Levitiki 7
7
Kikabu kya mfutulu masumu
1Yi ngo ngisi mu ntoono kikabu kya kubweese kuyirika : Kitotolo kibvuri bungisi. 2Ha kibeendu kibakekaa bibulu byakuha mu kikabu, bayelemini kukeke se kibulu kya kikabu kya mfutulu masumu, na kunyaka makila maandi mu teke dziku. 3Na kunata kuri Yaave ma ndaambu mamama : Mukila, maasi makaangama mu midya, 4mamfi momoolo na maasi manamitina mu mbaansi na lunzala, sa bayusula ha kimosi na mamfi. 5Ngaanga-nzaambi sa kayanga bibyo ha yulu dziku mu kikabu kyanyeengusu mu mbaawu mu ntoono Yaave. Kikyo kikabu kya kubweese kuyirika 6Bani babakala bari mu kaanda dya bangaanga-Nzaambi bayelemini kudya hansa kibeendu kyangisi, sa badya kyo kunsa bungisi na bungisi 7Ngisi yitariri kikabu kya mfutulu masumu yiniyo se yiri mu kikabu kya kubaka mpemisi. Toongo twa kibulu tusaala twa ngaanga-Nzaambi bunu buri mu kikabu kya ndoombulu mpemisi.
Byataasulu kuri Ngaanga-Nzaambi
8Mbuti muutu heeri kikabu kyakuka, lo mukaanda kibulu wunde wa ngaanga-Nzaambi. 9Bikabu byobinso bya bikunu, biba byaya ku nsuku dziku bunu pele ha kibeke, bya ngaanga-Nzaambi yibee yoko. 10Na mpisi kikabu kyabikunu kyasaanga na maasi kyakana lo kya baala ba Aaroni na bampaangi baaku.
Kikabu kya kintwaari
11Mama ngo mangisi ma kikabu kya kintwaari kyakuha kuri Yaave. 12Mbuti baneti kikabu mu mvutukulu matoondo lo ha yulu kikabu kya mvutukulu matoondo, bayelemini kunata bindaatini byasaanga na maasi, na mbaanda masaangu yibakaanga na kukila maasi, na kikaayi kya fufu dya masaangu dibabvuuta na bindaatini byasaanga na maasi. 13Sa kabweese kunata kikabu kya mpa yasa lufunusu, mu kunama kikabu kya mvutukulu matoondo makiyeengi 14Nde sa kasoongo kuri Yaave, ndaambu mosi mu mpisi kikabu, ndaambu yiyo, yakuha kuri ngaanga-Nzaambi yibee tsyaamina makila ma kikabu kya kiyeengi. 15Mu mitariri toongo twa kikabu kya mvutukulu matoondo na kya kikabu kya kiyeengi, bayelemini kudya two kini kiluumbu ; kabatsiitsa kutukebe natee bweepari ko.
16Mbuti mu kikabu kya kukukisa nsiilulu, bunu pele kikabu kya ntiilu-mutima, lo kudya kyo kini kiluumbu na ndaambu yisaala kuyidya bweepari. 17Mbuti kuri toongo tusiiri, lo kiluumbu kyabitatu twa kulooso ku mbaawu. 18Na mbuti muutu diiri toongo twa kikabu kya kintwaari mu kiluumbu kyabitatu, lo kikabu kikyo kyahele kutaambula, na kisiiri na mufunu ko, bukuri toongo tweki twasumuka. Wunde wudya toongo tutwo lo sakiri lumvuki lwaandi. 19Toongo mbuti tubumini mu kitotolo kyasumuka, lo kutudya pe, twa kuyoko ku mbaawu, na muutu watsyeemeke lo diiri kwaandi toongo tutwo.
20Muutu wasumuka mbuti diiri toongo twa kikabu kya kintwaari kibaha kuri Yaave, lo wa kuyusula munsa kaanda dyaandi ; 21na muutu wunde wubelemene kitotolo ngo kitotolo kyasumuka, nsumukunu ya muutu, bunu pele ya kibulu kyankita kyasumuka na nde diiri toongo twa kikabu kya kintwaari kya Yaave, lo nde wa kuyusula munsa kaanda dyaandi.
Mangisi mu mitariri baatu bobanso
22Yaave waleele kuri Moose ti : 23Yaabisa kuri baala ba Iselili mangisi mamama : Beenu kaluri ndiila maasi ma ngoombo, ma kimeeme bunu pele ma ntaba ko. 24Maasi ma kibulu kyafwa kyo-meene, na maasi ma kibulu kyadzusa bambaasi bibulu, lo bamasariri kisalu ngo kisalu, ngo kabatsiitsa kumadya ko. 25Bukuri mpisi muutu wudya maasi ma kibulu kibaha kuri Yaave mu kikabu kya kuyoko, lo muutu wunde wa kuyusula ha kakati dya baatu ba kaanda dyaandi. 26Beenu kalutsiitsa kudya makila ma noni, na ma kibulu mu bibeendu byobinso bi ludzakala ko. 27Mpisi muutu wudya makila lo wa kuyusula ha kakati dya kaanda dyaandi.
28Yaave waleele kuri Moose ti : 29Leele kuri baala ba Iselili ti : Wunde wuha kikabu kyaandi kya kiyeengi lo yelemini kunata kuri Yaave kikuuku kyaandi ki kataasiri kuri nde.
30Mu myooko mya nde-meene sa kanata kikabu kya kuyoko kuri Yaave : Maasi mari ha yulu ntulu, nde sa kanata ntulu na kuyidyeengese ludyeengese lumosi ha busu bwa Yaave. 31Ngaanga-Nzaambi sa kayoko maasi ku dziku na kuha ntulu kuri Aaroni na baala baandi. 32Mu bikabu byeenu bya kiyeengi, sa lwaha kito kyalubakala kuri ngaanga-Nzaambi. 33Wunde, mu baala ba Aaroni wuha makila, na maasi mu kikabu kya matoondo, lo kikuuku kya nde kito kyalubakala. 34Bukuri ntulu yibadyeengese na kito kibayusula, me mporiri byo mu bikabu bya matoondo biheeri baala ba Iselili, na me mpeeri byo kuri Aaroni ngaanga-Nzaambi na baala baandi, bukuri bibyo byayusulu kwakinkulu kuri baala ba Iselili.
35Kikyo kikuuka kya Aaroni na baala baandi, kibaholo mu bikabu bi bayokolo Yaave kuholosono kiluumbu kiba basuusiri mu kisalu buni bangaanga ba Yaave. 36Byatumini Yaave kuri baala ba Iselili, mu kubaha mu kiluumbu kibabasakumuni, bayelemini kubvumina ntumunu yiyo mu biseendu bya bo.
37Mamo mangisi mu mitariri bikabu bya bikunu, bikabu byakubaka mpemisi, bikabu bya mfutulu masumu, bikabu bya kubyaalisa na bikabu bya kintwaari. 38Myatumini Yaave kuri Moose ku mulaandu wa Sinayi, mu kiluumbu ki katumini kuri baala ba Iselili mu kuha bikabu byaaku kuri Yaave ku nsi yankatu ya ku Sinayi.
Alliance Biblique du Congo 2024