Malaki 2
2
Ntumunu kuri bangaanga-Nzaambi
1Mu lumalu, ntumunu yimayi kuri beenu bangaanga-Nzaambi : 2« Mbuti beenu lwahele kuyuka, lwahele kuheele mutima mu kuha nkeembu kuri nkuumbu yaami, bu leeriri Yaave ngaa-mikaangu, me sa nyalubulila mpopi, sa nyaloko nsakumunu dzeenu. Me sa nyaloko lusakumunu lulwo, bukuri beenu lwahele kuheele mitima. 3Mono, me sa nyirika mamabi kuri bilesi bya ye. Me sa nyanyaka nkeensu ku kidziri kyaaku ; na me sa nyalulooso ha kimosi na nkeensu ya minkeembu myeenu. 4Na beenu sa lwayaaba ti, me nyaluheeri ntumunu yiyo, mpisi lulelusunu lwaami na Leevi#2.4 Lulelusunu... Baleevi : Mu Kihebereho lulelusunu na Leevi. Lulelusunu lumalu lwahele kubaangula ti mu kibeendu kimosi mu Lulelusunu lwalukulu. Lwo lwatinisina mu ntoono bilesi bya Leevi, byabasalaa kisalu kya bungaanga-Nzaambi, bunu pele kya bisari bya mu nzo-Nzaambi.lunamitina kuba, bu leeriri Yaave ngaa-mikaangu. 5Lulelusunu lwa me na nde, lwaba kidziingu na kiyeengi, me nyaheeri byo kuri nde. Nde waba na kibvumi mu me. Nde wabatekitaana mu boomo ha busu bwa nkuumbu yaami. 6Nyikusulu dzangwanwa dzaba mu munwa waandi, na bubayi bwaba bwahele mu bibori byaandi. Nde waba kwedyaatila, mu kiyeengi na mu nsungumunu. Nde wasa kuri ti balaka bayiinga madyeele. 7Bukuri bibori bya ngaanga-Nzaambi bikookebaana nyaabulu, na bakoosakaa nyikusulu#2.7 Kumono matina mu Han 2.11. dzifumunaa mu munwa waandi, bukuri nde ngo munati-mikeensu wa Yaave ngaa-mikaangu. 8Ngo beenu lwasasikiri la na nzila. Beenu lwabwiisiri balaka mu nyikusulu, beenu lwatsyaamini lulelusunu lwa Leevi, bu leeriri Yaave ngaa-mikaangu. 9Me se nyakituri beenu baatu banyaafunu, na basaanu kuri baatu bobanso, bukuri beenu lwasiiri kunama manzila maami ko, na lwasiiri kusiimbila bidziri bya baatu mu nyikusulu dzeenu ko. »
Manzelu moolo ma kuyekele lulelusunu
10« Buri beetu bobanso taayi kari dimosi ko ? Buri kari Nzaambi yoyimosi yatuyirika ko ? Mu nki turi mu kweyarika baatu, kuri bampaangi ba bo, mu kunyaafuna lulelusunu lwa bataayi beetu ? 11Yuuda wayarikiri ; ngaansi dza salimini mu Iselili na ku Yerusalemi. Bukuri Yuuda wasaanini kibeendu kyangisi kya Yaave, kikatiiri : Nde wakweeriri ntuumba yisaambilaa nzaambi yanzeense. 12Yaave sa kayisila muutu wayirika mamo ; sa kapalisa se mu manzo mangooto ma Yakobi, wunde wukebe na wuha mvutu ; sa kayisila se wunde wunata kikabu kuri Yaave ngaa-mikaangu. »
13« Dyaambu dyamoolo di luri mu kusa ngo dimadi : Beenu luri mu kuluulusaa dziku dya Yaave mu mansangisi, mu bidilu na mu nkuumunu, bukuri nde wahele kubweese kusyeeteke kuri kikabu, na wahele kutaambula mu kiminu, bifuminaa mu myooko myeenu. 14Beenu luri mu kweleele ti, mu nkya ntoono ? Bukuri Yaave waba mbaangi, ha kakati dya ye, na mukasi wa bulesi bwaaku, wu wawunini, buni nde ngo waba nduku, na mukasi waaku wa lulelusunu lwaaku. 15Buri nde wahele kuyirika muutu mosi, wuri na muswiinyi na muwuumunu ? Na ndemosi wunde nki kakwesaka ? Nde wukwesaka bilesi bya mutaasila Nzaambi. Seenee madyeele mu kidziingu kyeenu ; yaa wuna mukasi waaku wa bulesi ko. 16Bukuri nde katiiri ko wubingaa, bu leeriri Yaave, Nzaambi ya Iselili, bwobumosi wunde wufukaa bubi mu kinkutu kyaandi, bu leeriri Yaave ngaa-mikaangu. Seenee madyeele mu kidziingu kyeenu, mpisi luhele kwewuna". »
Yaave wuri mu kuheeke munati-mikeensu waandi
17Beenu luri mu kuholoso Nzaambi bito mu nzoonsulu dzeenu. Na beenu luri mu kuleele ti, haho : "Mu nki turi mu kumuholoso bito ?" Ha lukooleelaa ti : "Mpisi muutu wuyirika bubi, lo wamubwe ha miisu mya Yaave ; nde wumonaa kiminu mu baatu ba bubwo ; bunu pele, Nzaambi yitsuundisaa kuri kari ?"
Alliance Biblique du Congo 2024