri nyendekele kuri lwasiimbila mabusu ko ;
bukuri ntaangu yiyo sa yaba
ntaangu ya mpasi. »
4Mu kiluumbu kikyo sa baluteele nkuma,
sa lwakuuma nkuumunu yimayi ti :
« Kutsaamuna, beetu batutsaamuna,
baatu ba beetu babadzika na mansi maaku ;
bataatu beetu bakabiri manseke meetu,
bo na bo.
Heki mu nki ntoono bayusiri kuri me,
mu kuha kuri mungooyi ?
5Mu didyo, mu baatu ba Yaave
kubweese kuba muutu ti mosi ko,
wutakila ye kibeendu. »
Babo batungukila mukeensu mubikiri
6Bo bari mu kusa biwobiri, mu kuleele kuri me ti :
« Me mpoto biwobiri.
Ngo bakoosaanaa biwobiri mu misamu mya bubwo ko.
Misamu mya mpasi mimyo mikoono kwiisa ko.
7Buri bubwo nzo Yakobi yileele ?
Ti Yaave kasiirye na nkindusulu mutima ko ?
Buri bibyo lo bi beeri biyiriki bya Yaave ? »
Me ngo wuri manyileele me
sa mayirika mamabwe kuri baatu basuunguma.
8Dzoono dya dzoono di,
beenu lwahoriri baatu ba me, bunu bataatu,
beenu lwahoriri biyuungu
bya baatu bafumini ku mudziingu,
bari mu kuluta mu kidzuunu.
9Beenu lwabingiri bakyeetu ba baatu baami,
mu manzo ma bamonaa kiminu.
Beenu lwayusuri baala ba bo,
mu bubwe bu nyabeeri nyabasuusa.
10Telemeenu ! Yendeenu !
Bukuri yi yisiiri ntaangu ya kidzuunu ko !
Mu ntoono ya nsumukunu yeenu,
nsamukunu yamakwa sa yiisa.
11Mbuti muutu wuri na mpeeve ya mawunu,
na wukwesa mpya :
« Lo me sa nsa biwobiri
kunsa bviinya na malu mamakwa,
mu ntoono ye ! »
Lo nde sa kaba wukwesa biwobiri kuri baatu.
12Me sa nyakutukisa ye, kaanda dya Yakobi dyodinso.
Me sa nyabvuuta ha kimosi,
babo basaala bamwooyo, mu Iselili.
Me sa nyabasuusa bunu bimeeme munsa lupaangu,
sa beyende bunu mukaangu bimeeme,
ha kakati dya leenge.
Sa baba mpuumbu baatu.
13Wunde wukwebaala nzila
wuri ku mankula ma bo.
Bo bamwaabala nzila,
bamwaalutila ha mweelu,
na bamwaapala.
Mbyaasi bo yimwaaluta ku mankula ma bo,
Yaave wuri ku mankula ma bo.
Alliance Biblique du Congo 2024