Esayi 63
63
Yaave wufuunda kaanda dyaandi
1Na wunde wufuma ku Edomi,
ku Bosera, binkutu bya ntiinta yabeenge,
mu binkutu biseme,
mu kuteleme mu mutsaalu
mu makwa maandi momanso ?
– Wunde me, nyidzoonso mu nsungumunu,
me nyiri na makwa ma kubvuukisa.
2– Mu nki dzweele dyaaku diri dyabeenge,
na binkutu byaaku biri bunu binkutu bya wukaminaa bimbutu bya bviinya ?
3– Me mbeeri me mukaka mu kukamina bviinya,
ti mosi beeri wahele kintwaari na me mu baatu bobanso ;
me nyabadyeeti kunsa kabila dyaami,
nyabanyifinee mu nkesi dzaami ;
makila ma bo matiimbukiri mu binkutu bya me,
nyabviimfiri binkutu byaami byobinso.
4Bukuri nyatsimini kiluumbu kya kubvutula kitete,
na mubvu wakukuula me tubukiri.
5Me nyatala,
na muutu ti mosi pe wumbakisa ;
nyabeeri nyanyoongo,
na muutu ti mosi pe wunsyaamisa.
Heki kooko kwaami kwandulukisi,
na nkesi dzaami dza nkumisini.
6Me ndyeetee baatu kunsa kabila dyaami,
me nyibakolosiri malu mu nkesi dzaami
na nyatsyaamini makila ma bo ha nsi.
Mbambukulu mamabwe ma Yaave
7Me sa nyaabisa mayirikiri Yaave mu nkwikumunu yaandi,
biyiriki byaandi byayelemene kudumusa,
mu ntoono momanso mamabwe matuyirikiri Yaave,
mu bubwe byaandi bwabunene mu nzo Iselili,
mu mamabwe makabayirikiri
bunu buri ngebe dzaandi
na nkwikumunu yaandi yayinene.
8Nde waleeriri ti : Ngwanwa bo bari kaanda dyaami,
bari baala bari bawunaa ko !
Na nde wabeeri kuri bo mubvuukisi.
9Mu mpasi dzaaku dzodzinso,
– dzabeeri kuri nde mpasi –
ntumu yabeeri ha mankula ma nde wababvuukisiri ;
mu kutya kwaandi na mbweeyulu yaandi,
nde-meene wabakuuriri,
wabasyaamisini na kubanata,
mu biluumbu byobinso byayookiri.
10Ngo bo basiiri tungu,
bo banyoongisini Mpeeve yaandi yangisi.
Bubwo nde kakitukiri mutaatu kuri bo ;
nde wabanwaanisini nde-meene.
11Heki baatu baandi babaambuka mwooyo mu biluumbu bya ntaangu ya Moose#63.11 Na Moose : Mpa 14.15-23. :
Kuri kari wunde wabatoombiri mu mubu,
kintwaari na batari ba mpuumbu bimeeme yaandi ?
Kuri kari, wunde wasuusa mu bo muwuumunu waandi wangisi ?
12Wunde wuri, ha lubakala lwa Moose,
walaambula kooko kwaandi kwamakwa,
mu kubaala maampa ha mankula ma bo,
mpisi kaba na nkuumbu ya kinkulu ;
13Nde wabaneti
kunsa musundu mabeenge,
buni kabvaalu mu nsi yankatu,
kwahele kubumina makya.
14Buni bukulumukaa kibulu ku duuru,
muwuumunu Yaave wabaneti ku mpuumunu.
Bubwo ye waneti kaanda dyaaku
mu kuba na nkuumbu ya mvuumfu.
Lusaambulu : Mbuti ye lo kaakiri yulu
15Kunu yulu, na mono
kunu kikuundu kyaaku kyangisi na kya munkeembu :
Ntiilu yaaku yamakwa,
biyiriki byaaku bya mpiinu,
na ntiilu yaaku ya mutima,
kuri biri ?
Byobinso bibyo byasweemene kuri me.
16Buni ye wuri Taayi dyeetu :
Abarahami kasiiri kutusoolo ko,
kari Iselili watuyaabiri ko ;
ngo ye Yaave, wuri Taayi dyeetu.
« Mukuuri weetu », yiyo nkuumbu yaaku kuholosono na kidzika.
17Mu nki, Yaave, ye wuri mu kweyiimisa beetu la na manzila maaku ?
Mu nki ye wutudika mutu-ngolo mu kukubvumina ?
Wasa bvutuka, mu ntoono beetu, bisari byaaku,
mu ntoono bitsuumbu byasaala dyaaku !
18Mu mwaantaangu yantele kitsu kaanda dyaaku dyangisi dyataambiri saala ;
bataatu beetu badyeeti kibeendu kyaaku kyangisi.
19Beetu twayeki na kidzika
kiri bunu babo bari kari ye wutumaa ko,
mu babo bari nkuumbu ye yahele kubweese kutaanguna...
Mbuti ha beeri ye lo kaakiri yulu,
mbuti ye lo sundukiri,
Nkani milaandu miketi kunyingina
ha mankula ma ye ;
Alliance Biblique du Congo 2024