Yooswa 22
22
Makaanda mari ku esete dya Yorodaani
1Yooswa wateele baatu bari mu kaanda dya Lubeni, bari mu kaanda dya Ngadi na bari mu ndaambu kaanda dya Manase. 2Nde wabaleele ti : « Beenu lwakebiri myominso mya lutumini Moose kisari kya Yaave na lwayukiri ndiinga me mu myominso mi nyatumini kuri beenu. 3Biluumbu byalaka natee mu kiluumbu kimaki, beenu lwasiiri yekele bampaangi beenu bari Iselili ko, mu bubwo beenu lwatumumuni mu mangisi ma Yaave Nzaambi yeenu. 4Mu lumalu bukuri Yaave, Nzaambi yeenu, mwa wuumisa bampaangi beenu bunu bu kaluleeriri, lo lubvutukiri ku bula bweenu. Yendeenu lweludzakala mu manzo yangooto ku nsi yeenu ya luheeri Moose kisari kya Yaave, ku simu dya nyari ya Yorodaani. 5Ngo salilee kwalaka lutumu lwaluheeri Moose, kisari kya Yaave, mu kutya Yaave Nzaambi yeenu, mu kudyatila mu manzila maandi momanso, mu kukebe mangisi maandi, mu kukaangama mu nde na kumusalila mu mutima ndemunso na muheebulu yeenu ndemunso. » 6Yooswa wabasakumuna na wabatuma ti babvutuka kwaaku ; babvutuka ku manzo yangooto maaku. 7Kuri ndaambu kaanda dya Manase, Moose waheeri nsi ku Basaani na Yooswa waha kuri ndaambu kaanda dya Manase kyakaka, nsi yiri ku simu dya Yorodaani ku wesete. Ntaangu ya baheekiri Yooswa ku manzo yangooto maaku, nde wabasakumuna 8na wabaleele ti : « Bvutukee ku manzo yangooto meenu na busina bwalaka bu lwabakiri : Bibulu, palata, woolo, nsoongo, bitari na binkutu. Kabilee bitotolo bya bataatu beenu, bilwabakiri ku mudziingu, na bampaangi beenu. »
Dziku dyatungu ku mpele Yorodaani
9Baala ba Lubeni, baala ba Ngadi na ndaambu kaanda dya Manase babvutuka ku mabula maaku ; basiisa baala ba Iselili ku Silo, dya Kanaana, mu kweende ku Ngaladi, nsi yibabakiri mu lubaku mu lutumu lwaheeri Yaave kuri Moose. 10Bu batubuka mu teke nyari ya Yorodaani, mu nsi ya Kanaana, baala ba Lubeni, baala ba Ngadi na ba ndaambu kaanda dya Manase batuunga dziku dyadinene kwalaka, ku mpele nyari ya Yorodaani. 11Baala ba Iselili bayuka ti baala ba Lubeni, baala ba Ngadi na ndaambu kaanda dya Manase, batuungiri dziku ku simu dya nsi ya Kanaana, mu teke nyari ya Yorodaani, ku kibari kya bo.
12Baala ba Iselili bu bayuka bubwo, bo bakutukina bobanso ku Silo, mu kweende ku mudziingu#22.12 Dziku dyatuunga ku kibari kya nsi ya Kanaana dimonokono bunu ti kibeendu kikimi kyasoboko na kibeendu kya lusaambulu kya Silo, na bunu kidiimbu kya tuungu kuri Nzaambi (kit.16).. 13Baala ba Iselili baheeke Pinehasi, mwaana Ngaanga-Nzaambi Elehadzari, kuri baala ba Lubeni, kuri baala ba Ngadi na kuri ndaambu kaanda dya Manase ku Ngaladi, 14nde waba kintwaari na baatu balukiinsu kuumi, muutu mosi mu mpisi kaanda ; bobanso baba bakuutu ba makaanda mu bitsuumbu bya Iselili. 15Bo bayende kuri baala ba Lubeni, kuri baala ba Ngadi, na kuri ndaambu kaanda dya Manase, ku Ngaladi, bo badzoonso na bo babaleele ti : 16Bumabu baatu ba Yaave bobanso bari baleele : « Mu nki beenu lwasiiri lumvuki lwabu kuri Nzaambi ya Iselili ? Mu lumalu beenu lumwaatekele Yaave mbisa bu lutuungiri mu beenu-meene dziku, mu kiluumbu ki, lu mwaasiila Yaave tungu. 17Buri lumvuki lwa Pehori, lwantele mu beetu ? Bunu beetu twakiri kutsyeemeke pe mu lumvuki lulwo natee mu kiluumbu ki, na kaanda#22.17 Kumono Ltg 25.1-9. dya Yaave diri mu kumono mpasi. 18Mu lumalu beenu lumwayekele Yaave ! Mbuti beenu lutungukiri Yaave lolo, ha kipari, Yaave sa kabakila baatu bari Iselili bobanso nkesi. 19Mbuti ngwanwa lumono ti nsi ya beenu-meene yayibi, lo yendee ku nsi ya Yaave, kukwo kuri kibeendu kya Yaave na wasee ludzakala ha kakati dya beetu, kasi ya lusiila Yaave na beetu tungu ko, mu kutuunga dziku dya beenu-meene diri dyahele dya Yaave, Nzaambi yeetu. 20Ntaangu yasiiri Akani, mwaana Dzera lumvuki lwalaka, mu ntoono bitotolo bi badikiri kuholo, nkesi dza Yaave dzabwiilikiri#22.20 Mu lumvuki lwalaka lwasiiri Akani, kumono Yos 7.mu kaanda dyodinso dya Iselili. Kari wunu Akani wafwiiri mu ntoono lumvuki lwaandi ko. »
21Baala ba Lubeni, baala ba Ngadi na ndaambu kaanda dya Manase, babvutula kuri bakuutu ba makaanda makaka ma Iselili ti : 22« Yaave, wuri Nzaambi, Nzaambi, Yaave, Nzaambi, Nzaambi, nde yaari, na Iselili sa kayaaba kari mu tungu, bunu pele mu kisaangala kuri Yaave, beetu twayirikiri mamo, lo nde yaa katubvuukisa ko mu kiluumbu ki. » 23Mbuti beetu dziku dya beetu-meene kutuunga mu kuyekele Yaave, mbuti mu kusiilaa ha yulu dyo, bikabu bya nyokolo bibulu, bikabu bya bifulu, na bikabu bya kiyeengi, lo Yaave nde-meene katuseembe#22.23 Bikabu byaba byayelemene kusiilaa hani ha yulu dziku dya kibeendu kya lusaambulu kya Iselili, ha nkotulu nzo yangooto ya mbwanukunu, kumono Bal 1-3.. 24Musamu kari bubwo ko, ngo beetu twasiiri bubwo bukuri twa bebata ti baala ba beenu baleele kuri baala ba beetu ti : « Nki biri ha kakati dya beenu na Yaave, Nzaambi ya Iselili ? 25Yaave wasiiri Yorodaani, yiri ndilu ha kakati dya beenu na beetu, baala ba Lubeni na baala ba Ngadi, beenu lwahele na kibari ti kimosi kuri Yaave ! » Mu ntoono yiyo, baala ba beenu ha bisi ti kusinda baala ba beetu mu kuhele kubata Yaave 26Ngo beetu twatsimini ti, tutuunga dziku dyeetu, kari mu bikabu bya nyokolo bibulu na mu bibulu bya kudzusa mu bikabu ko, 27ngo mu kuri ti, dziku didyo diba kimbaangi ha kakati dya beenu na beetu, ha kakati dya biseendu bikwiisa ha mambisa ma beetu ; dziku didyo dita kimbaangi ti beetu turi na miswa mya kuyingukila Yaave mu bikabu byeetu bya nyokolo bibulu, mu bikabu byeetu bya nzusulu bibulu na mu bikabu byeetu bya kiyeengi, kuri baala ba beenu bari ndeleele ha kipari kuri baala ba beetu ko ti bo bahele na kibari ti kimosi mu Yaave ! 28Beetu twaleeriri ti, mbuti baleeriri bubwo kuri beetu bunu pele kuri baala ba beetu, lo beetu sa twabvutula ti : « Monee kifwaani kya dziku dya Yaave, dyatuungiri bataayi beenu, kari mu ntoono bikabu bya nyokolo bibulu bunu pele bya nzusulu bibulu ko, ngo mu kuta kimbaangi ha kakati dya beetu na beenu. » 29Beetu twahele kusaana na kutungukila Yaave mu kutuunga dziku dya kusiila bikabu bya bibulu bya kuyoko, bikabu bya binkoolo na bikabu bya bitsuumbu ngo bitsuumbu. Beetu turi nsiilila bikabu ko mbuti kari ha dziku dya Yaave, Nzaambi yeetu ko, dziku diri ha mankula ma kibeendu kyaandi.
30Pinehasi, Ngaanga-Nzaambi, bakuutu ba makaanda na bamfumu ba baala ba Iselili babakweyende na nde, bu bayuka misamu myaleeriri baala ba Lubeni, baala ba Ngadi na baala ba Manase, bamono ti myamibwete ha miisu myaaku. 31Pinehasi, mwaana Elehadzari Ngaanga-Nzaambi, waleele kuri baala ba Lubeni, baala ba Ngadi na baala ba Manase ti : « Beetu tumwayaaba mu dyalolo ti Yaave wuri ha kakati dya beetu, bukuri beenu lwahele kusaana Yaave ; mu bubwo beenu lukuuriri baala ba Iselili mu nkesi dza Yaave. »
32Pinehasi, mwaana Elehadzari Ngaanga-Nzaambi, na bakuutu ba makaanda basiisa baala ba Lubeni, baala ba Ngadi. Basiisa nsi ya Ngaladi na bayende ku nsi ya Kanaana mu kuyalimina mampolo kuri baala ba Iselili. 33Mampolo mamo mamonokono ti mamabwe ha miisu mya baala ba Iselili na bo babvutula matoondo kuri Nzaambi. Bayekele kitsimi kya kuheeke bayongolo mu kwetsyaamina nsi yaba yadzakala baala ba Lubeni na baala ba Ngadi. 34Baala ba Lubeni na baala ba Ngadi baluka dziku didyo nkuumbu ya « kimbaangi », bukuri dyo diri : « Kimbaangi ha kakati dya beetu ti Yaave ngo Nzaambi ! »
Alliance Biblique du Congo 2024