Esayi 26
26
Mukuunga : Beetu turi na bvula dyamakwa
1Mu kiluumbu kikyo, mu nsi ya Yuuda, sa bayimbila ti :
Beetu turi na bvula dyamakwa ;
nde wutuha mvuukulu mu ntoono bibaka byadzaangama na bya ntuungulu yamakwa.
2Dzibulee myeelu,
hemese baatu basuunguma bakoto,
babo bakebaa ntumunu dzaaku#26.2 Kufwanikisa na Mkg 118.19-20..
3Wunde wakaanga mutima na keketee#26.3 Mutima waandi : Mu busoongo matina Oringene mu Kihebereho ; matina mu kikulu kya nsi nyirimunu.,
Ye sa wumukebe kunsa kiyeengi,
bukuri wuri na kanyi mu Ye.
4Seenee kanyi mu Yaave
kwakinkulu,
mu Yaave wuri tari dya mantaangu momanso.
5Bukuri nde bwiisirye
badzakala mu bibeendu byadzaangama ;
nde kuriri bvula dyadzaangama,
nde wudikuriri natee ha butoto.
Nde wudiloosiri natee kunsa fuunda,
6wudihemisini mu kuba dyadyaata
mu miilu mya mafuunsi na baatu ba bawelu.
Lusaambulu : Beetu twasa kanyi mu ye, Yaave
7Nzila ya muutu wasuunguma
yiri nsungumunu ;
ye wuri wasuunguma
wuyirikaa nzila wasuunguma.
8Ngwanwa Yaave, beetu tusiiri
kanyi mu nkuumbu yaaku,
mu nzila ya ntumunu dzaaku,
mu kubaambuka mwooyo mu ye,
buri ntiilu yeetu.
9Mu butsuku, muheebulu waami
wubaanaa na nzala ye,
kiluunsi kyaami kisaka ye kunsa mutima waami.
Mu ntaangu ya nsundusulu dzaaku ha butoto,
baatu bari ha nsi bayikaa nsungumunu.
10Ngo mbuti basiiri ngaa-bubi mpemisi,
lo nde wahele kutya kuyika nsungumunu.
Hayuku mu nsi yiri mamabwe, lo nde kuyirika bubi,
kari mbakikila bunene bwa Yaave ko.
11Kooko kwaaku kwalaambula, Yaave,
kasi bo bahele kumono.
Bo sa bafwa nsoni mu kumono
buwukalila ye baatu baaku,
mu kunyeenge ku mbaawu
yi wabvuku mu bataatu baaku#26.11 Kufwanikisa na Bah 10.27. !
12Yaave, ye wusalilaa kiyeengi mu beetu#26.12 Babamosi babaangula ti ye wutuha (bunu pele sa waha) kiyeengi.,
ye wukukisaa se biyiriki byeetu
byobinso mu beetu.
13Yaave Nzaambi yeetu,
wungu-wungu ye, bamfumu bakimi
batuminee ha yulu beetu.
Ngo beetu nkuumbu ye kitsu turi mu kudumusa.
14Bafwa lo babweese kuba bamwooyo ko,
bamvuumbi lo babweese kusiimbuka ko.
Mu bubwo ye teleminee
mu kubafuukisa,
na mu kudziimbisa byobinso
mbambukulu mwooyo mu bo.
15Ye funisinee baatu,
Yaave, ye funisinee baatu,
ye soongirye nkeembu yaaku,
ye tatiryee mandilu ma nsi.
16Yaave, kunsa mpasi,
bo bakusakiryee ;
bo bamungutyee mu nsaambulu
kunsa nsuungukulu yaaku.
17Buni buri mukyeetu wuri na yimi,
wunde weki bele mu kubuta,
wukalikinaa mu mpasi dza misoongo na kufulu misaakulu,
bubwo beetu turi ha busu bwa ye, Yaave.
18Beetu twabakiri yimi,
twakalikini mu mpasi,
ngo buni ti kiteembu kitsu twabutiri.
Beetu twahele kutwaala
mvuukulu ha butoto,
hayuku baatu bamoono mu nsi.
Mfulukulu ya bafwa, nseembulu ya mamabi
19Baatu baaku bafwa
sa babweese kuba bamwooyo,
bamvuumbi baaku sa bafuluka.
Siimbukeenu, na fulee miloolo mya kiminu,
beenu bayalama kunsa fuundu.
Bukuri munoko weenu
sa kaba munoko wa kukya,
na nsi sa yiha mwooyo
kuri baatu bafwa.
20Baatu baami, yendee lukoto mu bihekiri byeenu,
na kaangee myeelu ha mambisa ma beenu.
Hemese lusweeme mu mwakilookolo kyantele,
natee kuwa nkesi dza Yaave.
21Bukuri Yaave pariri ha kibeendu kyaandi,
mu kutambikisa lumvuki
lwa baatu bari ha nsi.
Butoto sa busoongo
makila ma kafukaa,
na kuhele kusweeke
baatu babadzusiri.
Alliance Biblique du Congo 2024