Esayi 41
41
Nzaambi ya ngwaana na biteki
1Beenu bibuma, benee napii mu kuyuka me.
Hemese makaanda mabaka makwa mamoono,
meende bebele na madzoonso,
makokosolo mu kintwaari
mu kubaandika mutsuundu.
2Na watelemisi kupalilaa ntaangu,
wunde wuteelaa nsungumunu,
mu kunama bitaambi byaandi ?
Na wamuyekikiri mansi
na kukulila bambyaasi ?
Mu mbeesi yaandi yayila
nde wabakitula buni fuunda,
mu nsyaari yaandi nde wababingi
buni nsyeri dzipeleke mu kiteembu.
3Nde wabanama
na wayooko mu kidzuunu mu nzila,
kwahele kudyaata mu miilu !
4Na wayirikiri mamo na kutswiikisa mo ?
Wunde wuteelaa biseendu
kuholosono mu mbandukulu.
Me Yaave, nyiri watete,
sa nyaba se wampotolo.
5Bibumi bimwiinee
na bari kunsa boomo ;
manto ma butoto mari mu kutekete,
mo mari mu kukokosolo, na mari mu kwiisa.
6Babakisina,
na mpisi nde wuleele kuri mpaangi ti : « Ba na makwa#41.6 Bit. 6-7 bibweese kuholo nguri musamu wa 40.19-20. ! »
7Muhalu biteki wusyaamisaa musulumisi woolo na mboongo ;
mutsuri-biseengu wusyaamisa
wusyaamisaa mutuuti bitari ;
wuleelaa mu nsululu ti : Yiri yayibwe !
Bo banamikisaa kiteki mu nsooso,
mu kuri ti kihele kunyingina.
Yaa ba na boomo ko, me nyikwiisa mu kukubakisa
8Ngo ye Iselili, kisari kyaami,
ye Yakobi wunyasooriri,
bilesi bya Abarahami nduku yaami#41.8 Kumono 2 Bm 20.7 ; Dzk 2.23. ;
9wunde wu nyayensi kusaka
natee ku manto ma butoto,
wu nyateeriri mbila
natee ku nsukunu nsi ;
na wu nyaleeriri ti :
« Ye kisari kyaami
ki nyasooriri,
me nyahele kulooso ye. »
10Yaa ba na boomo ko,
bukuri me nyiri kintwaari na ye.
Yaa ba na kisoosi kya ngebe ko,
bukuri me nyiri Nzaambi yaaku.
Me nyiisiri mu kukumisa ye,
me nyiisiri mu kubakisa ye,
me nyikukweeti mu lubakala lwaami lwa nsungumunu.
11Tala, sa bafwa nsoni, sa baba bakululu,
bobanso babakaa nkesi mu ye.
Bo sa baba buni kitotolo kya mubuunu,
baatu bakuyumisaa sa bafuukila.
12Ye sa wubasaka,
kasi ye wudzuukila babee yuminaa na ye ko.
Bo sa baba buni kitotolo kyabuuna, kitotolo kiri kyope,
baatu babee nwaanisaa ye.
13Bukuri me Yaave Nzaambi yaaku,
me nyikukweeti mu lubakala lwaaku,
na nyibweese kuleele ye ti : « Yaa ba na boomo ko,
me nyiisiri mu kubakisa ye. »
Me nyiisiri mu kubakisa ye
14Yaa ba na boomo ko,
ye Yakobi mwaa mutaki#41.14 Ye wubari mu kunyika buni mutaki : Maampu mangwana kampe ; Kihebereho baatu (ba Iselili) ; bamosi babaangula ti bamvuumbi (ba Iselili).,
beenu baatu ba Iselili.
Me nyiisiri mu kubakisa ye,
bu leeriri Yaave,
wunde wukukuula,
Wangisi wa Iselili.
15Tala, me sa nyikusa buni kikokolo
kya mimfuumbiri myamoono mu kukosono,
mimfuumbiri miri na miinu mu bibari byoolo myatwa#41.15 Kumono 28.27 na matina..
Ye sa bula milaandu
na kutsaba bikumu,
mu kubisa buni bitiiti.
16Ye sa watsyaamina byo,
na kiteembu sa kabinaanguna,
kimbwongolo sa kyabinata na kubidziimbisa.
Ye sa waluula mu kiminu
mu ntoono Yaave,
sa wasiika Wangisi wa Iselili.
Nsi yankatu yakituka dyaanga
17Bawelu na mafuunsi
bari mu kusaka maampa, kasi bahele kumabaka.
Ludima lwaaku lukanini mu mpwiisu.
Me Yaave sa nyibaha mvutu,
me Nzaambi ya Iselili nyibayekele ko.
18Me sa mpaka midzuumbu mya maampa
mu mulaandu myahele miti,
na miwiila ha kakati dya maduuru,
sa nyakitula nsi yankatu mu kidzinga,
na butoto bwakana mu dyaanga.
19Mu nsi yankatu me sa nyamenese
miti mya mambuyu, mya mikasya, mi koohana maasi na mi-olibve.
Mu bibiti byakana,
me sa nyamenese miti mya midiimbu,
mya oreme na mya mboto, myominso mu kintwaari.
20Mu kuri ti baatu bamono,
na baatu bobanso bayaaba,
mu kubakukila kintwaari mu mutima,
ti kooko kwa Yaave kusiiri nsobokoso yiyo,
Wangisi wa Iselili yirikiri mamo.
Banzaambi ba makaanda bampya
21Beenu banzaambi ba makaanda,
wasee lutswiikisa buungu dyeenu,
wasee lusoongo kimbaangi kyeenu,
bu leeriri Yaave, Mbyaasi ya Yakobi#41.21 Hamaha, buni buri mu Lulelusunu lwalukulu mpisi ntaangu, Yakobi wusoongo kintwaari kya kaanda dya Iselili (kumono 41.8, 14) ; mbyaasi ya Yakobi : Kufwanikisa na 44.6..
22Hemese lukokosolo,
na luyaabisa kuri beetu,
misamu mikwiisa ku mankula.
Misamu myabwiiri myatete#41.22 Kokisileenu bunu pele Tukokisileenu : Busoongo mikaanda mya mufunu myamikulu : Kihebereho Batwaala... ! – Misamu myayooko : Kumono 42.9 ; 43.18 ; 46.9 ; 48.3.,
myaba nkya myo ? Baangulee myo,
mpisi beetu tutsima na sa tuyaaba.
Buni pele lutuyaabisa mamo makwiisa
23Yaabisee beetu
mimyo mikwiisa ku mankula,
mu kuri ti beetu tuyaaba
ti beenu luri banzaambi.
Senee kwaandi mwa musamu
wamubwe bunu pele wamubi,
mu kuri ti beetu bobanso
tuba bambaangi bamono mu kintwaari.
24Kasi tala, mu beenu kuri kitotolo ko,
kisalu kyeenu kyabuuna.
Wulusoolo buni nzaambi
wasumuka se nde-meene.
25Kubaandika ku noode,
me ntelemisee muutu
weki mu nzila mu kwiisa.
Kuholosono kupalilaa ntaangu,
wuri mu kusaambila mu nkuumbu yaami.
Nde wuri mu kwiisa mu kudyaata
batuma mabula buni tamba,
buni mubuumbi
wudyaata tubuumbu.
26Na wayaabisiri misamu mimyo,
kuholosono ku mbandukulu,
mu kuri beetu tuyaaba ?
Kuholosono mu mantaangu mamakulu
mu kuri beetu tuleele ti :
« Ngwanwa yiri » ?
Ngo kuri ti mosi mu beenu ko wayaabisiri,
kuri wadziburi munwa mu beenu ko,
na kuri ti mosi wayukiri malwadzoonsiri beenu ko.
27Me nyiri watete,
mu kuyaabisa ku Syooni ti :
"Tala, mamama"
Me mpeekiri munati-mikeensu
wamubwete ku Yerusalemi#41.27 Kumono 40.9 na matina..
28Ngo me nyamwiini
muutu ti mosi mu bo ko,
kuri ti mosi ko wuha ndoongi
mu banzaambi babo.
Nkani me nyabafuuriri
mu kuri bampa mvutu.
29Tala, bobanso babuuna :
Biyiriki byaaku kini kiteembu kyampamba.
Biteki byaaku dini woolo dyabuunu dyasulumisa.
Alliance Biblique du Congo 2024